Siracide 15
15
1Unil un fàŋkí ti-Dindaanee nín ŋáań puee dee,
un di yaa ŋúb́ mara tiŋanee di kāntí iciin.
2I làá yīkì kí tūŋkìń-u nsan kii ubinaatee,
kii usapɔɔn un kaa nyí uninjee nín fòol̄ u-cal puee.
3Tijin tin i làá tīī-u ú jēe di sá dinyil,
nnyim min i làá tīī-u ú nyɔ̀ee di sá iciin.
4U làá dāá nyīī i-pu ní kí taa cìŋkì,
u làá dāá nīn máká i-pu ní icoo ń taa kɔ́-u.
5Iciin làá dāá yàntī ú nīn tɔ́kɔ́ u-ŋeenaatɔb pu.
Samaa kansikinee, i làá dāá tīī-u tin sá ú sòoǹee.
6U làá dāá ká nnaam ní kí nīn bí mmɔŋkpaanni,
ní kí nyā diyindi kí nīn cá jaanjaan.
7Ama bigbaambi kpá ki làá ká iciin,
bikpitiŋaliibi mun kpá kí ká-i.
8Iciin kaa sútí kí pìl̄ bilambidambi,
binyimɔndambi kaa dàkafī i-pu.
9An kaa kítì binikpitib ń gāā ilan kí nyɔ̄ŋkì ti-Dindaan,
di sá yii an kaa nyánní ti-Dindaan cee.
10Tiŋman, Iciin di yàntī unil ń nyɔ̄ŋkì ti-Dindaan,
ti-Dindaan di kpòotī-u#15.10 B. 1-10: dūú ŋmàntī nì Iciin 6.12-16..
Unil tɔ́ u-ba kí ŋá tin u lèe
11Taa lì yii: «Ti-Dindaan di yāntì m fá nsammɔnti.»
Di sá yii Unimbɔti kaa ŋáań tin u née.
12Taa lì yii: «Úǹ di yāntì ní m gáatì»,
di sá yii úǹ làá ŋá ba nì unikpiti#15.12 B. 11-12: dūú ŋmàntī nì Alaŋ 19.3, Yaku 1.13..
13Ti-Dindaan ná ntimbiil tuuŋŋi kɔkɔ nì ŋi-bulifi.
Míǹ ní bin yú nì u deedeeyee mun bí.
14Ti-Dindaan u-ba di náań unil ŋkilkaamin,
ní ki pú-u nsan ú lēē kí ŋá tin u làá ŋée#15.14 Dūú ŋmàntī nì Diny 2.7, 2.16-17..
15A yaa là, a ŋūǹ kí nīn nóó ti-Dindaan marab.
Á nīn yú nì ti-Dindaan deedeeyee, án làá nyānní a-cee.
16U dū ŋŋmi nì nnyim ní ki bíl̀ a-nimbiin,
án sá sii ní ń tàntī a-ŋal kí lēē kun a lèe.
17U dū dimaŋfal nì ŋkúm ní ki bíl̀ binib nimbiin.
Un yaa là ki lēē kuŋyee ní u kāntí#15.17 Dūú ŋmàntī nì Ditee 11.26-28, 30.15-20, Yeer 21.8..
18Di sá yii ti-Dindaan ciiŋyi sá ikpaŋkpaan ní.
U sá Mpɔŋkɔdaan ní ki wāĺ tikɔkɔ.
19U-nimbil bá bin fàŋkí-uee pu.
Úǹ u-ba nyí binib tuuŋŋi kɔkɔ#15.19 Dūú ŋmàntī nì 17.15,19-20, 34.19, 42.18, Ilan 33.18, 34.16..
20Waa tīī ubɔ mara ú nīn sá unikpiti,
waa tí pú ubɔ nsan ú nīn ŋáań ikpiti.
Currently Selected:
Siracide 15: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.