Judith 6
6
1Binib bin nìn bí ki māntìi tú bin bíi ŋáań dikpafilee nín gbūkum̀ ki dāa ŋmíl̀ee ní Asuur yab janjakpiliu bí Akiyɔɔr binicambee kɔkɔ nì Moowaab yab kɔkɔ nimbiin yii: 2«Sii Akiyɔɔr, ŋma ní a sá? Ní nimbi bin dū ni-ba ki nyáfiǹ Isirayeel yabee, ni sá bilab ní ki sòon̄ nì ti díǹ kii Unimbɔti bɔnaatiliuee ki bí-ti yii tí taa cùú jáǹ Isirayeel yab, kun puee bi-Nimbɔtiu làá wúń bi-pu? Ŋma di gíti sá unimbɔti, an yaa kaa sá Neebukadineesaar? Úǹ di làá tɔ̄ u-janjaliibi bin cáá mpɔnee ní bí cùú kúntí-bi kitiŋ pu, ní bi-Nimbɔtiuee kaa làá kpáàa ŋmā kí fīī-bi. 3Ama timbi a-tɔntɔnliibi, ti làá já kí pɔ̄ɔkiǹ-bi kii bi sá unibambaantee ní, baa làá ŋmā kí yūĺ ti-taamui pɔŋŋu nimbiin. 4Di sá yii ti làá kóoǹ-bi kí kpāfì ní kí wà-bi ŋŋmi. Bi-jooŋŋi làá nyɔ̀ bi-fatikuu ní kí gbí, ní bi-nikpiliŋ ń kpátí kí gbí bi-tantakaŋin. Baa làá pée ŋmā kí yūĺ ti-nimbiin ní, ama bi làá kpú ní kɔkɔ múb. Ubɔti Neebukadineesaar, kitiŋ kɔkɔ pu dindaan nín sòon̄ míǹ. U sòon̄ ní tin u yaa sòon̄ee kaa gbíntí fám. 5Sii Akiyɔɔr, uamɔnja un binannanliibi dée, díǹ nee a sòon̄ kii unil un nyēē binib boonee nín sòoǹ puee ní. Too aa làá ti wāl̀ m-nimbiin kí yòon̄ díǹ kí cáá sāā ŋyunti ŋun m yaa láa tɔ̀n̄ dinibul din sáǹ Eejipiti tiŋkinee ipɔntoon ki dóòyee. 6M yaa láa fātìi gítìńee, m-janjaliibi nì m-janjakpilib làá dāá dū ntàataajimu nì ŋkpamu ní kí sàatì a-takakalii, ní á dāá lítí bin fōō tiweendee kansikin. 7M-tɔntɔnliibi làá dāá cùnnì-si ajoon tiŋkin ní bí dāá dū-si kí bíĺ ntiŋkpaamu mun bí ajoon tikiŋŋi puee kiban. 8Niin ní a làá nīn bí kaa làá kpú kí nīn cí si nì bi ń dāá kpú dicilpu. 9Kii a nín máká a-pɔbilin yii baa làá cúú-bi kuyuŋuee, taa kɔ́ kunimbaaun. M sòon̄ ní tin m sòon̄ee, tiba kaa làá gbíntí fám kaa ŋá míǹ.»
10Niinee Ooloofeerni tīī u-tɔntɔnliibi bin nìn yú u-tantiunee mara yii bí cúú Akiyɔɔr kí cáá-u kí cùnnì Beetulii kí dū-u kí ŋá Isirayeel yab ŋaan. 11U-tɔntɔnliibee nìn cúú-u ki cáá-u ki nyántì dinaapaal kpaanceetiŋu ditantakal watil pú. Bi yíkì niinee ní ki dūu túĺ ajoon watil ní ki cūtìi nyáń anyimbulnimbil ŋin bí Beetulii taapu púee. 12Binib bin nìn kóò kitiŋ kin bí dijool yilpu kúntí kuntee nín wál̀-bee ní bi yōoǹ bi-janjawanti ní ki nyáń kitiŋee poon. Bininjab kɔkɔ nìn ŋúb́ tijaataafun ki tòó-bi ataŋkpee kaa púb́-bi nsan bí ŋmā kí dàb̄. 13Bi nìn fātìi gítì bi-boon dijool taapu ní ki bóob́ Akiyɔɔr ki yāntì-u dijool taapu kitiŋ niin, ní ki nín gítí bi-dindaan cee. 14Ama Isirayeel yab nìn nyáń bi-tiŋkin ki kpákatì ki bāań Akiyɔɔr cee. Bi nìn bútì-u ki cáá-u ki cūnnì Beetulii ní ki dū-u ki dàkā bi-tiŋki bɔtiibi. 15Bíǹ di sá Miika jipɔɔn Oosiyasi un sá Simeeyɔn naakookunee nì Ootiniyeel jipɔɔn Kabrii nì Meelkiyeel jipɔɔn Kaarmiisi. 16Bi nìn yíiń kitiŋ kpilib kɔkɔ. Binipɔmbi nì binimpoobi nìn sáń ní ki dòoń dikpafil. Bi nìn dū Akiyɔɔr ki síiǹ samaa kɔkɔ kansikin ní Oosiyasi bālifì-u tin di jítèe. 17Akiyɔɔr nìn kíí-bi ki máafì-bi tin bi sòon̄ Ooloofeerni nín yíiń dikpafil diŋyee poonee, nì tin úǹ u-ba sòon̄ Asuur yab kpilib ceeyee nì tilambibɔti tin Ooloofeerni sòon̄ Isirayeel yab puee. 18Niinee samaa kɔkɔ tātìi gbāaǹ Unimbɔti nimbiin, bi-yigbeeŋi cìb̄ kitiŋ ní bi kúuǹ mpɔn ki lī yii: 19«Ti-Dindaan, yilpu Nimbɔtiu, kpèè ti-nannanliibi nín cáá dilambil puee#6.19 ti-nannanliibi nín cáá dilambil puee: dūú ŋmàntī nì 2 Bib 19.4,16, Atuun 4.29.. Sɔ̄ a-nibul din bi kpēē ki sīŋkiǹ nee saai. Fàtī a-nimbiin kí túĺ bin sá a-yab nee díǹ wiiŋŋu.»
20Bi nìn ŋméeǹ Akiyɔɔr ní ki pàkā-u tikpil. 21Oosiyasi nìn yōoǹ-u samaa kansikin ki cáá-u ki cūnnì u-dumpu ní ki nìn ŋá tican ki yíiń bikpilib bí jī. Bi nìn kúuǹ ki yíiń Isirayeel Nimbɔtiu kunyeeu gbanti kɔkɔ yii ú jòoń-bi.
Currently Selected:
Judith 6: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.