Nombres 31
31
Isirayeel yab jáń kí pɔ́ɔkiǹ Madiyan yab
1Ní ti-Dindaan sòon̄ nì Mooyiisi ki bí-u yii: 2«Ikpiti in Madiyan yab ŋá Isirayeel yabee puee, á cùú tɔ̀-bi ipɔntoon#31.2 Kpèè Ayil 25, cilinjee 25.17-18., ní kí nín kpú kí cùú ŋàl̄ a-baabi.» 3Ní Mooyiisi bí Isirayeel yab yii: «Ni-kansikin biba ń bɔ́ntí kí cùú jáǹ Madiyan yab kí tɔ̀-bi ipɔntoon kii ti-Dindaan nín bí yii tí ŋá puee. 4Ní lēē Isirayeel yab naakooku kamaa poonee binib kutuku bí cù kujaau gbanti.»
5Ní bi lēē kunaakoou kamaa poon bijanjaliibi kutuku, ní bijanjaliibi kɔkɔ kpáfì kutukub saalaa nì bili ki bóob́ kí cù kujaau. 6Ní Mooyiisi dū Isirayeel yab naakooku kamaa nib kutuku ki tú kujaau. Usaraaŋakpil Eeleeyasaar jipɔɔn Fineeyaasi nìn céeǹ-bi ki ŋúb́ circir wanti nì dikantándi ki búǹ ki tìì-bi kujaau daanti. 7Ní bi cūtìi jáń nì Madiyan yab kii ti-Dindaan nín tùkū Mooyiisi yii bí ŋá puee, ní ki pɔ̄fì Madiyan ninjab kɔkɔ. 8Bi kūū bi-bɔtiibi biŋmoo mun: Eefi nì Reekeem nì Suur nì Yuur nì Reeba, ki kūū ki kpáaǹ Beewɔɔr jipɔɔn Balaam. 9Ní Isirayeel yab cúú Madiyan nimpoobi nì bi-biyaamu kuyuŋu, ki cúú bi-waŋkuti kɔkɔ, ní ki kóoǹ bi-gaajawanti kɔkɔ. 10Bi nìn tūū bi-diiŋŋi nì bi-kaai ŋŋmi. 11Bi nìn yōoǹ bi nín jáń ki fōoń tiŋyee, an dàkà yii binib nì tiwaŋkuti ki kpáàa búntì. 12Bi nìn cáá kɔkɔ ki cūnnì Moowaab tantakal din pìlīǹ Jɔɔdan ki túĺ Jeeriikoo tiŋkee, ki dūu dàkā Mooyiisi nì usaraaŋakpil Eeleeyasaar nì Isirayeel samaau kɔkɔ.
13Ní Mooyiisi nì usaraaŋakpil Eeleeyasaar nì Isirayeel yab kpilib nyáń dinaapaal boon ki túŋkì-bi. 14Mooyiisi nín ká mimmee ní u fōō bijanjakpilib nì adican kpilib nì bikpootiliibi bin kɔkɔ nìn cūtì kujaau gbantee pu diŋuul. 15U bí-bi yii: «Ba pu ní ni yāntì binimpoobi kaa kūū-bi? 16Nimbi ni-ba nyí yii Peewɔɔr bɔti poonee, Madiyan nimpoobi gbanti ní Balaam nìn sáŋkì bi kíil̀ Isirayeel yab ki tɔ́ tilaakpaal poon. An di dāa yāntì ti-Dindaan dáaĺ Isirayeel yab tafal ŋkpitim pu. 17Ní kpɔ̀ mbininjabiyaamu kɔkɔ, kí kpɔ̀ binimpoobi bin béè bininjabee kɔkɔ kɔŋkɔnnee. 18Ama ní taa kpɔ̀ nsapɔmbiyaamu mun kaa láá béè bininjabee, ní yàntī bíǹ ń nīn bí kí tīī-ni. 19Ni-kansikin bin kɔkɔ kūū unil kujaaun àá ki gbēē utaŋkpiilee ń nyā kí nīn bí dinaapaal boon iwiin iluli, kí ŋá akoobil winta dal nì winluli dal ní kí fàtīí kpántí circir. Mara gbanti sá ki tīī nimbi nì bin kɔkɔ ni cúuń kuyuŋuee ní. 20Ní ŋá abɔkuti nì igban nì tiŋɔkuti wanti nì idɔ wanti kɔkɔ circir.»
21Ní usaraaŋakpil Eeleeyasaar bí bijanjaliibi bin kɔkɔ cūtì kujaauee yii: «Kpèèmaan mara un ti-Dindaan nìn tīī Mooyiisi u ŋmàn̄ ki yóoǹee sèé: 22<Tiwan tin kɔkɔ sá sindaariya nì animbil kúti nì tasa nì tikúti nì tikúpinee, 23tiwan tin kɔkɔ kaa wù ŋŋmee, ní dū ŋŋmi kí fùuǹ-tì ní tí kpántí circir, kí dū nnyim min lèekī ikpitee kí dūú cántí-tì. Ama tin ŋŋmi wùee, ní dū tíǹ ki ŋá nnyim gbantin kí fíntí ní tí kpántí circir wanti. 24Ni yaa fíntì ni-bɔkutiŋ iwiin iluli dalee, ni kíǹ ki bí circir dee, mimmee ni ŋūǹ kí fàtīí gítí dinaapaal pu.»
