Judith 8
8
Judiiti nín sòon̄ puee
1Ŋwiin gbantee, Judiiti nìn gbìl̄ tin di nìn jítèe. U nìn sá Ɔkisi jipɔɔn Meerarii bisal ní. Ɔkisi nìn sá Jooseefi jipɔɔn, ní Jooseefi sá Usiyeel jipɔɔn, ní Usiyeel sá Eelikiya jipɔɔn, ní Eelikiya sá Ananii jipɔɔn, ní Ananii sá Geedeeyɔn jipɔɔn, ní Geedeeyɔn sá Rafayiin jipɔɔn, ní Rafayiin sá Akitoob jipɔɔn, ní Akitoob sá Eelii jipɔɔn, ní Eelii sá Eelikiya jipɔɔn, ní Eelikiya sá Eeliyaab jipɔɔn, ní Eeliyaab sá Natanayeel jipɔɔn, ní Natanayeel sá Salamiyeel jipɔɔn, ní Salamiyeel sá Sarasadaayi jipɔɔn, ní Sarasadaayi sá Isirayeel jipɔɔn. 2Bi yíì u-cal Manasee. U nì u-cal nìn pēē kunaakoou nì mmaal, ní úǹ kpíì ŋyunti ŋun bi bíi cēē ɔɔjee. 3U nìn bíi kpèé bi nín bíi bōob̀ ajimbɔn pu kusaaunee, ní ŋwìiń gbáń u-yil ní bi cáań-u ki bíl̀ u-lambaŋki pu ní u kpíì Beetulii, u-tiŋkin. Bi nìn síb́-u ki ŋàl̄ u-baabi kusaau kun dɔ̄ Dootayiim nì Balamɔn kansikinee poon ní. 4Judiiti nìn kā dikpiipool abin ata nì iŋmal inaa ní ki nìn kóò u-dumpu. 5U nìn gāā kibiŋ u-diiku yilpu. U nìn dū kutuku ki gbìn̄ u-caŋ ní ki lōō tikpiipuwan. 6Kí yòon̄ daliŋkin u-cal kpíìyee, u pée bōob̀ kinyɔkɔ ní baabadal, asee iwiŋŋuŋfikaa nì kutaa ń wúntí iwiŋŋuŋfikaayee nì uŋmapeekaa wimpeekaaŋu nì kutaa ń wúntí-ŋuee, ki kpáaǹ Isirayeel yab jiŋaalib wiiŋyi nì bi-faalii wiiŋyi. 7U nìn ŋān̄ kunyaaŋŋu ní ki nìn bí gbàlgbal. U-cal Manasee nìn kpíì ki yāntì-u sindaariya nì animbil nì bitɔntɔnliibi bininjab nì binimpoobi nì tiwaŋkuti nì tikpaatan. Úǹ di nìn kpèé u-gaajawanti gbanti kɔkɔ. 8Ubɔ kaa nìn ŋūǹ kí ká tibɔkpitil tiba kí sòoǹ u-pu, kun puee u nìn sá unimpu un di fàŋkí Unimbɔtee ní.
9U nìn gbìl̄ nnyim nín kpá samaa wunti yɔ̄tì bi sòon̄ bikpilib pu tibɔfan tiŋyee. U nìn gíti gbìl̄ mun tin kɔkɔ Oosiyasi nìn sòon̄, ŋyunti ŋun u nìn pūtì ki lī yii, iwiin iŋmoo boonee, u làá dū kitiŋ kí tīī Asuur yabee. 10U nìn tú u-tɔntɔnliu unimpu un nìn kpèé u-gaajawanti kɔkɔee ú yíiń Oosiyasi nì Kabriisi nì Kaarmiisi bin sá u-tiŋki kpilibee.
