Juges 20

Bi dáaĺ Beenjameen naakookun yab tafal

1Isirayeel yab kɔkɔ nìn kóoǹ ki kpáfì dicilpu kii unibaantee ní ti-Dindaan nimbiin Miisipa tiŋkin, kí yòon̄ Daani tiŋki ŋgan pú ki tin cáá sāā Beerseeba tiŋki ŋgiil pú, ki kpáaǹ Galaadi tiŋki ŋwìiń nyalaŋki kɔkɔ#20.1 Bi yaa lī yii kí yòon̄ Daani tiŋki ŋgan pú kí tin cáá sāā Beerseeba tiŋki ŋgiil púee an dàkà Isirayeel tiŋki kɔkɔ ní (kpèè 1 Sami 3.20). - Miisipa tiŋki nìn sá Beenjameen tiŋki kiba ní ki bí Jeerusaleem tiŋki ŋgan pú ki dátì kii ataŋkpee 13 nyɔkɔm. Miisipa tiŋki gbanti nyáń ki-ba nì kin bí Galaadi tiŋkinee (kpèè 10.17 nì tin bi ŋmàn̄ kubɔŋu faaku taapuee).. 2Isirayeel nibul kɔkɔ kpilib nì Isirayeel naakɔti kɔkɔ yab nìn bí Unimbɔti nibul kpafil gbantin. Bijanjaliibi bin nìn còom̄ ataa ki ŋūǹ ki jáà kujaau nì ntàataajimu tiŋanee nìn sá binib kutukub alaataa anaa. 3Beenjameen naakookun yab nìn gbìl̄ yii Isirayeel naakɔti tin kíǹee yab kɔkɔ jɔ́m̀ ki kpáfì Miisipa tiŋkin.

Dikpafil gbanti laŋki ní Isirayeel yab nìn bālifì yii: «Māafìmaan-ti digaŋgam gbantee nín baasii jítì puee!» 4Ní uleefiija un nimpuu bi nìn kūūyee fōō dinyɔɔbundi ki bí yii: «Man nì m-bɔɔn di nìn pāatì Giibeeya, Beenjameen tiŋkin kí dòon̄ kutaa ń wúntí tí nìkī ti-saŋŋu. 5Giibeeya yab nìn dɔ́miń kí ŋá-mi digaŋgam. Kunyeeuee bi nìn māntìi tú dicindi din poon m nìn kɔ́ee kí bàà kpɔ̀-mi, ní ki dōoǹ nì m-bɔɔn áli u tin kpíì. 6Ní m yōoǹ m-bɔɔn dinikpilee ki càkā ki dūu yākatì ki tīī Isirayeel naakɔti kɔkɔ, kun puee binib gbanti ŋá dijɔkɔntundi nì icoo bɔti Isirayeel tiŋkin. 7An puee, Isirayeel yab, ni-kɔkɔ nín kpáfì doo nee, ní sòoǹ kí kpèè ni nín làá ŋá puee.» 8Niinee ní Isirayeel yab kɔkɔ yíkì kii unibaantee ki bí yii: «Ti-kansikin báà ubɔ kaa làá fàtīí gítí u-tantiun, ubɔ kpá ki làá fàtīí gítí u-dumpu. 9Kɔŋkɔnnee, ti nín làá ŋá Giibeeya tiŋki puee sèé. Ti làá tɔ̄ kasi ní kí cù kí já nì kì. 10Isirayeel naakooku kamaanee, binib dilaataal poonee ti làá lēē binib saalaa ní, binib kutuku ubɔ poonee tí lēē binib dilaataal ní binib kutukub saalaa poonee, tí lēē binib kutuku ubɔ. An nib gbantee di làá túń tijin tin bijanjaliibi làá tin nín̄ jīǹee, ní bijanjaliibi ń cù kí dáaĺ Giibeeya, Beenjameen tiŋki nib tafal bi nín ŋá icoo bɔti tin Isirayeel tiŋkinee pu!»

