Ruth 1
1
Nnaabu ŋun kɔ́ Eeliimeeleeki dicaŋkuee
1Ŋyunti ŋun bibɔsoonliibi nìn dáá kpòotī Isirayeel tiŋkee, ŋkùm miba nìn nyáń kitiŋ pu. Ní uninja ubɔ nìn yíkì Beetileem#1.1 Beetileem: an sá kitimbilii ní Juuda tiŋkin kaa dátiǹ Jeerusaleem tiŋki, niin ní bi màl̄ ti-Dindaan Yeesu Kriisitoo., Juuda tiŋkin ki kpáaǹ u-nimpuu nì u-jipɔmbi liitil ki cūtìi kāl̀ Moowaab tiŋkin. 2Bi nìn yíì uninjee yii Eeliimeeleeki#1.2 Eeliimeeleeki taapu di sá yii M-Nimbɔtiu di sá ubɔti., ki yíì u-nimpuu yii Nawoomii#1.2 Nawoomii taapu di sá yii m-mɔŋŋu. ní ki yíì u-jipɔmbee ubɔ yii Maalɔn#1.2 Maalɔn taapu di sá yii iween. ní ki yíì un kíǹee yii Kiiliyɔn#1.2 Kiiliyɔn taapu di sá yii iwɔsɔfi.. Bi nìn sá Eefiraata maaliŋun nib ní ki kóò Beetileem, Juuda tiŋkin. Bi nìn bàn̄ Moowaab yab satinee ní ki gbíntì niin ki kāl̀. 3Bi bí niin ní Eeliimeeleeki kpíì ki fá u-nimpuu Nawoomii nì u-jipɔmbi liitil. 4Ní u-jipɔmbee cáá bimoowaabisapɔmbi. Bi nìn yíì ubɔ yii Ɔripa ní ki yíì un kíǹee yii Ruuti. Bi nìn kāl̀ Moowaab satin niin an bàn̄ kii abin saalaa nyɔkɔm. 5Boonee ní Maalɔn nì Kiiliyɔn liitil mun dāa kpíì, ní Nawoomii kíǹ u-baba, u-biyaamu liitil kaa ti báaa, u-cal mun kaa ti bí.
Ruuti nóó Nawoomii bi nín gítí Beetileem tiŋkin
6Nawoomii bí Moowaab satin niin ní ki gbìl̄ yii ti-Dindaan dàkā u-nibul kulaŋŋaŋfitiiu ki tīī-bi tikpaajin. Di sá ní Nawoomii bɔ́ntì kí fàtīí yīkì Moowaab tiŋki, u nì u-coopoobi liitil. 7An puee ní u yíkì Moowaab tiŋki laakin u nìn kóòyee ki kpáaǹ u-coopoobi. Bi nìn kāl̀ nsan pu kí nīn gítí Juuda tiŋkin. 8Bi nyáń nsannee ní Nawoomii bí u-coopoobi liitilee yii: «M-bisalib, nín̄ gítímaan! Báà ŋma ń nīn cá u-na cee#1.8 Eebru yab ceeyee, unimpu nìn cáá u-ba nì u-tantiu ní, ní u-bisal yaa nìn kpántì ukpiipuee, u nìn ŋūǹ kí gítiń kí nīn bí u-cee.. Ti-Dindaan ń ŋá-ni tiŋan kii ni mun nín ŋá man nì ni-calib bin kaa ti bí ti-cee nee tiŋan puee. 9Ti-Dindaan ń yàntī ní fàtīí ká ticamɔntiil, ni-kansikin báà ŋma ń ká diŋuŋfil kucadiin.» Nawoomii lī mimmee ní ki kpàl̄ u-coopoobi liitil ki kāaǹ-bi. Ama ní u-coopoobi kíĺ ki bíi sūǹ mpɔn, 10ní ki bí-u yii: «Kpáb! Timbi làá nóó-si ní kí cù a-yab cee.» 11Ní Nawoomii bí-bi yii: «Nín̄ gítímaan, m-bisalib! Ba pu ní ní nīn gbíntìi nóó-mi? M nín bí pu nee, m gíti ŋūǹ kí màal̀ mbininjabiyaamu mú cáá-naaa#1.11 Uninja yaa nìn cáá unimpu ní ki kpíì kaa cáá kibikee, udaan maan àá u-naal àá u-nabiki kiba di nìn fòol̄ ukpiipu ní kí màal̀ kí téeǹ u-nabiki kin kpíìyee yil. Kpèè Ditee 25.5-10, Diny 38.6-8, Maat 22.24.? 12Nín̄ gítímaan, m-bisalib, nín̄ cámaan! Di sá yii man púĺ ki jítì dicamɔndi pu. Laakin m bí nee, maa ti ŋūǹ kí fàtīí mɔ̄ǹ uninja. Báà m yaa bàà pée dākafì ki lī yii: <M dáá gbíntìi cáá dimákal yii, man nì uninja yaa kpáfì kunyeeu nee, m làá màal̀ mbininjabiyaamu>, 13ní ki yaa lafun ŋá míǹ, ni làá kíí kí kàl̄ kí cīití-mu mú dāá wíiǹaaa? Ni làá nīn kā ki cí-mu míǹ mú wíiǹ kí dāá cáá-ni, kaa làá nyàab̀ bininjab kí mɔ̄ǹaaa? Aayee, m-bisalib! Man falaau gíti lákatì tikpil nì nimbi yɔu, kun puee ti-Dindaan u-ba di gbáń-mi.»
