Juges 21
21
Bi fātìi náań Beenjameen naakooku
1Isirayeel yab nín nìn kpáfì Miisipa tiŋkinee, bi nìn pūtì yii: «Ti-kansikin báà ubɔ ń taa dū u-bisal kí tīī Beenjameen naakookun yab ubɔ ticati.» 2Isirayeel nibul nìn cūtì Beeteel#21.2 Beeteel : kpèè Diny 12.8. circir paaŋŋu ki kāl̀ kitiŋ ti-Dindaan nimbiin ki súń ki yáliŋkì tikpil tikpil áli kujoou dāa dūu jóotì. 3Bi nìn bí ki lì yii: «Ti-Dindaan Isirayeel Nimbɔtiu, ba pu ní díǹ pu nee Isirayeel naakɔti kansikin kubɔ ń kúntí míǹ?» 4Kutaa nìn wúntì kutaafaau pɔ̀lpɔlee, Isirayeel yab nìn máń nsaraafan mpaan gbanti pu ní ki ŋá bisaraawɔkaabi nì mpèé saraabi. 5Bi nìn bālifì yii: «Isirayeel naakɔti kɔkɔ poonee, kunaakoou kulɔkɔ yab di kaa nìn dɔ́miń dikpafil din ti kpáfì ti-Dindaan nimbiin Miisipa tiŋkinee?» Kun pu bi nìn bālifì mimmee di sá yii bi-kɔkɔ nìn pée pūtì ki pōoǹ yii an sá bí kpɔ̀ unil un kamaa yaa yíì kaa dɔ́miń an kpafil gbantee ní. 6Kí kūtì muee, Beenjameen naakookun yab nìn kɔ́ bi-nabiyaamu Isirayeel naakɔti tin kíǹee yab isaa. Bi nìn bí ki lì yii: «Díǹ pu nee Isirayeel naakɔti kansikin kubɔ di bíi wáŋkí nee. 7Ti làá ŋá mana ní kí ká binimpoobi kí tīī Beenjameen naakookun yab bininjab bin ŋúń ki sáǹ ki ŋmátì kaa kpíìyee? Kun puee ti gíti dáá pūtì ti-Dindaan u-ba nimbiin ki lī yii taa làá dū ti-bisalib kí tīī-bi ticati.»
8Bi nín bālifì yii Isirayeel naakooku kubɔ yaa bí ku-yab kaa dɔ́miń dikpafil ti-Dindaan nimbiin Miisipa tiŋkinee, bi nìn dáań ki ká yii báà uniseen kaa nìn nyánní Yabeesi, Galaadi tiŋkin ki dɔ́miń dikpafil gbanti. 9Bi nín nìn kàan̄ Isirayeel nibul din nìn kóoǹní ki kpáfèe kɔkɔee, bi nìn ká yii binib bin kóò Yabeesi, Galaadi tiŋkinee báà ubɔbɔ ja kaa nìn bí. 10Samaa nìn kpáfì ki lēē bijanjaliibi binib kutukub saalaa nì bili ki tú niin ki bí-bi yii: «Ní cùmaan Yabeesi, Galaadi tiŋkin kí dū ntàataajimu kí kpɔ̀ ki-nib, kí kpáaǹ binimpoobi nì mbiyaamu kɔkɔ! 11Ni nín làá tin ŋá puee di sá ní tin kpɔ̀ kí kúntí bininjab kɔkɔ nì binimpoobi bin kɔkɔ pée nyí uninja ki kée.» 12Bi nìn kánní bisapɔmbi bin kaa nyí uninja ki kée binib alaataa anaa Yabeesi, Galaadi tiŋkin ní ki yōoǹní-bi ki cáań Siiloo naapaal pu, Kanaan tiŋkin#21.12 Siiloo : kpèè Joos 18.1..
13Samaa kɔkɔ nìn lēē binib ki tú Beenjameen naakookun yab bin nìn bí laakin bi yíì yii Riimɔn Taŋkpalee cee. Bi nìn cūtìi tùkū-bi yii kujaau kúntì ŋgbansɔŋfi dōoǹ. 14Niinee ní Beenjameen naakookun yab nìn fātìi gítì ki kāl̀ bi-timmu pu, ní Isirayeel naakɔti tin kíǹee yab dū Yabeesi, Galaadi tiŋki nimpoobi bin baa nìn kūūyee ki tīī-bi bi cáá cáá. Ama binimpoobi kaa nìn bàn̄ bi-kɔkɔ ń ká ubɔ ubɔ kí cáá.
