Galates 3

Mara nì fookii

1Galaati yab bigbaambi, ŋma di gátì ni-nimbiliŋ ní? Di sá yii bi nìn kàan̄ Yeesu Kriisitoo kúm ndɔpuntikaa pu bɔti, ní ni wál̀ míǹ kii foota ní bi dàkā-nee. 2M là kí bàlifì-ni tibɔbaantiil ní kíí-mi: ni nín ŋúb́ Mooyiisi marabee ní ni fōō Unimbɔti Fam naaa, ni nín fōō Tibɔmɔntiil ki kííyee ní ni fōō ní? 3Ni sá bigbaambi níii? Ni kíĺ nì Unimbɔti Fam ki dī u-saŋŋu ní ki là kí kúntí nì ni-ba pɔ́ɔǹtamaaa? 4Mimmee, tin kɔkɔ ni kántèe ŋá fám deeyaa! An kaa ŋūǹ kí ŋá fám. 5Unimbɔti nín tìì-ni u-Fam ki ŋáań maamaacib ni-kansikinee, an sá ni nín ŋúb̀ Mooyiisi marabee pueeyaaa, ni nín fōō Tibɔmɔntiilee puee ní?

6Míǹ ní an sòon̄ Abraam pu yii: «Abraam nìn fōō Unimbɔti ki kíí, ní Unimbɔti ká u-fookiiu un u cáá u-puee, ní ki yíiń-u deedeedaan.» 7Ní béé yii bin fōō Unimbɔti ki kííyee di sá Abraam biyaamu. 8An lī Unimbɔti gbɔŋku poon dooooyee ki síiǹ, yii anibul ŋin kaa sá Juuda yabee nín fōō Unimbɔti ki kíí puee ní Unimbɔti kpántí-bi deedeedambi. An pu ní u nìn tùkū Abraam tibɔmɔntiil nee dooooyee yii: «Unimbɔti làá dī sii pu ní kí bìin̄ anibul ŋin kɔkɔ bí kitiŋ puee pu#3.8 B. 6: Diny 15.6, Room 4.3. - B. 7: Room 4.16. - B. 8: Diny 12.3..» 9Mimmee, bin kɔkɔ fōō Unimbɔti ki kííyee kāntí dibiindi kii Abraam nín nìn fōō kí kíí ki ká dibiindi puee ní.

10Ama, mbusu bí ki tīī un là kí dī Mooyiisi marab pu kí ŋmátée, kun puee an ŋmàn̄ yii: «Tin kɔkɔwoooo bi ŋmàn̄ marab gbɔŋku poon bí nīn ŋáańee, un sá kamaa yaa kaa ŋúb́ mimmee, mbusu bí ki tīī udaan.» 11Ní an cántì ki tùkū-ti yii ubɔ kaa ŋūǹ kí ŋúb́ marab kí kpántí deedeedaan Unimbɔti nimbiin. Di sá an lī yii: «Deedeedaan kāntí dimaŋfal u-fookiiu pu ní.» 12Marab nì fookii kaa sá ubaanti: di sá Unimbɔti gbɔŋku poon lī yii: «Un yaa ŋáań min Mooyiisi marab lēe kɔkɔee di ŋmátí#3.12 B. 10: Ditee 27.26. - B. 11: Abak 2.4, Room 1.17. - B. 12: kpèè Akoo 18.5, Room 10.5..»

13Ama Kriisitoo kpántì mbusudaan timbi pu ní ki nyántì-ti mbusu un marab cáańee poon, kii an nín ŋmàn̄ puee yii: «Un kamaa bi yaa lúntì busubu puee ń nīn sá-ni mbusudaan#3.13 Kpèè Ditee 21.23..» 14An di yì-tì ní Yeesu Kriisitoo puee, bin kaa sá Juuda yabee kāntí dibiindi din Abraam nìn kée. Ti nín fōō Unimbɔti ki kíí puee di yì-tì ní ti fòol̄ u-Fam min u nìn pōoǹee.

