Judith 4
4
Juuda yab bíi bɔ́ntí bi-ba kí já kujaau
1Isirayeel yab bin kóò Juudee tiŋkinee nìn gbìl̄ tin kɔkɔ Asuur yab bɔtiu Neebukadineesaar janjakpiliu Ooloofeerni ŋá atimbun ŋin kíǹee nì u nín fúkúl̀ bi-waadiiŋŋi ki kpéelikì-ŋi puee. 2Bi nìn fāŋkì-u tikpil tikpil, ní bi kíǹ ki bíi yáliŋkí Jeerusaleem nì bi-Nimbɔtiu Diiku pu. 3Di sá yii bi nín nyánní kuyuŋun ki fātìi gítìń#4.3 kuyuŋun ki fātìi gítìń: Eesi 1.1-4. nee, an kaa yúntì, ní bi dáá pée kóoǹ Juuda yab ki kpáfì dee. Bi nín nìn kɔ́ǹ kunimbɔtidii nì ku-sambiliŋ nì ku-saraafaŋŋu tijɔkɔndee, bi dáá fātìi dū tíǹ gbanti kɔkɔ ki sú ti-Dindaan dee. 4Niinee ní bi lēē ituun ki tú Samaarii nì Koona nì Beeti-Oorɔn nì Abeel-Mayiim nì Jeeriikoo nì Kooba nì Ayiisɔɔr nì Saleem timpiliŋki pu timmu kɔkɔ. 5Bi nìn gbáb́ ki bīiǹ ajoofɔkɔ yilpu, ki máń agun ki māntìi tú ntimbilimu mun nìn bí niinee, ní ki nyàab̄ tijin ki kpáafì kujaau pu, di sá yii bi nìn cáń bi-kpaajinti an kaa yúntì. 6Ŋyunti gbantee, Yooyakiim di nìn sá usaraaŋakpil Jeerusaleem. U nìn ŋmàn̄ kugbɔŋu ki tīī bin kóò Beetulii nì Beetoomeestayiim timmunee. Ntimu gbanti nìn bí Eesdreelɔn nyɔkɔpu ki bíitiǹ kitimpiliŋ kin pìlīǹ Dootayiim tiŋkee ní. 7U nìn bí-bi yii bí fōō dijool pu saŋyi in bi dì ki cá Juudee tiŋkinee. Isan gbanti kaa nìn wāā, an puee an nìn sá sɔkɔmii bí ŋmā kí cúú binib bin táá bili bili ki là kí jītí niinee. 8Isirayeel yab nìn ŋá kii usaraaŋakpil Yooyakiim nì Isirayeel yab tindaŋkpilib bin bí Jeerusaleemee kɔkɔ nín tīī-bi mara yii bí ŋá puee.
9Isirayeel yab kɔkɔ nìn kúuǹ ki yíiń ti-Dindaan nì bi-pɔŋŋu kɔkɔ ní ki nìn bóob́ kinyɔkɔ nì bi-pɔŋŋu kɔkɔ. 10Bininjab nì bi-nimpoobi nì bi-biyaamu nì bi-waŋkuti nì binicambi bin nìn kóò bi-puee kɔkɔ nì bi-paadambi nì bi-yumbui, bi-kɔkɔ nìn dū kutukub ní ki pēeǹ kí dàkà bi-nimbaaku#4.10 Dūú ŋmàntī nì Yoona 3.5-8.. 11Isirayeel ninjab nì binimpoobi nì mbiyaamu nì bin nìn kóò Jeerusaleemee kɔkɔ nìn gbāaǹ bi-tabiŋyiliŋ pu kunimbɔtidii nyɔkɔpu, ki dū ŋfantam#4.11 ŋfantam sá dikpool nì kunimbaau nì dibakpántil daaŋku ní. Dūú ŋmàntī nì Yeer 6.26, Dani 9.3. ki pùkū bi-yil ní ki kpátì kutukub bin bi nìn pēēyee ki bíl̀ ti-Dindaan nimbiin. 12Bi nìn dū kutuku ki fìn̄ nsaraafan ki māntìi tú ní dicilpuee ki kúuǹ ki yíiń ti-Dindaan mpɔn yii ú taa yàntī binannanliibi ń cúú bi-naantiibi nì bi-nimpoobi kí nàan̄ kitiŋ kin ní u dūu tīī-bi difakalee. Bi nìn gíti gbāam̀-u yii ú taa yàntī bin kaa sá Juuda yabee ń kɔ́ǹ circir paaŋŋu tijɔkɔndi kí nīn cáa bèel̄. 13Ti-Dindaan nìn pílifì bi-wimmeem ní ki ká bi-nimbaaku. Samaa nìn nìkī dinyɔɔboobil iwiin kupaau Juudee tiŋki kɔkɔn nì Jeerusaleem, ti-Dindaan Mpɔŋkɔdaan circir paaŋŋu nyɔkɔpu. 14Usaraaŋakpil Yooyakiim nì ti-Dindaan saraaŋaliibi kɔkɔ nì bin kɔkɔ bí ti-Dindaan tundinee nìn dū kutukub ki pēeǹ kí dàkà bi-nimbaaku. Bi nìn ŋá bisaraawɔkaabi bin bi ŋáań baabadalee#4.14 bisaraawɔkaabi bin bi ŋáań baabadalee: kpèè Disa 29.38, Dikà 28.3. nì ipoon saraabi nì samaa nín cáań nlammɔntiim saraabi biŋyee. 15Bi nìn dū ŋfantam ki pùkū ŋŋaabu ŋun fìn̄ bi-yilee ní ki nìn kūuntí ki yíì ti-Dindaan nì bi-pɔŋŋu kɔkɔ yii ú sɔ̄ Isirayeel yab saai kí ŋá-bi tiŋan#4.15 B. 14-15: dūú ŋmàntī nì Joow 2.17..
Currently Selected:
Judith 4: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.