11Isirayeel janjaliibi kɔkɔ nìn kíí kí kpāfì kii unibaantee kí cù kí já nì Giibeeya yab. 12Ní Isirayeel naakɔti tin kíǹee yab lēē binib ki tú Beenjameen naakooku kɔkɔn bí bàlifì ku-nib yii: «Ba kpitii bulifi ní bi ŋá ni-kansikin mimmee? 13Kɔŋkɔnnee, ní nyāntí binib bin kaa bí tiban ki bí Giibeeya tiŋkinee gbanti kí tīī-ti tí kpɔ̀-bi ní kí nyāntí ikpiti gbanti Isirayeel tiŋkin!»

Ama Beenjameen naakookun yab kaa nìn pílifì bi-nabiyaamu Isirayeel yab bin kíǹee nyɔkɔ. 14Beenjameen naakookun yab gbanti nìn yíkìń bi-timmu kɔkɔn ní ki kóoǹní ki kpáfì Giibeeya tiŋkin kí já nì Isirayeel yab bin kíǹee. 15Ŋwiin gbantee Beenjameen naakookun yab janjaliibi bin nìn nyánní bi-timmu kɔkɔn ki dɔ́miń bi lēē-bi bí já kujaauee nìn sá binib kutukub mmuŋku nì biluu ní, ní kí nín kūtì Giibeeya tiŋki yab janjaliibi bimɔmmɔntiibi alaataa aluli. 16Dijanjakitil gbanti kɔkɔnee, bin nìn sá bijanjaliibi bimɔmmɔntiibi ki sá bigàmbee nìn nyáń binib alaataa aluli ní. Bíǹ kansikin báà ŋma nìn ŋūǹ kí dū kujaataafuŋ kí tɔ̄ ditaŋkpal an lēē unil yikpilku kubɔbɔ ja kí taa lántí. 17Isirayeel yab mun nìn nyánní. Bi nìn lēē bi-kansikin bin làá já kujaauee. Bi yaa kaa kàan̄ ki kpáaǹ Beenjameen naakookun yabee, bíǹ nìn nyáń binib kutukub alaataa anaa ní, ní bi-kɔkɔ nìn sá bijanjaliibi bin nìn ŋūǹ ki jáà nì ntàataajimu tiŋan tiŋanee.

18Isirayeel yab nìn jɔ́m̀ Beeteel tiŋkin ní ki cūtìi bālifì ti-Dindaan yii: «Ti-kansikin kunaakoou kulɔkɔ nib di làá péé kí cùú jáǹ Beenjameen naakookun yab?» Ní ti-Dindaan kíí yii: «An sá Juuda naakookun yab di làá péé kí cù#20.18 Beeteel : kpèè Diny 12.8.!» 19Kutaa wúntì kutaafaau pɔ̀lpɔlee ní Isirayeel yab yíkì ki cūtìi ŋātì bi-janjanaapaal Giibeeya tiŋki caŋin. 20Bi nyáń kí jáǹ Beenjameen naakookun yabee, ki bōoǹ dikɔmbool pu bi-nimbiin túĺ Giibeeya tiŋki. 21Ŋwiin gbantee, Beenjameen naakookun yab nìn nyánní Giibeeya tiŋkin ní ki kūū Isirayeel yab binib kutukub mmuŋku nì bili. 22Ama ní Isirayeel yab nìn tīī tɔb kunyannyaau ki fātìi gítì ki bōoǹ dikɔmbool pu laakin bi nìn pée bōoǹ ŋwimpeekaa dal ki jáń kujaauee. 23Isirayeel yab nìn jɔ́m̀ ki súń ti-Dindaan nimbiin áli kujoou dāa jóotì. Bi nìn bālifì ti-Dindaan yii: «Tí fàtīí gítí kí cùú já nì ti-nabiyaamu Beenjameen naakookun yabaaa?» Ní ti-Dindaan kíí yii: «Iiin, ní fàtīí gítímaan kí cùú já nì bi!» 24Ŋwinliliiti dalee, Isirayeel yab nìn tí cūtì ki jáń nì Beenjameen naakookun yab. 25Ŋwinliliiti gbantee, Beenjameen naakookun yab nìn tí nyánní Giibeeya tiŋkin ki kūū Isirayeel yab bijanjaliibi bin nìn ŋūǹ ki jáà nì ntàataajimu tiŋan tiŋanee binib kutukub saalku nì bita. 26Niinee ní Isirayeel yab kɔkɔ jɔ́m̀ Beeteel tiŋkin. Bi nìn kāl̀ kitiŋ ti-Dindaan nimbiin niin ki súń ní ki bóob́ kinyɔkɔ áli kujoou dāa jóotì. Bi nìn ŋá bisaraawɔkaabi nì mpèé saraabi ti-Dindaan nimbiin. 27Isirayeel yab nìn bālifì ti-Dindaan min bi máaǹ kí ŋée, kun puee ŋyunti gbantee Unimbɔti poondi dakaau nìn bí Beeteel tiŋkin niin ní. 28An yuntiŋuee Piinaasi, Eeliyeeseer jipɔɔn, Aarɔn naantiiu di nìn sá usaraaŋakpil. Isirayeel yab nìn bālifì ti-Dindaan yii: «Tí fàtīí gítí kí jáǹ ti-nabiyaamu Beenjameen naakookun yabaaa, tí taa ti cù ní?» Ní ti-Dindaan kíí yii: «Ní fàtīí gítímaan kí já nì bi, kun puee fool ní m làá fu dū-bi kí ŋá ni-ŋaan!»

