Galates 2

Pɔɔl nì akpambal ŋin kíǹee

1Dibindi diba kpá saalku boonee, ní m gítì Jeerusaleem. M nìn kpáaǹ Baarnaabaasi nì Tiiti#2.1 Kpèè Atuun 11.30, 15.2.. 2An sá Unimbɔti di nìn lēē ki dàkā-mi yii ḿ cù ní m cūtì. Ní m gāntì Kriisitoo nikitil kpilib ki kàan̄ ki tùkū-bi Tibɔmɔntiil tin m sòoǹ bin kaa sá Juuda yabee kansikinee. Maa là ditundi din m túńee nì din m bíi tūǹee ń ŋá fám. 3Ní baa páb́ Tiiti un sá Greeki, m-tɔntɔnjutee yii ú gíí dikpancandi. 4Ama biba dɔ́miń ki ŋmālim̀ ti-kansikin ki mɔ́ntì yii bi sá ti-nabiyaamu ama ní kaa sá. Bíǹ di bàà là ú gíí. An nibee ŋá soooo ki kɔ́ ti-kansikin kí cɔ̄ŋkì kí kpèè dibatɔl din ti cáá Yeesu Kriisitoonee, kí ŋmā kí gíiǹ-ti kuyuŋun. 5Taa pée pú-bi mpaan ŋyunti ŋubɔ poon báà fiii, Tibɔmɔntiil baamɔŋyi ń nīn bí ki tīī-ni.

6An yaa kíǹ bin bi yíì binikpaambee#2.6 Dūú ŋmàntī nì Ditee 10.17. - bi yaa sá biŋyee, man ceeyee an kaa páb́, kun puee Unimbɔti kaa gàntī binib -, binikpaambi kaa kútì tibɔti tiba Tibɔmɔntiil tin m sòoǹee pu. 7Áli gba, bi ká yii Unimbɔti dū bin kaa sá Juuda yabee ki ŋúbiǹ-mi ḿ sòoǹ nì bi Tibɔmɔntiil, kii u nín dū bin sá Juuda yabee ki ŋúbiǹ Peetroo puee. 8Di sá yii Unimbɔti un yāntì Peetroo kpántì Yeesu kpambal Juuda yab kansikinee di yāntì ma mun kpántì u-kpambal bin kaa sá Juuda yabee kansikin. 9Ní Yakubu nì Peetroo nì Yoowaneesi, bin pu bi nyí yii bi sá Kriisitoo nikitil kpilibee, béè yii Unimbɔti di pú-mi an pɔŋŋu. Bi nìn tīī man nì Baarnaabaasi kuboou ki dàkā yii ti-kɔkɔ ŋá ubaanti, timbi ń cù bin kaa sá Juuda yabee cee, bíǹ ń cù Juuda yab cee. 10Ama tin baba bi mēē-tee di sá yii tí taa súntí biwɔfib pu, tibɔti tin mun nìn pée bí m-pɔbilin m ŋáańee dee#2.10 Kpèè Atuun 11.29-30..

Pɔɔl wòon̄ Peetroo Antiyɔɔsi

11Ama, ŋyunti ŋun Peetroo nìn dɔ́miń Antiyɔɔsee#2.11 Antiyɔɔsee: kpèè Atuun 11.19-26., m nìn wòon̄-u u-nimbiin, kun puee u nìn yīntì. 12Di sá yii, kí wàatī ní binib biba ń nyānní Yakubu cee kí dāan̄ Antiyɔɔsee, u nì bin kaa sá Juuda yabee nìn kpáfí ki jīǹ tijin. Binib bin là báà ŋma ń gīfì dikpancandee bāańee, ní u fāŋkì-bi, ní ki kíǹ ki bāal̀, kaa ti là u nì bin kaa sá Juuda yabee ń kpāfì. 13Ní Juuda yab bin kíǹee mun fōō u-biibiiu gbanti, áli gba ki téé Baarnaabaasi mun ki kɔ́ǹ biibii gbantin. 14M nín ká yii baa ti bíi còom̄ deedee kii Tibɔmɔntiil baamɔŋyi nín sá puee, ní m lī Peetroo báà ŋma nimbiin yii: «Sii un sá Juuda yɔuee yaa kaa nóó Juuda yab bimbim, ní ki yaa fōō bin kaa sá Juuda yabee bimbimee, ba ŋá ní a là kí páb́ bin kaa sá Juuda yabee bí fōō Juuda yab bimbim?»

Fookii pu ní unil dì kí ká difiil

15Bi màl̄ timbi ti sá Juuda yab, kaa sá biniyaŋyambi bikpitib. 16Nì míǹ kɔkɔee, ti nyí yii ti nín fōō Yeesu Kriisitoo ki kííyee di yàntī ti kpántí deedeedambi Unimbɔti nimbiin, an kaa sá Mooyiisi marab ŋúbitam pu. Ti mun fōō Yeesu Kriisitoo ki kíí ní ki kpántì deedeedambi dimákal din ti cáá Kriisitoo puee, kaa sá marabee ŋúbitam pu. Di sá yii báà ubɔ kaa ŋūǹ kí kpántí deedeedaan#2.16 ubɔ kaa ŋūǹ kí kpántí deedeedaan...: kpèè Ilan 143.2, Room 3.20,22. Unimbɔti nimbiin nì marab ŋúbitam pu. 17Ti nín nyàab̀ kí kpántí deedeedambi Kriisitoo puee, ti béè yii timbi mun sá binikpitib dee. Mimmee Kriisitoo yàntī tikpitil wīintáaa? Aayee, kpataaa! 18Ama, m yaa fātìi máń kun m nìn gbáń ki wīīyee, m kpántì uyintil dee m-ba. 19Di sá yii marabee yāntì m kpíì ki nyáń marab taapu, kí ŋmā kí nīn bí ki tīī Unimbɔti. Man nì Kriisitoo di kpáfì ki kpíì ndɔpuntikaa pu. 20M nín bí nee, kaa ti sá man di bí, Kriisitoo di bí m-ni. M nín bí dimaŋfalinee, Unimbɔti Jipɔɔn ní m fōō ki kíí, úǹ di néeń-mi ki dū u-ba ki tīī man pu. 21Maa kpèé Unimbɔti ŋanti fám. An yaa bàà sá Mooyiisi marab ŋúbitam pu ní unil dì kí kpántí deedeedaan Unimbɔti nimbiinee, mimmee Kriisitoo kpíì fám deeyaa.

Currently Selected:

Galates 2: BASSARDC

Highlight

Copy

Compare