Siracide 12
12
Sii nì bin kpèé Unimbɔti fámee ń taa kpāfì
1A yaa làá ŋá tiŋanee, á béé un ní a làá ŋée,
ní binib ń dāá jāam̀-si a-ŋanti pu.
2Ŋá bin yú nì Unimbɔti deedeeyee tiŋan,
bi làá dāá téeǹ-si.
Báà bíǹ bi-ba yaa kaa téeǹ-si,
Yilpu fɔ́ŋŋŋ Nimbɔtiu làá pà-si.
3Nnaam kaa bí ki tīī unil un ŋáań ikpiti kaa gbèentí,
ní kaa pūǹ biwɔfib tibee.
4Á pɔ̄ unil un di yú deedee nì Unimbɔtee,
ama á taa pée tūtuǹ un sá ukpitiŋalee.
5Ŋá unil un sīntiǹ u-ba taapuee tiŋan,
ama á taa tīī unikpiti báà tiba.
Yíí kí taa tīī-u tijin,
di sá yii u ŋūǹ kí dī an pu kí pɔ̄ɔkiǹ-si.
U làá dū tikpitil kí pà-si
tiŋan tin kɔkɔ a ŋá-uee mili pu.
6Yilpu fɔ́ŋŋŋ Nimbɔtiu kaa gèetíǹ bikpitiŋaliibi.
U làá dáaĺ binikpitib tafal min di máaǹ-bee#12.6 B. 1-6: dūú ŋmàntī nì Maat 5.38-48..
7An puee á tīī unil un sá unimɔntee,
ama á taa tūtuǹ ukpitiŋal.
Ubɔɔti un sá umɔntee nì un kaa sée
8A yaa bí digbilinee, aa ŋūǹ kí béé
ubɔɔti un sá umɔntee.
Ama a yaa kɔ́ dinimbinaamandinee,
an kaa pɔ̄ɔ̄ á béé a-nannanliu.
9Unil yaa bí mmɔnnee, u-nannanliibi bí kunimbaaun ní.
Ama u yaa kɔ́ dinimbinaamandinee, u-bɔɔ gba sáń kí fá-u ní.
10Taa pée dū a-mákal kí páań a-nannanliu pu,
kii tasa kúti nín dámintí puee,
míǹ ní u-toom bí.
11Báà u yaa ŋá kii u sīntiǹ u-ba taapu,
ki còom̄ ki bōō,
á nīn nyíǹ a-ba nì u.
Á nīn bí kii unil un jɔ̀lifī digitilee u-cee.
Á béé yii u nín dámintì puee kaa làá nīn pée bīī u-pu.
12Taa kàan̄-u kí kɔ́ĺ nì a-ba,
yaa sá fám, u ŋūǹ kí téé-si kí lúkú kí fōō a-paaŋŋu.
Á taa kàan̄-u a-ŋaŋgiil pú tinyool paaŋŋu pu,
yaa sá fám, u làá nyàab̀ kí jà-si kí kàl̄ a-jal pu.
Di sá yii kí dāá kúntée, a làá dāá tīī-mi mbaamɔn,
ní kí dāá téetí anyɔɔbun ŋin m sòon̄ee pu kí yāliŋkì.
13Ŋma sūǹ ukòocuul un ukoobu júee pu,
àá bin sútí ki pìl̀ ipeecuncuti ní i cúú-bee pu?
14Míǹ ní baa sūǹ un bɔ́ɔtí ukpitiŋal,
ní ki mun kíǹ ki ŋáań ikpitee pu.
15Unannanli làá kàl̄ a-cee ŋyunti ŋubɔ poon.
Ama a yaa gbéetì ki lítèe, u fá-si dee.
16Unannanli cáá nyɔɔmálmal ní,
ama u-pɔbilinee, u nyàab̀ min ní u làá ŋá
ní kí téé-si kí tɔ̄ mbòó poonee ní.
Unannanli ŋūǹ kí nīn kā nnyinnyim bàtifī,
ama u yaan ŋūǹ, a-fatikuu kaa bà ú nyɔ̀#12.16 Dūú ŋmàntī nì Yeer 9.7..
17Nnaabu tin lì yii ŋu jēetí a-puee,
u kpáàa bāań.
U làá mɔ̄ntì yii u bíi tútúǹ-si,
ama u là kí kàtī a-taal ní.
18U làá gbākafì diyil, ki kpáafí u-ŋalii,
ní ki sòoǹ ki bíiĺ-si kí dàkà dinicil din ní u baasii sée#12.18 gbākafì diyil: kpèè Ilan 22.8, Yoob 16.4. - kpáafí u-ŋalii: kpèè Eesee 25.6, Nawum 3.19, Iyal 2.15..
Currently Selected:
Siracide 12: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.