Siracide 14
14
1Unil un kaa sòon̄ ki yīntì,
ní kaa cáá yii ú yāliŋkì u-kpitii puee bí mmɔnneeee#14.1 Dūú ŋmàntī nì Alaŋ 10.19, Uciŋ 7.21-22, Yaku 3.5-12.!
2Unil un kaa cáá yii u-pɔbil máfí tiba pu,
ní ki ká tin u mákée puee bí mmɔnni!
3Tigaajati kaa máaǹ ukummunti.
A yaa cáá animbil ní kaa jīǹ-ŋee, a cáá-ŋi ba pu?
4Unil un ŋmìntī u-ba,
ki kōontí tigaajawan ki yōontée,
udaan kōontí ki yōontí ubɔ ní.
Tigaajati gbanti ní biba dāa ŋúb́ ki jīǹ pùsi pusi#14.4 Dūú ŋmàntī nì Uciŋ 2.18-24..
5Mana ní unil un ŋmìntī u-bee
kíikí kí pɔ̄ ubɔ?
Waa pée jīǹ u-gaajati pu gba.
6Unikpiti ubɔ kaa bí ki bàn̄ un di sàantí u-bee,
ditafadaaldi din u cáá kí fōō u-toom puee dee.
7Báà u yaa ŋá tiŋanaaa,
u nyí kun pu u ŋée.
Kí dāá kúntée, see ú dāá lēē u-toom kí dàkà.
8Unil un kpèé tiwan nì nnimbitaataamee sá unikpiti ní.
U ŋáań kii waa wāĺ báà ubɔee ní ki kpèé binib fám.
9Nnimbitaataam daan kaa fáatí tin u cááyee,
nnimbineel yàntī unil naŋki ń kpā ní.
10Ukummunti kaa pūǹ u-jikaati,
baa kpáàa kāntí tijin u-diikun.
A-maŋfal poonee, a yaa cáá á jī
11M-biki, a yaa cáá ŋŋmamee, á nīn bɔ́ntí a-ba tiŋan,
ní kí ŋá ti-Dindaan saraabi bin máaǹ-uee.
12Téetí yii ŋkúm kaa làá tàan̄ kí bàń,
aa nyí ŋwiin ŋun ŋu lēē ki síiǹee.
13Kí wàatī á kpúee, á ŋá a-bɔɔ tiŋan,
pɔ́ɔǹ a-ba kí ŋá-u tiniti kí nóó nì a-ŋmam.
14Taa ŋmìntī a-ba ŋwiin ŋubɔ naam,
an yaa pú-si diyimɔɔl á jī mmɔnee, jī#14.14 Dūú ŋmàntī nì Uciŋ 7.14, 11.9-10..
15A nín pɔ́ɔǹ ki túń ditundi ki ká tiŋyee,
a làá dāá yàntī-tì kí tīī ubɔ fám ní.
Bin làá dāá jī a-fakalee làá dāá tɔ̄ kasi
ní kí yàkatī-tì.
16Pɔ̄ àá fōō tin bi pú-see, kí jī mmɔn.
Di sá yii ditaŋkpiilinee, ubɔ kaa ŋūǹ kí nyàab̀ kí ká mmɔn.
17Unil wunti kúù kii tiwampeeŋkaalee ní.
«A bí ki làá kpú#14.17 Dūú ŋmàntī nì 8.7, Ilan 102.27.», an sá mara un bí ki cá jaanjaanee ní.
18Busubu bun pu tifaal múkú ki sɔ̀m̀ee,
tiba gbátí ní tipɔn ń túkú.
Míǹ mbaantiim ní binib naantitɔntɔkɔŋ sá:
Biba kúù ní bi màal̀ biba.
19Tin kamaa ní unil náańee bí ki làá wāŋkì,
un náań-tèe nì tin u náańee làá dāá wāŋkì.
Unil un bíi nyàab̀ iciinee
(Kpèè 51.13-29, Alaŋ 8.22-35)
20Unil un néeń iciin bɔti,
ní ki dàkafì ki sòoǹ dinyil poonee bí mmɔnni!
21U dàkafī u-pɔbilin iciin sàmbiyaamu pu,
ní ki pɔ̄ɔntí ki dàkafī i-bɔɔŋŋi pu.
22U sáń ki jì iciin boon
kii ukpan nín ŋáań puee,
ki náká i-saŋyi pu ki cí-i.
23U gbōontí ki kpèé u-tɔkɔlau poon,
u nākantí i-punyɔkɔpu ki pílifí i-bɔti.
24U kóò ki kɔ́l̀ iciin dumpu,
ní ki cōontí u-tantiu i-guŋŋi pu.
25U cōontí u-tantiu ki pìl̀ iciin,
ní ki kóò nnaam paaŋŋu pu.
26U kàantí u-biyaamu iciin cee,
ní ki kóò i-paŋŋi taapu.
27U kóò i-booŋŋu taapu kutuntuŋu yuntiŋu
ní ki bí i-nyootin.
Currently Selected:
Siracide 14: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.