Siracide 11
11
1Unil un sīntiǹ u-ba taapuee ciiŋyi pu
ní u còom̄ u-yil gáań,
ní ki ŋūǹ kí kàl̄ binikpaambi kansikin#11.1 Kpèè Diny 41.37-46..
Baa sòoǹ unil bɔti dinimbil pu
2Taa pàkà unil u-nyaaŋku pu,
kí taa nín̄ ná unil min ní u bée pu.
3Tin ŋàaǹee kansikinee, unaŋgbansii di sá kiwaai,
ama u-siiti mɔ̄ ki jítiǹ tikɔkɔ duulinyan.
4Taa nín̄ dàkà a-ba tiwan tin a pēēyee pu,
bi yaa tí bíi pàkà-see, á taa yòon̄ a-ba yilpu.
Di sá yii ti-Dindaan di tūǹ maamaaci tuuŋŋi,
tì bál̀ binib cee.
5Bibɔtiibi tikpil kpákatì bi-beejaliŋ pu ki kāl̀ kitiŋ
ní binib bin pu baa nìn nyée kāl̀ dibeel.
6Biyidambi tikpil fá bi-jilimau kpataaa,
ní binib bin nyáń diyindee kpántì iyumbu.
7Taa kɔ̄kɔl̀ unil kaa bālifì ki béè,
dàkafì kí wàatī ní kí nín wòoǹ unil.
8Pīlifì tibɔti kí wàatī ní kí nín kíí-tì,
unil yaa bíi sòoǹee, á taa gíí u-nyɔkɔpu.
9Taa dū a-nyɔkɔ kí bɔ̄ tibɔti tin kaa sá a-yatee poon,
taa dū a-nyɔkɔ kí cèeǹ binikpitib jaakun.
Tigaajati nì disool bɔti
10M-jipɔɔn, taa kpàb̄ atuun tikpil dicilpu,
a yaa kpàb̄ atuun tikpilee, aa làá ŋmā kí nyā.
Báà a yaa bíi sáń, aa làá ŋmā kí bà.
A yaa là tina ki là tinee, an kaa làá nyā nnyim.
11Unil ubɔ bí ki bìǹ ki gì, ki jìkì ditundi pu,
ama nì míǹ kɔkɔee ní an púntí-u#11.11 B. 10-11: dūú ŋmàntī nì Ilan 127.1-2, Alaŋ 10.22, Luuki 10.41-42..
12Biba bí ki sɔ̀m̀ ditundi pu
ní an bàlifī yii bí nīn pée tútúǹ-bi ŋma ní.
Baa cáá tiba ní ki sá bisoodambi.
Ama ní ti-Dindaan ń dàkà-bi u-laŋŋaŋfitiiku,
ní kí nyāntí-bi bi-falaau poon.
13Ti-Dindaan yāntì udaan yil kíǹ ki gáań,
ní án bākatiǹ binib.
14Tiŋan nì tikpitil, dimaŋfal nì ŋkúm,
disool nì tigaajatee, tíǹ kɔkɔ nyēeń ti-Dindaan cee ní#11.14 Dūú ŋmàntī nì Yees 45.7, Yoob 1.21, 2.10, Alaŋ 22.2..
17Ti-Dindaan wampɔkaati
sá ki tīī bin yú nì u deedeeyee ní.
U-ŋanti làá nīn kpòotī-bi ní baabadal
kí tàkan̄ nsan ŋun tèen̄ee pu.
18Binib biba kpántí bigaajab,
di sá yii bi kpáafí bi-nimbiliŋ nì bi-gaajati.
Ama kpèèmaan tin dɔ̄ ki cí-bee:
19Ŋwiin ŋun bi dāa lì bi-ban yii:
«M ŋūǹ kí ŋùŋfì kɔŋkɔnnee,
m ŋūǹ kí jī m-gaajati puee»,
baa nyí iwiin in kíǹ-bi bí dūú kàl̄ kitiŋ puee.