Judiiti nì Beetulii kpilib nín sòon̄ puee
11Bikpilibee nìn bāań u-cee ní u bí-bi yii: «Beetulii yab kpilib, pīlifìmaan-mi, di sá yii tin ni sòon̄ samaa nimbiin díǹ nee kaa kítì. Ni pūtì Unimbɔti ki lī yii, iwiin iŋmoo boon, ti-Dindaan yaa kaa jòoń-nee, ni làá dū kitiŋ kí tīī ti-nannanliibi. 12Nimbi di sá bilab ní kí cɔ̄ŋkì Unimbɔti díǹ ní kí fōō Unimbɔti paaŋŋu nnibiyaamu kansikin ní? 13Kɔŋkɔnnee ni cɔ́ŋkì ti-Dindaan Mpɔŋkɔdaan, ama ni pée kpá kí béé u-landɔkɔi jaanjaan. 14Di sá yii naa ŋūǹ kí béé kun kā unil pɔbilinee ki dāa nín nyàab̀ kí béé u nín dàkafī puee. Kin mana ní ni làá ŋmā kí kɔ́ Unimbɔtin kí nyɔ̀kɔfì kí béé úǹ un ŋá tíǹ gbanti kɔkɔee? Ni ŋūǹ kí béé u nín dàkafī puee àá tin u bɔ́ntì kí ŋéeee#8.14 Dūú ŋmàntī nì Room 11.33-34, 1 Kɔra 2.11.? Aayee, m-nabiyaamu, ní taa táká ti-Dindaan ti-Nimbɔtiu. 15Di sá yii u yaa kaa cáá nlandɔkɔ kí jòoń-ti iwiin iŋmoo poonee, u cáá mpɔn kí mɔ̄tì ti-pu ŋwiin ŋun u yaa lèe, àá kí kpɔ̀ kí céetí-ti ti-nannanliibi nimbiin. 16Ama nimbee, ní taa síiń ti-Dindaan ti-Nimbɔtiu nín cáá nlandɔkɔ kí ŋá tiŋyee pu mara. Di sá yii Unimbɔti kaa bí kii unilee tí kpìin̄-u, àá kii nisaaleen tí páb́-u ú ŋá tiba. 17An puee kí nīn cí difiil ń nyānní u-ceeyee, tí yíiń-u ú dāá jòoń-ti. An yaa mɔ̄ǹ-u, u làá pīlifiǹ-ti. 18Di sá yii binib bin jítì ní timbi nín páaǹnée kí dāá sāā díǹ, báà kunaakoou àá kudicaŋu àá mmaal àá kitiŋ kiba ti-kansikin kaa bí ki jáaḿ awaa ŋin unil dū u-ŋalii ki máńee, kii an nín nìn bí pu dooooyee, 19ti-naanjab yuntiŋuee#8.19 ti-naanjab yuntiŋuee: dūú ŋmàntī nì 2 Bib 17.7-12.. An pu ní Unimbɔti nìn dū-bi ki líiǹ kujaau ní bi fúkúl̀-bi, ní bi-nannanliibi nìn jáń ki pɔ́ɔkiǹ-bi sɔ́kɔ sɔkɔ. 20Ama timbee, taa ti nyí unimbɔti ubɔ ki kútì úǹ pu. An pu ní ti máká yii waa làá fàtī u-boon kí tīī-ti, àá ú cúú u-saasɔl àá u-fiil kí páatí ti-nibooliŋu pu. 21Di sá yii bi yaa jáń ki pɔ́ɔkiǹ-ti ki fōō ti-tiŋkee, bi làá fōō Juudee tiŋki kɔkɔ mun, ní kí fūkul̀ ti-circir paaŋŋu, ní Unimbɔti làá dū ti-maŋfal ní kí pà ti yaa yāntì bi kɔ́ǹ u-diiku tijɔkɔndee. 22Atimbun ŋin poon bi làá dāá cúú-ti kí cùnnì kuyuŋuee, Unimbɔti làá yàntī ti-nabiyaamu kúm nì bi nín cúú bin ki cūnnì kuyuŋuee nì bi nín nāaǹ ti-tiŋki puee kpuulool ń gítí ti-pu. Bin làá já kí pɔ̄ɔkiǹ-tee làá nīn kíǹ ki kpèé ki sìŋkīǹ-ti ní ki sìí-ti. 23Di sá yii kuyuŋu kun poon ti làá nīn bée kaa làá kɔ́ǹ ti-kpilib isaa, ama ti-Dindaan Unimbɔti làá yàntī an kpántí icoo bɔti ní kí tīī-ti.