29Isirayeel yab nìn lēē bi-janjaliibi biba ki nákáǹ nákáǹ Giibeeya tiŋki ki māntìi tú. 30Ŋwintataati dalee, Isirayeel yab nìn tí cūtì kí já nì Beenjameen naakookun yab. Bi nìn bōoǹ dikɔmbool pu bi-nimbiin túĺ Giibeeya tiŋki kii bi nín nìn pée tí ŋá pu mili min jítèe. 31Beenjameen naakookun yab nìn tí nyánní kí já nì Isirayeel yab ní bíǹ nìn ŋmātiǹ-bi bi páaǹ bi-boon ki kɔ́ ndan ki yāntì bi-tiŋki. Bi nìn tí kíĺ ki bíi kù Isirayeel yab janjaliibi kii bi nín nìn kpààa ŋáań puee. Bi nìn kūū Isirayeel yab janjaliibi tisatin kii binib mmuŋku nì saalaa nyɔkɔm, Beeteel saŋŋu nì Giibeeya saŋŋu pu. 32Beenjameen naakookun yab nìn bí ki dàkafī bi-neen yii: «Kpèè, ti tí jáń ki pɔ́ɔkiǹ-bi kii ti nín kpààa pée jáà ki pɔ́ɔkíǹ-bi puee dee!» Ama ní Isirayeel yab bíǹ nìn sòon̄ ki síiǹ yii: «Tí sām̀maan kí yàntī bí páanní ti-boon, tí dáaĺ-bi kí cùnnì ndan an nīn dátiǹ kitiŋ!» 33Isirayeel janjaliibi bin kíǹee kɔkɔ nìn bōoǹ dikɔmbool pu Baal-Tamaar tiŋkin, ní bin bi nìn yāntì bi bál̀ ki māntìi tú kitiŋee nyáń laakin bi nìn bál̀ bál̀ee ki túĺ Geeba tiŋki. 34Isirayeel yab janjaliibi bimɔmmɔntiibi binib kutukub saalaa di nìn kpáfì Giibeeya tiŋki nyɔkɔpu ki bíi jáà ŋwiin gbanti. Kujaau nìn yíkìi dūu pɔ́ɔkì tikpil, ama Beenjameen naakookun yab kaa nìn nyí yii nnaabu dòoń-bi. 35Unimbɔti nìn yāntì Isirayeel yab jáń ki pɔ́ɔkiǹ Beenjameen naakookun yab. Ŋwiin gbantee Isirayeel yab nìn kūū bi-janjaliibi bin nìn ŋūǹ ki jáà nì ntàataajimu tiŋanee, binib kutukub mmuŋku nì biŋmoo nì binib dilaataal. 36Niin ní Beenjameen naakookun yab béè yii bi jáń ki pɔ́ɔkiǹ-bi.