14Niinee ní bi fātìi tí kíĺ ki bíi sūǹ mpɔn. Ní Ɔripa kpàl̄ u-beel Nawoomii ki kāaǹ-u ki nín gítí u-yab cee, ama ní Ruuti úǹ yíì ní ki dū u-ba ki yá ki nákáǹ u-beel. 15Ní Nawoomii bí-u yii: «Kpèè, a-yɔnti úǹ nín gítí u-yab nì u-nimbɔtii cee. Sii mun páań u-boon ní nīn gítí!» 16Ní Ruuti kíí-u yii: «Taa páb́-mi yii ḿ nīn cá kí dū-si kí fá. Laakin a làá cùee, niin ní ma mun làá cù. Laakin a làá kɔ́ee, niin ní ma mun làá kɔ́. A-nibul làá nīn sá m-nibul, ní a-Nimbɔtiu ń nīn sá m-Nimbɔtiu. 17Laakin a làá kpúee, niin ní ma mun làá kpú ní bí síb́-mi niin. Ŋkúm baba di làá yàkatī man nì sii kansikin. An yaa kaa ŋá míǹ, ti-Dindaan ń dáaĺ m-tafal kí gíti dáaĺ m-tafal.»
18Nawoomii nín ká yii Ruuti dáá pée gbíntìi cɔ́ yii u làá nīn nóó-u ki cée, ní u ŋmíl̀ kaa ti gātì-u báà tiba.
19Ní Ruuti nì Nawoomii liitil nóó ki tin kɔ́ Beetileem tiŋkin. Bi nín bàn̄ ki kɔ́ Beetileem tiŋkin bi ká-bee ní an ŋá binib kɔkɔ yèeee, ní binimpoobi kíǹ ki bàlifī tɔb yii: «Mimmee Nawoomii lafun sɔ̀ɔɔ?» 20Ní Nawoomii bí-bi yii: «Ní taa ti yíiń-mi yii Nawoomii! Ní nīn kíǹ ki yíì-mi yii Maara#1.20 maara taapu di sá yii ntuntun., kun puee Unimbɔti Mpɔŋkɔdaan yāntì m-nyɔkɔ túŋkì! 21Di sá yii nì digbíl ní m nìn búntì, ama ní ti-Dindaan fātìi gíiǹní-mi nì iŋaŋkulim. Ní taa ti yíiń-mi yii Nawoomii, kun puee ti-Dindaan Mpɔŋkɔdaan sòon̄ ki kūū m-bɔti ní ki yāntì m kpántì unandaan.»
22Min ní Nawoomii nìn yíkìń Moowaab satin ki fātìi bāań u-tiŋki puee dee, u nì u-coopu Ruuti kimoowaabibiki. Bi nìn bāań Beetileem tiŋkin ŋyunti ŋun bi nìn bí ki cēē ɔɔji jintee ní#1.22 Ɔɔji sá tijimpin ní ki náań nì imukul. Ŋgiliisi sooŋyi poonee, ɔɔji di sá Baal..
Currently Selected:
Ruth 1: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.