Nombres 32

Tinaakɔti tin kāl̀ Jɔɔdan buŋŋu ŋwìiń nyalaŋki púee

1Rubeen nì Gaadi naakɔti yab nìn cáá tiwaŋkuti tikpil, ní bi nìn dáań ki ká yii Yaseer tiŋki nì Galaadi tiŋki ŋān̄ diwaŋkpàal. 2An pu ní bi cūtìi ká Mooyiisi nì usaraaŋakpil Eeleeyasaar nì Isirayeel yab kpilib ki bí-bi yii: 3«Atarooti tiŋki nì Diibɔn tiŋki nì Yaseer tiŋki nì Niimra tiŋki nì Eesbɔn tiŋki nì Eelalee tiŋki nì Seebaam tiŋki nì Neeboo tiŋki nì Beeyɔn tiŋki 4nìn sá ntimu mun ti-Dindaan nìn jáń ki fōō ki tīī Isirayeel yabee ní. Ntimuee ŋān̄ diwaŋkpàal, ní timbi a-tɔntɔnliibi mun cáá tiwaŋkuti. 5A yaa bàà kíikí kí dū ntimu gbanti kí tīī-ti, timbi ń taa dùtī Jɔɔdan buŋgbandi lapu pu.»

6Ní Mooyiisi kíí Gaadi nì Rubeen naakɔti yab yii: «Ba pu ní ni-nabiyaamu ń búntí kujaau ní nimbi ń gbíntí ki kā doo? 7Ba pu ní ni bí ki yɔ̀tī ni-nabiyaamu Isirayeel yab wunti bí taa cùú fōō kitiŋ kin ti-Dindaan dūu tīī-bee? 8Míǹ ní ni-baabi mun nìn tí ŋá ŋyunti ŋun ti nìn bí Kadeesi-Baarneeya m nìn tú-bi bí cùú cɔ̄ŋkì Kanaan tiŋkee. 9Bi nìn jɔ́m̀ áli ki bàn̄ Eeskool tantakalin ki kpēē kitiŋ, ní boonee bi yɔ̄tì Isirayeel yab wunti bí taa kɔ́ kitiŋ kin ti-Dindaan tīī-bee poon#32.9 Kpèè 13.17-33.. 10Ti-Dindaan nìn fōō bi-pu diŋuul ŋwiin gbanti ní ki pūtì ki lī yii: 11<Binib bin nìn nyáń Eejipiti tiŋkin kuyuŋu ki nìn cáá abin mmuŋku kí nīn cée, bi kpá kí kɔ́ kitiŋ kin m pōoǹ kí tīī Abraam nì Isaaki nì Jaakɔbee, kun puee baa yúliǹ-mi deedee. 12See Yeefunee jipɔɔn Kaaleeb un sá Keenaasi maaliŋunee nì Nuuni jipɔɔn Joosuwa baba di làá kɔ́ kitiŋ gbantin, kun puee bíǹ yúliǹ-mi deedee kaa kpōoǹ laaba.> 13An pu ní ti-Dindaan nìn fōō Isirayeel yab pu diŋuul ki yāntì bi tú ki yìiǹ kuteeun abin imuŋku ili, ní bin kɔkɔ nìn yīntiǹ-uee kpíì#32.13 Kpèè 14.26-35.. 14Nimbi binikpitib nee làá nóó ni-baabi tabɔbiliŋ kí gbítí ti-Dindaan ŋuul Isirayeel yab puɔɔɔ? 15Míǹ puee nimbi di yaa fātì ni-boon ki tīī ti-Dindaanee, u làá gíti yàntī Isirayeel yab ń yúntí kuteeun, ní nimbi di làá dāá túń samaa gbanti kpuulool.»