Bi làá kpú ní kí yàntī bi-gaajawanti
ní ubɔ fám ń dāá yòon̄#11.19 B. 18-19: dūú ŋmàntī nì Siira 14.15, Ilan 49.17, 49.18, Luuki 12.16, 12.21..
Ti-Dindaan ŋūǹ kí cúú tibɔti kí lábití
20Dū a-ba ki tīiǹ a-tundi,
tɔ̄-dì nì a-pɔŋŋu kɔkɔ,
kí nīn bí ditundi gbantin áli a-kúm dal.
21Taa nín̄ kpèé ki nyóosí binikpitib tuuŋŋi.
Sii dee, nín̄ pée máká ti-Dindaan pu,
kí nīn pɔ̄ɔntí a-tundin.
Di sá yii an kaa pée pɔ̄ɔ̄ ti-Dindaan cee
ú yàntī usoodaan ń kpántí ugaaja dibɔbil pu.
22Deedeedambi paati di sá ti-Dindaan biindi.
An dáá yì tantaasee, u ŋá tin kɔkɔ bi lèe ki tīī-bi.
23Taa lì yii: «Ba di gíti páb́-mi?
Ba ní m gíti máaǹ kí nīn cáá?»
24Taa tí lì mun yii: «M cáá tikɔkɔ nì tikɔkɔ,
dinimbinaamandi dilal di gíti ŋūǹ kí bàń-mi#11.24 B. 23-24: dūú ŋmàntī nì Maat 6.25-26, Luuki 12.15.?»
25Nnaam wiiŋŋu dalee, bi súntí nnaabu pu ní,
Nnaabu wiiŋŋu dalee, bi súntí nnaam pu ní.
26Binib yaa kpíìyee, an kaa pɔ̄ɔ̄ ki tīī ti-Dindaan
ú pà báà ŋma u-tundi paati.
27Kukuluu kubɔbɔ nimbinaamandi yàntī
unil ń súntí nnaam min kɔkɔ u jíń
u-maŋfal wiiŋyi kɔkɔ poonee.
Unil yaa kpíìyee ní bi béetí u-tuuŋŋi nyampooku.
28Unil yaa kaa kpíì, á taa lì yii u bí mmɔnni.
Di sá yii unil kúm dal ní bi béetí dinicil din u sée.
Nín̄ nyí nì a-ba nì binikpitib
29Taa nín̄ kɔ̄ntí un sá kamaa a-diikun,
di sá yii ukiildi cáá isan in pu u ŋūǹ kí dī kí ŋmàtiǹ-see.
30Ulambidaan sá kii ujikpal un bi pīiǹ
kunɔmbidiin kí dūú sàl̄ u-jutiibee ní.
U bí kii ucɔŋkilee ní,
u pée kpèé ŋyunti ŋun a làá lítée ní.
31U pīil̀ titalindi ní kí dū tiŋan kí kpántí tikpitil#11.31 Dūú ŋmàntī nì Yees 5.20..
U sòoǹ ki bíiĺ atummɔnti ŋin máaǹ bí pàkèe.
32Kii bi nín dù ŋŋmiyatiyaal kí kpāā ŋŋmikpaan puee,
míǹ ní unikpiti pīil̀ titalindi ki kù binib.
33Á nīn nyíǹ a-ba nì unikpiti,
di sá yii ikpiti diŋál ŋma pu ní u dàkafī.
U ŋūǹ kí bīil̀ a-yindi kí nīn cáa cá jaanjaan#11.33 Dūú ŋmàntī nì Alaŋ 1.10-16..
34A yaa fōō unicaan a-dumpuee,
u ŋūǹ kí cáań agìń kí tɔ̄ a-pu,
ní kí lùkutī a-dicaŋkun yab bí jáǹ-si.
Currently Selected:
Siracide 11: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.