Judith 5
5
Ooloofeerni kpáfì dikpafil
1Bi nìn dɔ́miń ki tùkū Asuur yab janjakpiliu Ooloofeerni yii Isirayeel yab bíi bɔ́ntí kí já kujaau, ní ki nìn dū ajoon pu saŋyi ki pīiǹ, ki nìn máń agun ki māntìi tú ajoofɔkɔ yilpu ní ki nìn píĺ píĺ titalindi kitiŋ kin tèen̄ee pu. 2Niinee ní u fōō mbum ŋkpitim pu ní ki yíiń Moowaab yab kpilib nì Amɔn yab janjakpilib nì Meediiteeranee tiŋkugbandi timmu yab gɔminab. 3U nìn bí-bi yii: «Kanaan yab, tùkùmaan-mi, dinibul dilal di kóò ajoon tiŋki pu gbanti ní? Ntiŋkpaamu mulɔmu ní bi kóò ní? Bi-janjakitil wíiŋŋu sá mana? Bi-pɔŋŋu nì bi-kpabil nyánní la ní? Ŋma di sá bi-bɔtiu un di kpòotī bi-janjakitilee ní? 4Ba pu ní bi yíì kaa dɔ́miń kí tūŋkiǹ-mi kii anibul ŋin kɔkɔ bí ŋwìiń jeetilaŋki púee nín ŋá puee ní?»
Akiyɔɔr nín sòon̄ puee
5Amɔn yab kɔkɔ bɔtikpaaŋwu Akiyɔɔr kíí-u yii: «M-dindaan, pīlifì tin làá nyā man a-tɔntɔnliu nyɔkɔnee. M làá sòoǹ nì si nì ibaamɔn tin m nyí dinibul din kóò ajoon pu tiŋkin ki pìlīǹ-si nee bɔti. Nnyimɔn kaa làá nyā man a-tɔntɔnliu nyɔkɔn. 6Dinibul gbantee sá Caldee yab naantiibi biba ní. 7Bi nìn péé péé ki kāl̀ Meesoopootamii ní, kun puee baa nìn là kí nīn jáaḿ bi-baabi waaŋi ŋin nìn bí Caldee tiŋkinee. 8Bi nìn dū bi-naanjab saŋŋu ki fá ní ki jáaḿ yilpu Nimbɔtiu, Unimbɔti un ní bi nìn béèyee. Bi nìn jìn̄-bi ki wāatì bi-waaŋi ní bi nìn sáǹ ki kɔ́ Meesoopootamii ní ki kāl̀ niin an yúntì. 9Bi-Nimbɔtiu nìn tùkū-bi yii bí nyā laakin bi kóò gbantee kí fàtīí gítí Kanaan tiŋkin. Bi bàn̄ niinee ní ki kāl̀ ní ki ká sindaariya nì animbil nì tiwaŋkuti tikpil#5.9 Kpèè Diny 11.31–12.5, 13.2.. 10Bi nìn sīntì Eejipiti tiŋkin, di sá yii ŋkùm miba nìn nyáń Kanaan tiŋki kɔkɔ pu#5.10 Kpèè 46.6-7, 47.11-12.. Bi bàn̄ niinee ki gbíntì ki kāl̀ ní ki ŋmátì. Bi bí niin mimmee ní ki dūu būtì ki ŋá dinibul din nib baa ŋūǹ kí kàaǹee. 11Ama Eejipiti bɔtiu nìn yíkì ki bíi jáà nì bi. U nìn ŋá nciin kí ŋmā kí wɔ́b́-bi nì brikisib mātam. U nìn sīntì-bi taapu ní ki dū-bi ki kpántì iyumbu#5.11 Kpèè Disa 1.10-14.. 