16Bi gbìl̄ mimmee ní ki sútìi pìl̄ Mooyiisi, ní ki bí-u yii: «Ti làá mā doo nee tikpuŋkpun ti-piii nì ti-ŋoobui ń nīn kóò, ní kí mā ti-biyaamu adiin. 17Ti yaa ŋá mimmee, ní tí yòon̄ tijanjawan malaa kí lìntī ti-nabiyaamu Isirayeel yab nyɔkɔpu, ní kí cáá-bi kí bànnì kitiŋ kin bi tīī-bee. Ŋyunti gbantee timbi biyaamu bí ntimu mun bi máń agun ki túee poon, binib bin kóò kitiŋ nee puee ń taa ŋmā kí ŋá-bi tiba. 18See ti-nabiyaamu Isirayeel yab yaa bàn̄ báà ŋma fōō u-tinjandee ní timbi ń nīn gítiń ti-cee. 19Ama timbi kaa dāa gíti cáá kí fōō tiba kitiŋ kin a làá dāá tīī bíǹ lapu pu buŋgbandee poon, di sá timbi gíti dáá fōō ti-fakal doo pú buŋgbandi.» 20Ní Mooyiisi bí-bi yii: «Ni nín lī puee, ní ŋámaan míǹ. Ní bɔ́ntí kí cù kujaau, kii ti-Dindaan nín tīī mara puee. 21Bin kɔkɔ sá bininjab ki bàl̄ tijanjawanee ń dùtī Jɔɔdan buŋŋu, kii ti-Dindaan nín tīī mara puee. Bí nīn bí niin kí tin sāā ŋyunti ŋun ti-Dindaan làá jà u-nannanliibi kɔkɔ, 22ní kitiŋee nib kɔkɔ ń sìntī bi-ba ki tīī ti-Dindaanee. Boonee ni ŋūǹ kí nīn gítí ni-cee. Ŋyunti gbantee ni nyáń ti-Dindaan bɔtin, ki nyáń ni-nabiyaamu Isirayeel yab mun bɔtin, ní kitiŋ laakin ni bí nee ń kpántí ni-yaka ti-Dindaan nimbiin. 23Ama ni yaa kaa ŋá mimmee, ni ŋá ti-Dindaan ikpiti, ní ni-kpitii gbanti làá nīn pée dī-ni. 24An puee ní māmaan ni-biyaamu adiin kí mā ni-piii nì ni-ŋoobui tikpuŋkpun. Ama ní ŋá tin ni pōoǹ yii ni làá ŋée mun.» 25Ní Gaadi nì Rubeen naakɔti yab bí Mooyiisi yii: «Timbi a-tɔntɔnliibi làá ŋá kii sii ti-dindaan nín bí yii tí ŋá puee. 26Ti-nimpoobi nì ti-biyaamu nì ti-picaŋkpunti nì ti-ŋɔcaŋkpunti nì ti-naai kɔkɔ làá gbíntí Galaadi tiŋkin doo ní. 27Ní timbi a-tɔntɔnliibi ń yòon̄ ti-janjawanti kí cùú já ki nóó nì ti-Dindaan nín tīī mara puee, kii a nín lī puee.»

28Ní Mooyiisi tīī mara nee usaraaŋakpil Eeleeyasaar nì Nuuni jipɔɔn Joosuwa nì Isirayeel yab naakɔti kɔkɔ kpilib bi-pu. 29U nìn bí-bi yii: «Gaadi nì Rubeen naakɔti yab bin kɔkɔ sá bijanjaliibee yaa bāań, ní ni-kɔkɔ dūtì Jɔɔdan buŋŋu ki cūtìi jáń kii ti-Dindaan nín tīī mara puee ki fōō kitiŋee, ní dāá dū Galaadi tiŋki kí tīī-bi. 30Ama bi yaa kaa dɔ́miń ki kútì ni-pu ni jáńee, Kanaan tiŋkin ní bi làá tin yàkatī ni nì bi kɔkɔ atinjan.» 31Ní Gaadi nì Rubeen yab tí kíí yii: «Ti-Dindaan nín pée bí tí ŋá puee, míǹ ní ti làá ŋá. 32Timbi ti-ba làá yòon̄ tijanjawan kí cù Kanaan tiŋkin kí já kii ti-Dindaan nín tīī-ti mara puee. Ama timbi tinjandi din bi làá tīī-tee di sá Jɔɔdan buŋgbandi doo pú yal ní#32.32 Kpèè Joos 1.12-15..»

33Ní Mooyiisi dū Amɔɔr yab bɔtiu Siiwɔn, nì Baasan yab bɔtiu Ɔɔgi timmu, nì ntimu mun gíti bí mu-kpaanceetii ki māntìi tú-muee ki tīī Gaadi nì Rubeen naakɔtin yab, nì Jooseefi jipɔɔn Manasee naakooku dijandi yab.

34Gaadi naakookun yab nìn fātìi máń Diibɔn nì Atarooti nì Arooweer timmu, 35nì Atarooti-Soofan nì Yaseer nì Yoogeebeeya 36nì Beeti-Niimra nì Beeti-Yaran timmu. Bi nìn fātìi máń ntimu gbanti kɔkɔ ní ki máń agun ki māntìi tú-mu, ní ki máń bi-piii nì bi-ŋoobui tikpuŋkpun.

37Ní Rubeen naakookun yab fātìi máń Yeeseebɔn nì Eelalee nì Kiiriyatayiim 38nì Neeboo nì Baal-Meeyɔn nì Siibima timmu. Boonee bi dāa kpántì ntimu gbanti yiŋŋi ki pú-mu ayimpɔɔn.

39Ní Manasee jipɔɔn Makiir yab jáń nì Galaadi yab ki fōō bi-tiŋki, ní ki jìn̄ Amɔɔr yab bin nìn kóò ki-puee. 40Ní Mooyiisi dū kitiŋ gbanti ki tīī-bi bí nīn kíǹ ki kóò. 41Manasee jipɔɔn Yayiir yab nìn cūtìi jáń nì Amɔɔr timbilimmu kí fōō-mu, ní ki pú-mu diyindi yii Yayiir timbilimmu. 42Ní Noobiya cūtìi jáń ki fōō Keenaati tiŋki nì ki-timbilimmu, ní ki dū úǹ u-ba yindi ki pú kitiŋee yii Noobiya.

Currently Selected:

Nombres 32: BASSARDC

Highlight

Copy

Compare