Bi nín jáń ki fōoń tiwan tiŋyee yàkatitam
25Ní ti-Dindaan bí Mooyiisi yii: 26«Sii nì Eeleeyasaar nì adican kpilib, ní kàaǹ ni nín jáń ki fōoń binib bin kuyuŋuee nì tiwaŋkuti kɔkɔ. 27Ní cúú binibee nì tiwaŋkutee kí yàkatī mili pu, kí dū dijandi diba kí tīī bijanjaliibi bin cūtì kujaauee, ní kí dū dijandi din kíǹee kí tīī samaa kɔkɔ. 28Binib alaataa aŋmoo kamaa puee, á lēē unil ubɔ kí pà man bi-Dindaan, ní kí lēē tiwaŋkuti mun alaataa aŋmoo kamaa pu kubɔ, an dàkà yii inaa nì ipii nì iŋoobu. 29Bi yaa lēē bi-jandi poon tin sá man yatee ki tīī-mee, á dūú tīī usaraaŋakpil Eeleeyasaar. 30Samaa wanti puee, á lēē binib imuŋku ili nì saalaa kamaa pu unil ubɔ, ní kí lēē tiwaŋkuti mun imuŋku ili nì saalaa kamaa puee kubɔ, an dàkà yii inaa nì ipii nì iŋoobu. A yaa fōōyee á dūú tīī Leefii yab bin bí man circir kɔŋkooŋŋu poon ki tūǹ atuunee.»
31Ní Mooyiisi nì usaraaŋakpil Eeleeyasaar ŋá kii ti-Dindaan nín bí yii bí ŋá puee. 32Bi nín nìn cúú tin kujaaunee, tin kíǹ bi cáańee nyɔkɔm sɔ̀. Ipii nì iŋoobu nìn sá kutukub alaataa aluu nì kutukub biŋmoo kpá imuŋku inaa. 33Inaa nìn sá kutukub imuŋku ita nì saalaa nì bili. 34Mmamu nìn sá kutukub imuŋku ita nì kutuku ubɔ. 35Bisapɔmbi bin kaa nyí bininjabee nìn sá kutukub mmuŋku nì saalaa nì bili. 36Dijandi din bi nìn lēē ki tīī bin cūtì kujaauee nìn sá ipii nì iŋoobu kutukub alaataa ata nì kutukub bita kpá imuŋku ili nì alaataa aŋmoo. 37Bi nìn lēē tiwaŋkuti gbanti poon alaataa aluu nì tiŋmoo kpá imuŋku inaa ki pàn̄ ti-Dindaan. 38Inaa nìn sá kutukub binaa kpá imuŋku ili, ní bi lēē imuŋku ita nì saalaa nì ili ki pàn̄ ti-Dindaan. 39Mmamu nìn sá kutukub mmuŋku nì saalaa nì alaataa aŋmoo, ní bi lēē imuŋku ita nì kiba ki pàn̄ ti-Dindaan. 40Binib nìn sá kutukub saalku nì ubɔ, ní bi lēē binib mmuŋku nì saalaa nì bili ki pàn̄ ti-Dindaan. 41Ní Mooyiisi fōō tin bi pàn̄ ti-Dindaanee ki dūu tīī usaraaŋakpil Eeleeyasaar, kii ti-Dindaan nín bí ú ŋá puee. 42Dijandi din Mooyiisi nìn lēē ki tīī bijanjaliibee nì din nìn kíǹ u dūu tīī samaayee nìn ŋmà ní. 43Dijandi gbanti nìn sá ipii nì iŋoobu kutukub alaataa ata nì kutukub bita kpá imuŋku ili nì alaataa aŋmoo. 44Inaa nìn sá kutukub binaa kpá imuŋku ili. 45Mmamu nìn sá kutukub mmuŋku nì saalaa nì alaataa aŋmoo. 46Binib nìn sá kutukub saalku nì ubɔ. 47Mooyiisi nìn lēē samaa jandi poonee binib imuŋku ili nì saalaa kamaa puee unil ubɔ, ki lēē tiwaŋkuti pu mun míǹ ki tīī Leefii yab bin bí ti-Dindaan circir kɔŋkooŋŋun ki tūǹ atuunee, kii ti-Dindaan nín nìn bí yii ú ŋá puee.
Nlammɔntiim saraau
48Bijanjakpilib bin nìn kpōotì ajanjakiti kutukub kutukubee nì bin nìn kpōotì ajanjakiti alaataa alaataayee nìn dɔ́miń ki ká Mooyiisi, 49ní ki bí-u yii: «Ti nín kàan̄ ti-janjaliibi bin ti kpōotì kujaaunee, ti ká yii bi-kansikin báà ubɔ kaa fɔ́tì. 50An pu ní ti cáań tiwampɔkaal kí ŋá ti-Dindaan saraa ú fíntí-ti kí nyāntí ti-jɔkɔntin. Ti cáań sindaariya wanti, an dàkà yii abɔmbil nì mbɔmbiyaamu nì falfatib nì tiléeŋkaal tin báà ŋma kánní kujaaunee.»
51Ní Mooyiisi nì usaraaŋakpil Eeleeyasaar fōō sindaariya wantee bi-ŋaan. 52Bijanjakpilibee nín nìn cáań sindaariya wanti tin ki ŋá ti-Dindaan saraayee nyiŋfiŋu nìn sá kiiloobi dilaataal nì imuŋku ita nì saalaa ní. 53Bijanjaliibi ŋwaamuee kaa nìn cáań tin bi kánní kujaaunee ki tīī, bi nìn dūu kpáafì bi-ba ní. 54Ní Mooyiisi nì usaraaŋakpil Eeleeyasaar fōō bijanjakpilibee cee sindaariya wanti, ní ki cáa kɔ́ǹ circir kɔŋkooŋŋu poon ti-Dindaan nimbiin, án nín làá ŋá pu ú taa súntí Isirayeel yab puee.
Currently Selected:
Nombres 31: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
