Judith 3
3
Bi tú binib Ooloofeerni cee
1Bi nìn tú ituun Ooloofeerni cee bí sòoǹ nì u ŋgbansɔŋfi poon yii: 2«Timbi ubɔtikpaan Neebukadineesaar tɔntɔnliibi sèé a-nimbiin. Á dū-ti kí ŋá a nín là puee. 3Kpèè ti-naakpaapɔɔku nì ti-tiŋki kɔkɔ nì bilee kpaaŋŋi nì ti-picaŋkpunti nì ti-ŋɔcaŋkpunti nì ti-nacaŋkpunti nì ti-sati di dɔ̄ a-nimbiinee. Á dū tíǹ gbanti kɔkɔ kí ŋá a nín là puee. 4Ti-tiŋkpaammu nì bin kóò mu-poonee sá a-yumbui ní. Dāan̄ kí kɔ́ mu-poon kii a nín là puee.»
5Ituunee nìn dūu bāań Ooloofeerni cee ní ki dū tibɔtee ki bíl̀ u-nimbiin. 6Ooloofeerni nì u-janjakitil nìn sīntì ditiŋkugbandi. U nìn nyàab̄ binib ki cíitì ntimu mun bi máń agun ki māntìi túee ní ki nìn lēē mu-poon bininjab bin pɔ̄ɔ̄yee bí tūtuǹ u-janjaliibi. 7Ntimu gbantin nì ntimu mun nìn māntìi tú-muee, bi nìn fōō-u tiŋan nì mbeefuulimu ní ki nìn bɔ̀ɔ́ ŋgaŋgamu ki ŋōō#3.7 bɔ̀ɔ́ ŋgaŋgamu ki ŋōō: dūú ŋmàntī nì Disa 15.20, Bibɔ 11.34, 1 Sami 18.6. u-nimbiin. 8U nìn nāaǹ bi-timmu, ki gāatì bi-waasufii, di sá yii u nìn fōō mara yii ú kúntí kitiŋ pu waaŋi kɔkɔ án nín làá ŋá pu atimbun kɔkɔ nib ń nīn jáaḿ Neebukadineesaar baba nì u-baba, ní isoon kɔkɔ nib nì inibool kɔkɔ ń nīn jáaḿ-u kii bi nín jáaḿ diwaal puee#3.8 jáaḿ-u kii bi nín jáaḿ diwaal puee: dūú ŋmàntī nì Dani 6.8, 11.36..
9Míǹ boonee u dūu bàn̄ Eesdreelɔn#3.9 Eesdreelɔn: Jisirayeel tiŋki ní bi gíti yíì míǹ, kpèè Joos 19.18. tantakal nyɔkɔpu, an kaa dátiǹ Dootayiim tiŋki kin bí Juudee joofɔkɔŋi nyɔkɔpuee. 10Bi nìn ŋātì dinaapaal Geebayii nì Siitoopooliisi kansikin. Bi nìn gbíntì niin ki kāl̀ uŋmal ubɔ kí ŋmā kóoǹ u-janjakitil wanti kí kpāfì.
Currently Selected:
Judith 3: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.