Siracide 16
16
Unimbɔti ŋān̄ ní ki cáá ntoom
1Taa nyàab̀ kí nīn cáá mbiyaamu tikpil
ŋyunti ŋun muaa bí tibanee.
A yaa tí cáá mbiyaamu ní muaa dū ti-Dindaan
ki yíiń tibee, á taa nín̄ fàal̀ mu-pu.
2Taa nín̄ fàal̀ yii a cáá mbiyaamu tikpil,
ŋyunti ŋun ní muaa fàŋkí ti-Dindaanee.
3Taa nín̄ máká mu-pu yii mu làá nīn cáá mmaŋfafɔkɔn,
kí taa nín̄ kā ki cɔ́tí mu-wíiŋŋu pu.
An sɔ́ á nīn cáá kibibaabilii ki jítiǹ á nīn cáá-mu kutuku.
An sɔ́ á kpú kaa màl̄ kibiki ki jítiǹ
á nīn cáá mbiyaamu muaa fàŋkí ti-Dindaan#16.3 B. 1-3. Dūú ŋmàntī nì Alaŋ 17.25, 19.13, Iciin 4.1..
4Uciŋfiti ubambaanti di yaa bí kitiŋinee,
binib gbéè-kì ní,
ama binikpitib dikitil ŋūǹ kí yàntī kí nàan̄.
5M ká nì m-nimbiliŋ tibɔti tikpil jítì kii míǹ,
ní ki gbìl̄ nì m-tafaliŋ tin jítiǹ tineeyee.
6Ti-Dindaan ŋmiŋu fōō bikpitiŋaliibi kitil kansikin,
u-ŋuul fòol̄ lìblib kii ŋŋmee bin jáà nì uee pu#16.6 Kpèè Dikà 11.1, 16.1-35, Ilan 78.21..
7Waa nìn dū cannaaku jawɔkati kpitii ki pú-bi,
bíǹ bin nìn cɔ́tí bi-pɔŋŋu pu ki jáń nì uee#16.7 Kpèè 6.1-7, Iciin 14.6..
8Waa nìn tāaǹ kitiŋ kin poon Looti nìn kóòyee,
di sá yii u-nimbil kaa nìn là kí wāl̀ kitiŋ gbanti nib lambil#16.8 Diny 19.1-29..
9Waa nìn súń Kanaan yab bin wáŋkèe saai,
u nìn kúntì-bi bi-kpitii pu#16.9 Kpèè Disa 23.33, Ditee 7.1-6..
10Waa nìn súń Isirayeel yab binib kutukub alaataa aluu saai.
Bi nìn kpíì kun puee bi nín jáń nì ti-Dindaan#16.10 Kpèè Disa 12.37, Dikà 1.46, 11.21..
11Báà unibaanti di yaa jáà nì ti-Dindaan,
án làá nīn cáá maamaaci yii u yāntì udaan
kaa dáaĺ u-tafal.
Di sá yii disaasɔl nì diŋuul bí ti-Dindaan cee ní.
U ŋūǹ kí pɔ̄ ikpiti nì tiniti poon,
ama u dàkà u-ŋuul mun ní.
12U-poon nín mɔ̄ puee, míǹ mbaantiim
ní u sòoǹ ki kù binib bɔti.
U sòoǹ binib bɔti ki nóó nì bi-tuuŋŋi ní#16.12 Dūú ŋmàntī nì Yoob 34.11, 1 Peet 1.17, Dilee 20.12,13..
13Ukpitiŋal kaa làá ŋmā kí sāǹ kí kpáaǹ tin u fìkēe,
deedeedaan yaa jíń kimɔtiiyee, icoo kpá kí jī-u.
14Unil yaa dàkā kulaŋŋaŋfitiiuee,
ti-Dindaan kaa làá súntí u-pu,
di sá yii u làá sòoǹ báà ŋma bɔti kí nóó nì u-tuuŋŋi ní.
Unimbɔti làá pée pà báà ŋma ní
17Á taa lì yii: «M làá sāǹ kí báĺ ti-Dindaan.
Ŋma di bí yilpu ki làá téetí m-pu?
Diniwukpaandi nee poonee, ubɔ kaa nyí-mi.
Tiwannáaŋkaal tin wīikí nee kansikinee, m bí uŋa?
18Kpèè, kutagbɔŋu nì yilpu fɔ́ŋŋŋ,
kitiŋ nì tiŋkub taapu taapu cīŋkì
ŋyunti ŋun ti-Dindaan dɔ́miń ki māntì bi-puee.
19Ajoon nì kitiŋ nyeel cìŋkī ní
ŋyunti ŋun u yaa fātìi kpēē-ŋee#16.19 Dūú ŋmàntī nì Ilan 18.8, 104.32..
20Ama báà ubɔ kaa dàkafī tíǹ kɔkɔ pu.
Ŋma di fātìi tɔ́ tin ti-Dindaan ŋée?
21Kii kubuŋkpaaŋŋu nín jītí baa wāĺ-ku puee,
míǹ ní ti-Dindaan tuuŋŋi kɔkɔ bí dibalin.
22Deedee tuuŋŋi gbanti kɔkɔee,
ŋma di làá sòoǹ ŋi-pu, ŋma di làá kàl̄ kí cīití-ŋi?
Ti-Dindaan poondi dá láá dátìń.»
23Unil un ciiŋyi pátèe di dàkafī míǹ.
Ugbaan un wáŋkèe di dàkafī ŋgbaaŋyaamin míǹ#16.23 Dūú ŋmàntī nì Ilan 14.1, 53.2..
DIDÀKAL BƆTI DIKITILILIITIIL
Unimbɔti nín náań tiwan an dī dī tɔb pu puee
24Pīlifiǹ-mi, m-biki, ní kí ká dinyil.
Dū a-pɔbil kɔkɔ kí tīī m-nyɔɔbuŋŋi.
25M làá dàkà-si didàkal din sá dimɔntiilee,
m làá dū m-nyil kí dàkà-si min ní an máaǹee.
26Ŋkilkaamin ti-Dindaan nín nìn náań tiwanee,
u nìn dū-tì ki kāaǹ ti-paaŋŋu ti-paaŋŋu ní#16.26 Kpèè Diny 1.1-3..
27U nìn yóoǹ u-tuuŋŋi marab
bin làá nīn bí kí nīn cá jaanjaanee,
u yóoǹ-tì marab bin tì làá nīn nóó
kí yòon̄ ŋkilkaamin kí tin cáá kátí-kùee.
Ŋkùm kaa cútí-tàaa, tàa gàaa,
tàa fàtī ti-boon kí tīī ditundi din pu bi náań-tèe#16.27 Dūú ŋmàntī nì Yees 40.26..
28An kaa pée cáá yii tiba kpéetí tin kíǹ,
ní tì kpá kí yìntīǹ ti-Dindaan marab dalba dalba.
29Míǹ boonee ní ti-Dindaan kpēē kitiŋ,
ní ki dū u-ŋanti ki gbéeǹ-kì.
30U gbéeǹ-kì ipeel kɔkɔ nì i-buluku i-buluku#16.30 Dūú ŋmàntī nì Diny 1.20-25.,
ní i yaa kpíìyee í fàtīí gítí kitiŋ.
Currently Selected:
Siracide 16: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.