Galates 4

1M làá tí yòon̄ tibɔŋmantikaal tiba. Di sá yii un làá fōō u-baa gaajawantee yaa dáá sá kibikee, baa ŋūǹ kí gàntī u nì uyumbu, ama u mun di yì tikɔkɔ. 2U dáá bí binib bin ŋúb́-u ki kpèé u-wantee taapu ní ki cí ŋyunti ŋun u-baa yóoǹee ń dāá bàń. 3Míǹ mbaantiim, ŋyunti ŋun taa láá béè Kriisitoo saŋŋuee, ti nìn sá duulinya marab yumbui ní. 4An sāā ŋyunti bāańee, ní Unimbɔti túnní u-Jipɔɔn ní ki yāntì unimpu màl̄-u, ní u mun bí Juuda yab marab taapu, 5án nín làá ŋá pu ú fīī timbi bin bí mara taapuee kí dū-ti kí kpántí Unimbɔti biyaamuee.

6Kun dàkà yii ni lafun sá u-biyaamuee di sá Unimbɔti túnní u-Jipɔɔn Fam ti-pɔbiliŋin. Ŋfamee di yì-tì ti yíì-u yii: «Ti-Baa#4.6 Ti-Baa: kpèè Maar 14.36, Room 8.15. - Dū B. 5-7 kí ŋmàntī nì Room 8.15-17..» 7Míǹ puee, aa ti sá uyumbu, a kíǹ ki sá u-biki ní. A nín sá u-bikee puee, ní u tìì-si u-gaajawanti.

Pɔɔl bíi sáŋkí Galaati yab

8Dooooyee, naa nìn nyí Unimbɔti ní ki nìn sá awaa yumbui, awaa ŋin kaa sá Unimbɔti, kaa máaǹ bí nóó-ŋee#4.8 Dūú ŋmàntī nì 1 Kɔra 8.4-6.. 9Kɔŋkɔnnee, ni béè Unimbɔti, an dàkà yii Unimbɔti di béè-ni. Ba ŋá ní ni gíti là kí gítí duulinya marab bin kaa cáá mpɔn, kaa bí tibanee taapu kí nīn sá bi-yumbui kii dooooyee ní? 10Ni gàntī iwiin iba yii i sá ikpaan, ki gàntī iŋmal nì iyunti nì abin mbaantiim#4.10 Dūú ŋmàntī nì Room 14.5, Kool 2.16-23.. 11An puee, m fàŋkí yii digìńdi din m gīī ni-puee ń taa ŋá fám.

12Nnabiyaamu, m mèé-ni yii ní nīn bímaan kii mamee, a lì kii ma mun nín nìn gíiǹ m-ba kii nimbee. Ama naa ŋá-mi tibeeee! 13Ni nyí yii m-weeŋyi di nìn yāntì m sòon̄ nì ni Tibɔmɔntiil mpeepeekaam. 14Nì min kamaa m-weeŋyee bàà nìn ŋūǹ kí yàntī ní gīiǹ-mee, naa kpēē-mi fámaaa, kaa núutiǹ-mi. Áli gba, ni nìn gíti fōō-mi kii Unimbɔti tuuŋŋuaaa, Yeesu Kriisitoo u-bee ní. 15Ba ŋá ní an kaa ti mɔ̄ǹ-ni kii dooooyee? Di sá yii m ŋūǹ kí sòoǹ ni-pu yii, ni yaan ŋūǹ, ni bàà lèekī ni-nimbiliŋ kí tīī-mi. 16Ibaamɔn in m sòoǹ nì nee puee ní naa ti là m-bɔtaaa?

17Binib nee nín cáá bi-ba ki nākantíǹ-ni dinakándi diŋyee, dàa sá dimɔntiil, bi là kí yàkatī man nì ni kansikin ní, kí dáaliń-ni kí nákáǹ bi-ba. 18An máaǹ tin ŋān̄ee pu ní unil ń dū u-ba kí nákáǹ-si kí nīn cá jaanjaan, kaa sá m yaa bí ni-kansikinee baba. 19M-bineeŋkaamu, an tí wù-mi tikpil kii imatiŋweenee kí nīn cí ŋyunti ŋun ni làá dāá kpántí kii Kriisitoo nín bí puee. 20M yaan bímaan ni-kansikin ŋyunti nee kí ŋmā kí béé m nín làá sòoǹ-ni puee! Kɔŋkɔnnee, m bíi yáliŋkí ni-pu.

Agaar nì Saara bɔti

21Nimbi bin là kí nīn bí Mooyiisi marab taapuee, tùkùmaan-mi, naa gbìl̀ marab gbɔŋku poon bɔtaaa? 22Di sá yii an ŋmàn̄ yii Abraam nìn màl̄ mbininjabiyaamu muli, kiba sá unimpuyumbu biki ní kin kíǹee sá unimpu un yì u-bee biki. 23U màl̄ uyumbu biki nniyaamin, ama ní unimpu un yì u-bee biki màaltam sá Unimbɔti pòontam#4.23 B. 22: kpèè Diny 16.15, 21.2. - B. 23: ...sá Unimbɔti pòontam: kpèè Diny 17.16, Room 9.7-9.. 24Tibɔti nee ŋūǹ kí nīn sá-ti tibɔŋmantikaal: binimpoobi bili gbanti ŋūǹ kí dàkà min ní Unimbɔti nìn bóob́ u nì binib kansikinee. Bi nín nìn bóob́ tin Siinaayi jool puee di sá Agaar ní ki màal̀ ŋyumbubiyaamu. 25Agaar gbanti sá Siinaayi jool din bí Bilaalibub tiŋkinee, ní ki sá Jeerusaleem nì u-biyaamu mun bí kuyuŋun díǹ pu nan ní#4.25 Bi dū Jeerusaleem doo ki ŋmāntiǹ Juuda yab nimbɔtijaamii ní. Dūú ŋmàntī nì Maat 23.37, Luuki 13.34.. 26Ama Jeerusaleem un bí yilpuee sá un yì u-bee, úǹ di sá timbi na. 27Kun puee an ŋmàn̄ yii:

«Unimpuŋmaŋŋmanti un kaa ŋúń ki màl̄ ki kée,

án nīn mɔ̄ǹ-si!

Sii un kaa nìn nyí imatiŋween ki kée,

á nīn kūuntí nì dipɔɔpindi!

Kun puee unimpu un bi cāntèe màl̄ mbiyaamu ki jítiǹ unimpu un cáá calee#4.27 Kpèè Yees 54.1..»

28Nnabiyaamu, míǹ ní nimbi sá Unimbɔti pòontam biyaamu, kii Isaaki nín nìn sá puee. 29Dooooyee, kibiki kin bi màl̄ nniyaaminee nìn páb̀ kibiki kin Unimbɔti Fam yāntì bi màl̄ee. Ní áli nìn díǹ an gbíntìi sá míǹ ní. 30An ŋmàn̄ Unimbɔti gbɔŋku poon yii ba ní? An ŋmàn̄ yii: «Jà unimpuyumbu nì u-jipɔɔn. U-jipɔɔn nì unimpu un yì u-bee jipɔɔn kaa máaǹ kí yàkatī bi-baa gaajawanti#4.30 B. 29: dūú ŋmàntī nì Diny 21.9. - B. 30: kpèè Diny 21.10..» 31Míǹ puee, m-nabiyaamu, timbi sá unimpu un yì u-bee biyaamu ní, taa sá unimpuyumbu biyaamu.

Currently Selected:

Galates 4: BASSARDC

Highlight

Copy

Compare