24«Míǹ puee tí dàkà ti-nabiyaamu yii bí nīn bí dimaŋfalinee làá nyānní ti-cee, ní tin làá bàń circir páaa laŋki nì Unimbɔti diiku nì nsaraafanee làá nyānní ti-cee. 25Kí kūtèe, tí jāam̀ ti-Dindaan ti-Nimbɔtiu yii u bíi cɔ́ŋkí-ti kii u nín nìn cɔ́ŋkì ti-baabi puee. 26Tí téetí u nín nìn ŋá Abraam puee, nì u nín nìn cɔ́ŋkì Isaaki puee nì tin kɔkɔ nìn bāań Jaakɔb Meesoopootamii tiŋki kin bí Siirii tiŋkin, ŋyunti ŋun u nìn bí ki kpàá u-na niija Laaban piiiyee#8.26 Kpèè Diny 22.1-18, 29.1–31.5.. 27Di sá yii u nìn dū-bi ki ŋá ŋŋmin kí kpèè tin di kā bi-pɔbiliŋinee, ama waa ŋá timbi míǹ, kaa dáaĺ ti-tafal. An puee ti-Dindaan gbáà bin sútí ki pìl̀-uee kí ŋmā kí kpāafì-bi ní.»
28Oosiyasi nìn kíí-u yii: «Tin kɔkɔ a sòon̄ee nyánní dipɔbil din sá dimɔntiilee poon ní, ní ubɔ kaa cáá tiba kí kpákáǹ tin a sòon̄ nee. 29Di sá yii an kaa sá díǹ baba ní a lēē a-nyil ki páaǹ mpaampiin pu. Ama doooo a-biyatin ní samaa kɔkɔ dáań ki ká a nín cáá iciin puee nì tin nyēeń a-pɔbilinee nín cáá kunyampoou puee. 30«Ama nnyinnyoo di cúú samaa tikpil ní ki yāntì ti ŋá kii ti nín sòon̄ nì bi pu ki pūtèe. Kɔŋkɔnnee see tí ŋá kii ti nín pūtì ki pōoǹ puee. 31Míǹ puee, mèè kí tīī-ti, di sá yii a sá unimpu un yú nì Unimbɔti deedeeyee ní. Ti-Dindaan ń yàntī utaa ń nì kí gbéeǹ ti-nyimbɔbiliŋ ŋin ti gbìn̄ ki ŋàl̄ee ní nnyinnyoo ń taa kpɔ̀-ti.»
32Judiiti bí-bi yii: «Pīlifìmaan-mi, m làá ŋá tiba ní ti-biyaamu làá dāá nìn sòoǹ an pu ki tùkù bin làá dāá páań bi-boonee abin abin. 33Ní nīn yúmaan kipunyɔkɔpu kunyeeu nee, man nì m-tɔntɔnliu unimpu làá nyā. Ama kí wàatī ŋwiin ŋun ni síiǹ kí dū kitiŋ nee kí tīī ti-nannanliibee ń bàńee, ti-Dindaan làá dī m-pu kí jòoń Isirayeel yab. 34Ama ní taa bàlifì-mi kí béé tin m làá ŋée, di sá yii maa làá tùkù-ni tiba kí cáá sāā ŋyunti ŋun ní m làá dóó tin m làá ŋée.» 35Ní Oosiyasi nì bikpilibee bí-u yii: «Nín̄ cá nì ŋgbansɔŋfi ní ti-Dindaan Unimbɔti ń nīn līī a-nyɔkɔpu á tɔ̀ ti-nannanliibi ipɔntoon.» 36Bi nyáń Judiiti bìŋ́kinee ní ki nín gítí bi-paaŋyi pu, laakin bi bàà yú ki cée.
Currently Selected:
Judith 8: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.