Judith 7
7
Ooloofeerni māntìi tú Beetulii tiŋki kí jáǹ-kì
1Kutaa wúntèe ní Ooloofeerni tīī u-janjakitil kɔkɔ nì bijanjaliibi bin kɔkɔ dɔ́miń kí tūtuǹ-uee mara yii bí kíĺ Beetulii saŋŋu kí cùú kíntí isan in bi dì ki jɔ́ḿ ajoon pu tiŋkee kí kíĺ Isirayeel yab kujaau. 2Ŋwiin gbantee, bininjab bin kɔkɔ nìn pée ŋūǹ kí já kujaauee nìn cúú nsan. Bijanjaliibi bin nìn còom̄ ataayee nìn kpáfì binib kutukub dilaataal nì imuŋku ita nì saalaa, ní bitanjakaliibi nìn nyáń binib kutukub saalaa nì bili. Baa nìn kàan̄ tiwan tin bi nìn túee nì bin nìn kpèé tiwan gbantee ki kútì, ní an dūu ŋá kuniwaawiiu. 3Bi nìn ŋātì bi-naapaal ditantakal din pìlīǹ Beetulii tiŋkee, dinyimbunimbil caŋin. Bi nìn kpátìi gbí kitiŋ kin dɔ̄ kí yòon̄ Dootayiim kí cáá sāā Beelbayiim, ní kí yòon̄ Beetulii kí cáá sāā Kiyamɔn tiŋki kin bí Eesdreelɔn nyɔkɔpuee. 4Isirayeel yab nín ká kuniwaawiiu gbantee, ní bi-wunti kíĺ ki bíi gbáà kpàkpakpa ní bi kíĺ ki bíi lì tɔb cee yii: «Binib nee làá nàan̄ kitiŋ kɔkɔ ní. Bi-wíiŋŋu làá yàntī ajoofɔkɔ nì atantaka nì ŋgbantamu ń bɔ̀tī!»
5Báà ŋma nìn yōoǹ u-janjawanti ní ki kpāā ŋŋmi bi-difɔkɔŋi ŋin pɔ̄ɔ̄yee yilpu ní ki bɔ́ntì ki kíǹ ki kā ki cí kunyeeu gbanti kɔkɔ. 6Kutaa wúntèe Ooloofeerni nyántì bitanjakaliibi ki gbāaǹ Isirayeel yab bin kóò Beetulii tiŋkinee nimbiin. 7U nyàab̄ isan in bi dì ki cá kitiŋinee, ki yìin̄ ki kpēē laakin nnyim bí bée ní ki fōō niin. U nìn nyàab̄ bijanjaliibi ki cíitì niin ní úǹ u-ba nín gítí u-yab cee. 8Eesayuu yab kpilib kɔkɔ nì Moowaab yab kpilib nì bin kóò Meediiteeranee tiŋkugbandee janjakpilib sútìi pìl̄-u ní ki bí yii: 9«Ukpil, a yaa bàà kíikí kí pīlifiǹ-ti, a-janjaliibi kansikin báà ubɔ kaa bàà làá kpú. 10Isirayeel yab kaa máká bi-kpammu pu, ama bi-joofɔkɔŋi ŋin pu bi kóòyee pu ní bi máká#7.10 Dūú ŋmàntī nì 1 Bib 20.23.. Di sá yii an kaa sá sɔkɔmii unil ń ŋmā kí jɔ̄m̀ kí bà bi-jooŋŋi gbanti yilpu. 11Too ukpil, á taa jáǹ-bi kii kujaau kun poon binib túĺ tɔb ki jáàyee, mimmee a-janjaliibi kansikin báà ubɔ kaa làá kpú. 12Gbíntí a-naapaal pu kí wúń a-janjaliibi pu ní kí yàntī a-tɔntɔnliibi ń fōō anyimbulnimbil ŋin nyēē dijool taapuee kí nīn kpèé. 13Di sá yii niin ní Beetulii yab kāntí nnyim ki nyù. Nnyinnyoo yaa píĺ-bee, bi làá dū bi-tiŋki kí tīī. Ní timbi nì ti-naacimbi ń jɔ̄m̀ ajoon ŋin pìlīǹ-bee yilpu, ní kí yàntī binib ń nīn cí án nín làá ŋá pu ubɔ ń taa ŋmā kí nyā kitiŋinee. 14Bi nì bi-nimpoobi nì bi-biyaamu làá kpú ŋkùm. Kí wàatī tí jáǹ-bee, bi làá kpú ní kí nīn dɔ̄ bi-tiŋki daŋŋi pu fìlfil. 15Á dāá dáaĺ bi-tafal ŋkpitim pu, kun puee bi yíkìi jáń nì si kaa dɔ́miń a-cee kí gbàam̀-si nì ŋgbansɔŋfi.»