12Bi nìn kúuǹ ki yíiń bi-Nimbɔtiu, ní úǹ dū iween in kaa cáá nnyɔkɔee#5.12 iween in kaa cáá nnyɔkɔee: Kpèè Disa 7.14–12.41. ki tɔ́ bi-pu. An puee Eejipiti yab dāa jìn̄-bi ní ki wāatì bi-ba. 13Unimbɔti nìn yāntì Tikati mɔɔl fóotì bi-nimbiin#5.13 Kpèè Disa 14.12-22. 14ní u kpōotì-bi ki dī Siinaayi jool nì Kadeesi Barneeya tiŋki saŋŋu pu. Bi nìn jìn̄ bin kɔkɔ nìn kóò kuteeunee, 15ní ki dɔ́miń ki kāl̀ Amɔɔr yab tiŋki pu. Bi nìn kūū ki céetì Eesbɔn yab#5.15 Eesbɔn yab: kpèè Dikà 21.25-30.. Bi nín dūtì Jɔɔdan buŋŋuee ní bi fōō ajoon pu tiŋki kɔkɔ. 16Bi nìn jìn̄ Kanaan yab nì Peeriisi yab nì Jeebusi yab nì Siikeem yab nì Giirgaasi yab kɔkɔ ki fōō bi-tiŋki. Bi kɔ́ niin an yúntì. 17Bi yaa kaa nìn yīntiǹ bi-Nimbɔtiuee, bi pée bí dipɔɔpindin ní, di sá yii Unimbɔti un bí bi-ceeyee ná ikpiti ní#5.17 Kpèè Ditee 28.1-14.. 18Ama bi yaa nìn kākatì bi-ba ki wāatì nsan ŋun u nìn cátì ki bíl̀-bee, bi nìn kù-bi tikpil tijáti kupaau poon ní kí cúú-bi kí cùnnì kuyuŋu kitincaŋin. Bi-nannanliibi nìn gbáń ki wīī bi-Nimbɔtiu diiku, ní ki fōō bi-tiŋkpaammu ki kíǹ ki kóò. 19Too kɔŋkɔnnee, bi nín fātìi gítìń bi-Nimbɔtiu ceeyee, ní bi yíkìń ntimu mun poon bi nìn yàl̄ ki kɔ́ee ki gítì bi-dumpu. Bi fātìi fōō Jeerusaleem, laakin bi-Nimbɔtiu diiku bée ní ki kɔ́ ajoon pu tiŋki, di sá yii báà ubɔ kaa nìn bí ŋi-pu. 20Kɔŋkɔnnee, m-kpiliu nì m-dindaan, binib nee yaa yīntiǹ bi-Nimbɔtiu ní ti yaa lafun dáań ki ká yii bi ŋá ikpitee, ti ŋūǹ kí cùú jáǹ-bi. 21Ama bi yaa kaa yīntiǹ bi-Nimbɔtiu, m gbàam̄ sii m-kpiliu yii á taa gbēē-bi. An yaa kaa sá míǹ, bi-Dindaan nì bi-Nimbɔtiu làá wúń bi-pu, ní kí kɔ́ǹ-ti icoo kitiŋ kɔkɔ nib nimbiin.»
Bi kūū Akiyɔɔr bɔti ní ki dī-u ki líiǹ Isirayeel yab
22Ŋyunti ŋun Akiyɔɔr sòon̄ ki dóòyee ní samaa un māntìi tú ujanjakpil tantiuee kíĺ ki bíi gbùkum̄. Ooloofeerni janjakpilib nì bin kɔkɔ kóò Meediiteeranee tiŋkugbandee nì Moowaab yab bí yii bí kpɔ̀ Akiyɔɔr. 23Bi bí yii: «Taa fàŋkí Isirayeel yab. Di sá yii dinibul gbanti kaa cáá mpɔn kaa cáá dikpabil kí já kujaau kun pɔ̄ɔ̄yee. 24Ukpil Ooloofeerni, ti làá cùú jáǹ-bi, ní a-janjakitiŋ làá já kí pɔ̄ɔkiǹ-bi ní sɔ́kɔ sɔkɔ.»
Currently Selected:
Judith 5: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.