Marab nì dipoondi bɔti

15Nnabiyaamu, tí dū binib nín ŋáań puee kí ŋmàntīǹ tibɔti nee. Unil yaa bɔ́ntì u-bɔti ki ŋmàn̄ ki ŋá kugbɔŋun ki nyīī ŋŋal kii mara nín síiǹ puee, nì min kamaa an sá kinibiki di ŋée, ubɔ kaa ŋūǹ kí kpìtāaa, kaa tí ŋūǹ kí gbéeǹ tiba mun. 16Ní tin tin Unimbɔti nìn pōoǹ Abraamee, u nìn pōoǹ ki tīī u nì u-maaliŋu ní#3.16 Kpèè Diny 12.7.. Unimbɔti gbɔŋku poon kaa ŋmàn̄ yii, u nìn pōoǹ ki tīī Abraam biyaamu kupaau. U pée lī yii, u-maaliŋu, an dàkà yii u-maaliŋu poon unibaanti. Úǹ di sá Kriisitooyee. 17Tin tin m là kí lèe taapu sɔ̀. Unimbɔti nìn bɔ́ntì u-bɔti ki sòon̄ ki síiǹ. Abin tilaafati tili nì mmuŋku nì saalaa boon#3.17 Dūú ŋmàntī nì Disa 12.40. ní Mooyiisi marab bāań. Marabee kaa ŋūǹ kí kpìtī Unimbɔti poondi kí yàntī dí ŋá fám. 18An yaa sá marab pu ní Unimbɔti dì ki tìì-ti u-gaajatee, mimmee an kaa sá u-poondi pu dee. Ama an sá Unimbɔti nín nìn pōoǹ Abraam yii u làá tīī-u tigaajatee ní u tīī-u.

19Mimmee, ba pu ní bi yóoǹ marab? Unimbɔti dū marab ki kútì dipoondi pu binib ń béé ikpiti nín sá kuŋyee, ní marabee ń nīn bí ki cí ŋyunti ŋun Abraam maaliŋu poon yɔu un pu u pōoǹ dipoondee ń dāá bàńee. Unimbɔti tuuŋyi di cáań marab ki dūu tīī Mooyiisi, ní úǹ dūu nāatì Isirayeel yab#3.19 Kpèè Atuun 7.53.. 20Unil yaa bí u-baba nì u-baba ki ŋá u-bɔtee, unàatil kaa bí, míǹ ní Unimbɔti u-baba di pōoǹ dipoondi#3.20 Dūú ŋmàntī nì Ditee 6.4..

Mooyiisi marab tundi

21Mimmee, Mooyiisi marab jáà nì Unimbɔti poondi deeyaaa? Aayee, kpataaa! Unimbɔti yaa nìn tīī marab bin pu binib ŋūǹ kí dī kí ŋmátée, binib bàà ŋūǹ kí kpántí deedeedambi Unimbɔti nimbiin marabee pu. 22Ama Unimbɔti gbɔŋku poon bɔti tùkū-ti yii kitiŋ kɔkɔwoooo nib pīī ikpitin. Mimmee bin yaa fōō ki kííyee ŋūǹ kí fōō tin Unimbɔti pōoǹee, bi nín fōō Yeesu Kriisitoo ki kííyee pu.

23Kí wàatī fookii yuntiŋu ń bàńee, ti nìn pīī marab sarkaun ki cí fookii ń bàń. 24Marab di nìn cí-ti ki tin sāā ŋyunti ŋun Kriisitoo dāa bāańee, án nín làá ŋá pu tí ŋmā kí kpántí deedeedambi Unimbɔti nimbiin fookii puee. 25Fookii nín bāańee, marab kaa ti cí-ti.

26Kun puee ni nín fōō Yeesu Kriisitoo ki kííyee pu ní ni-kɔkɔ kpántì Unimbɔti biyaamu. 27Di sá yii nimbi bin kɔkɔ bi fùl̄ Unimbɔti nyim, ni ŋá ubaanti nì Yeesu Kriisitooyee, ni kpántì kii Kriisitoo nín bí puee dee. 28Digàntil kaa ti bí Juuda yab nì bin kaa sá Juuda yabee kansikin, kaa ti bí bin sá iyumbuee nì bin tɔ́ bi-bee kansikin, kaa tí bí bininjab nì binimpoobi mun kansikin. Nimbi kɔkɔ kpáfì ubaanti Yeesu Kriisitoo pu ní. 29Kii ni nín sá Kriisitoo yabee puee, ni kpántì Abraam maaliŋu poon yab ki ŋūǹ kí fōō tigaajati tin Unimbɔti nìn pōoǹee#3.29 Dūú ŋmàntī nì Room 4.13..

Currently Selected:

Galates 3: BASSARDC

Highlight

Copy

Compare