16Ooloofeerni nì u-janjakpilib kɔkɔ nìn fōō tin bi nìn sòon̄ee, ní ki tīī mara yii bí ŋá bi nín lī yii bi làá ŋá puee. 17Amɔn yab janjaliibi nì Asuur yab janjaliibi binib kutukub biŋmoo nìn cūtìi ŋātì ditantakalin dinaapaal ki kāl̀. Bi nìn fōō Isirayeel yab kpiŋyi nì bi-nyimbulnimbiliŋ. 18Eesayuu yab nì Amɔn yab nìn jɔ́m̀ ki ŋātì bi-naapaal ajoon tiŋki pu, Dootayiim nyɔkɔpu. Bi nìn lēē bi-kansikin biba ki tú ŋgiil pú nì ŋwìiń jeetilaŋki pú Eegreebeel nyɔkɔpu ki pìlīǹ Kuusi tiŋki kin bí Mɔkimuur bùmbiki gbandee. Asuur yab janjaliibi bin kíǹee nìn ŋātì bi-naapaal ditantakalin ní ki gbáb́ ki bīiǹ kitiŋ kɔkɔ pu. Bi nín nìn ŋātì dinaapaal ki gāā bi-tantib ki bíl̀ bi-waŋguliŋee nìn wāā tikpil, di sá yii bi nìn wīikí an kaa cáá bí lì. 19Isirayeel yab nìn kúuǹ ki yíiń ti-Dindaan bi-Nimbɔtiu, di sá yii bi-wunti nìn yɔ̄tì. Bi-nannanliibi nìn māntìi tú-bi ní laaba kaa nìn bí bí ŋmā kí sāǹ kí ŋmátí. 20Asuur janjaliibi kɔkɔ, bi-janjaliibi bin còom̄ ataayee nì bi-janjatɔrɔkub nì bi-tanjakaliibi nìn māntìi tú Isirayeel yab iwiin iluu kpá imuŋku ili ní.
Oosiyasi tīī Beetulii yab kunyannyaau
Beetulii yab kɔkɔ nìn ká yii nnyim min bi nìn lúń ki kpáafèe bíi dóotí. 21Bi nín gbìn̄ abɔbil ŋin ki ŋàl̄ ki sītì nnyimee kaa ti cáá nnyim ní binib kaa nìn gíti nyù nnyim kí báĺ ŋwimbambaanti, di sá yii bi nìn ŋmàntī nnyim ní. 22Mbiyaamu nìn pɔ̄fiǹ, ní binimpoobi nì binipɔmbi gīī púb nnyinnyoo pu. Bi nìn lítì ki dɔ̄ dɔ̄ asaŋkaŋkpil nì kitiŋ punyɔmmu caŋin. Baa nìn gíti cáá mpɔn báà fiii. 23Samaa kɔkɔ, binipɔmbi nì binimpoobi nì mbiyaamu nìn kóoǹ ki kpáfì Oosiyasi nì kitiŋ kpilib cee. Bi nìn kúuǹ mpɔn ní ki lī bikpilib kɔkɔ nimbiin yii: 24«Unimbɔti ń nīn sá nimbi nì timbi kansikin ubɔsoonli. Di sá yii díǹ nee, ni kɔ́ǹ-ti digìŋ́kpaandin ni nín kaa cūtì Asuur yab cee ki sòon̄ nì bi nì ŋgbansɔŋfee. 25Kɔŋkɔnnee, ubɔ kaa bí kí dāá jòoń-ti. Unimbɔti dū-ti ki ŋá bi-ŋaan tí kpú nnyinnyoo nì falaakpaan poon bi-nimbiin. 26Ní yíiḿmaan Ooloofeerni yab nì u-janjakitil kí dū kitiŋ kí tīī-bi bí fūkul̀. 27An sɔ́ tí kpántí bi-sarkadambi ki jítiǹ tí kpú nnyinnyoo. Ti làá kpántí iyumbu, ama ti làá nīn bí dimaŋfalin#7.27 ti làá nīn bí dimaŋfalin: dūú ŋmàntī nì Disa 14.12. ní kaa làá ká ti-bipɔmmu nín làá kpú pueeyaaa, kaa làá ká ti-nimpoobi nì ti-biyaamu nín làá sìntī puee. 28Ti dū kutagbɔŋu nì kitiŋ ki gbāam̀-ni, ki dū ti-Nimbɔtiu, ti-baabi Dindaan un di dátí ti-tafal ti-yìntitam nì ti-baabi kpitii puee ki gbāam̀-ni díǹ yii ní ŋá kí nóó nì anyɔɔbun nee.»
29Bi-kɔkɔ nìn kíĺ ki bíi yáliŋkí mpɔn dicilpu samaa kansikin. Bi nìn kúuǹ ki yíiń ti-Dindaan mpɔn. 30Oosiyasi nìn bí-bi yii: «M-nabiyaamu, kámaan kunyannyaau. Tí gíti pɔ́ɔǹ iwiin iŋmoo kí kūtì. Iwiin iŋmoo gbanti poonee, ti-Dindaan ti-Nimbɔtiu làá sɔ̄ ti-saai. Di sá yii waa làá dū-ti kí fá kɔkɔ. 31Ama iwiin gbanti yaa jítì ní taa ká dijòońdee, m làá ŋá kii ni nín lī puee.»
32Míǹ boonee ní Oosiyasi yāntì samaa yàl̄ ki búntì laakin bi bàà yúee. Biba nìn gítì agun pu ní biba mun nín jɔ́ḿ sintil difɔkɔŋi pu ki cí. U nìn yāntì binimpoobi nì mbiyaamu nín kóò bi-diiŋŋin. Kitiŋin nib kɔkɔ wunti nìn yɔ̄tì.
Currently Selected:
Judith 7: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.