15Unimbɔti nín nìn yāntì Beenjameen naakookun yab paaŋŋu dōoǹ fám Isirayeel naakɔti kɔkɔ kansikinee, bi-bɔti nìn kɔ́ tinaakɔti tin kíǹee yab isaa tikpil. 16An puee ní samaa kɔkɔ kpilib kāl̀ ki sòon̄ ki bí yii: «Too, Beenjameen naakooku poon binimpoobi nín kúntì kɔkɔ pu nee, ti làá ŋá mana ní kí ká binimpoobi kí tīī bininjab bin kíǹee dee? 17An máaǹ yii Beenjameen naakookun yab bin kíǹee ń fàtīí màal̀ kí bùtī ní bi-naakooku ń taa wāŋkì Isirayeel naakɔti kɔkɔ poon. 18Ni pée nyí yii timbi kaa làá ŋmā kí dū ti-bisalib kí tīī-bi bí cáá, kun puee ti nìn pūtì yii un kamaa di yaa pée dū u-bisal ki tīī Beenjameen naakookun yab ubɔ ticatee, ti làá tɔ̄ udaan mbusu ní.»
19Ŋyunti gbanti ní bi nìn téetì yii dibindi kamaayee bi jīǹ ti-Dindaan jiŋaaliu Siiloo tiŋkin. Kitiŋ gbanti nìn bí Beeteel tiŋki ŋgan pú, nsan ŋun yíkí Beeteel tiŋkin ki cá Siikeem tiŋkinee ŋwìiń nyalaŋki pú, ní ki bí Leeboona tiŋki ŋgiil pú. 20Niinee ní bi sáŋkì Beenjameen naakookun yab ki bí-bi yii: «Ní cù kí nákań nákaḿmaan fiinyi sufii boon kí nīn cí! 21Ni yaa láa ká Siiloo tiŋki sapɔmbi nóoń tɔb ki nyánní kí kpāfì kí gāā ilan kí ŋɔ̄ diŋoolee, ní dāá nyānní ní ni-kansikin báà ŋma ń dāá cúú Siiloo sapɔmbee ubɔ ubɔ. Báà ŋma ń dāá cáá u-yɔu kí nīn kùǹ u-dumpu Beenjameen naakooku timmun kí dū-u kí kpántí u-nimpuu. 22Bisapɔmbee baabi àá bi-niijab yaa dɔ́miń ki nyáfì-ni ti-ceeyee, timbi làá lì-bi yii: <Ní gbìl̄maan kí tīī nì Beenjameen naakookun yab, kun puee timbi kaa ŋúń ki fōō binimpoobi bin nyɔkɔm làá bà bi-kɔkɔ ń ká kí cááyee Yabeesi jaaku poon ki tīī-bi. Ní nimbi ni-ba nín kaa dū ni-bisalib ki tīī-bi bi cááyee, naa yīntì mara.>» 23Beenjameen naakookun yab nìn lafun ŋá bi nín nìn sáŋkì-bi yii bí ŋá puee. Bi nìn lēē binimpoobi bin nyɔkɔm làá tin bà bi-kɔkɔ ń ká ubɔ ubɔ kí cááyee Siiloo sapɔmbi bin nìn nyáń ki ŋɔ́ń ní bi cúú-bee kansikin ki cáa búntì. Bi nìn nín gítí bi-tinjandi pu ní, ki cūtì ki fātìi náań bi-timmu ki kāl̀. 24Niinee ní Isirayeel yab bin kíǹee yíkì dikpafil laŋki ki nóó nì bi-naakɔti nì bi-dicaŋŋi ní bi-kɔkɔ nín gítí bi-tinjaŋŋin.
25Ŋyunti gbantee bibɔtiibi kaa nìn dá láá bí Isirayeel tiŋkin. Báà ŋma nìn ŋáań min u lèe ní.
Currently Selected:
Juges 21: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