Isirayeel yab nìn máká bi-janjaliibi bin nìn náká ki māntìi tú Giibeeya tiŋkee pu. An pu ní bi nìn sáǹ ki pú Beenjameen naakookun yab mpaan. 37Isirayeel yab bin nìn náká nákée nìn yíkì ki sáǹ malaa malaa ki kɔ́ Giibeeya tiŋkin ní ki dū ntàataajimu ki kūū binib bin nìn bí ki-poonee kɔkɔ. 38Too, Isirayeel yab bin nìn nákáǹ ki māntìi tú Giibeeya tiŋkee nì bin kíǹee nìn sòon̄ ki gbìlīǹ tɔb yii bi yaa ŋúń ki kɔ́ee, bi làá yàntī ŋŋminyiim ń yīkì kí jɔ̄m̀ kutaa pu kitiŋ gbanti yilpu, án nīn sá kudaaŋŋu bin kíǹee ń béé. 39Isirayeel yab nìn sáǹ ki kpáaǹ Beenjameen naakookun yab ki nyántì ndandati bi bíi jáà. Beenjameen naakookun yab nìn tí kíĺ ki bíi kù Isirayeel yab. Bi nìn kūū kii binib mmuŋku nì saalaa, ní ki nìn bí ki dàkafī bi-neen yii: «Tilafuŋman, ti tí jáń ki pɔ́ɔkiǹ-bi kii ti nín nìn pée tí jáń ki pɔ́ɔkiǹ-bi mpeepeekaam puee ní!» 40Ama ŋŋminyiim min bi nìn yóoǹ yii án nīn sá-bi kudaaŋŋuee nìn kíĺ ki bíi nyēē kitiŋ poon ki jɔ́ḿ kutaa pu. Beenjameen naakookun yab fātìi kpēē bi-boonee, Giibeeya tiŋki fōō ŋŋmi ŋŋminyiim yíkí ki-poon jòooo ki jɔ́ḿ kutaa. 41Isirayeel janjaliibi nín ká mimmee ní ki fātìi lábitì Beenjameen naakookun yab pu. Beenjameen naakookun yab nín nìn ká nnaabu ŋun jéetì bi-puee, bi-pɔbiliŋ nìn bíil̀ tikpil. 42An puee ní bi nìn fātìi lábitì ki sáǹ ki kátì Isirayeel yab nimbiin, ki dūu túĺ kuteeu watil pú. Ama Isirayeel yab janjaliibi bin nìn bí dipaal puee nìn kā bi-pu, ní bin nìn nyánní kitiŋinee nìn túŋkiń-bi ki kùń-bi ki dòoń. 43Míǹ ní Isirayeel yab nìn māntìi tú Beenjameen naakookun yab, ki nìn jìn̄-bi kaa pée pú-bi mpaan, ní ki nìn pɔ̄fì-bi míǹ áli ki tin cáa sāā Giibeeya tiŋki nyɔkɔpu ŋwìiń nyalaŋki pú. 44Beenjameen naakookun yab janjaliibi binib kutukub saalku nì bita di nìn kpíì ŋwiin gbanti, bi-kɔkɔ bibaatandambi ŋma. 45Bin nìn kíǹee nìn fātìi lábitì ki sáǹ ki túĺ kuteeun laakin bi yíì yii Riimɔn Taŋkpalee watil pú. Isirayeel yab nìn gíti kūū bi-kansikin binib kutukub biŋmoo nsanni. Bi nìn jìn̄ bin kíǹee ki tin bàn̄ Giidoom tiŋkin ní ki nìn gíti kūū binib kutukub bili ki kútì. 46Beenjameen naakookun yab janjaliibi bin Isirayeel yab nìn kūū ŋwiin gbantee nìn kpáfì bijanjaliibi kutukub mmuŋku nì biŋmoo, bi-kɔkɔ bibaatandambi ŋma. 47Beenjameen naakookun yab binib alaataa aluu di nìn ŋúń ki fātìi lábitì ki sáǹ ki túĺ kuteeun ki cūtìi kɔ́ laakin bi yíì yii Riimɔn Taŋkpalee. Bi nìn gbíntì ki kāl̀ niin ki tin sāā iŋmal inaa. 48Isirayeel yab nìn fātìi gítì ki dū ntàataajimu ki kūū Beenjameen naakookun yab bin kaa nìn ŋúń ki sáǹ ki ŋmátèe kɔkɔ, kí yòon̄ binib bin kóò ntimunee kí cáá sāā tiwaŋkuti nì bin kɔkɔ bi yaa nìn pée kée. Kí kūtèe, bi nìn sēetì ntimu mun kɔkɔ poon bi nìn pée jítèe ŋŋmi ní.

Currently Selected:

Juges 20: BASSARDC

Highlight

Copy

Compare