Esther (grec) D
D
Eesiteer nín cá ubɔti cee
48 Ŋwintataati dalee, tin nìn jítèe sɔ̀. Eesiteer nìn gbēeǹ ŋwimmeem. U nìn cúú tiwan tin u nìn pēē ki bíi gbàam̄ Unimbɔtee ki pēetì, ní ki dū tiwannyaandi ki pēeǹ. 49 Tiwannyaandi gbanti poonee ní u kúuǹ ki yíiń Unimbɔti un wāĺ tikɔkɔ ní ki fìil̄ unilee ú jòoń-u. Míǹ boonee ní u yōoǹ u-tɔntɔnliibi bisapɔmbi bili ki páaǹ u-boon. 50 U nìn nyīī bi-kansikin ubɔ pu soooo, 51 ní un kíǹee pá u-boon ki ŋúb́ u-bɔkutifɔkɔl. 52 An nìn ŋá-u nyàaa, ní u-nyaaŋkpaaŋku poonee, u nìn bútì u-nimbiin kii unil un dineendi cúu kpántèe. Ama u nìn bí dipɔɔbiildi poon.
53 Eesiteer nìn cōom̀ ki jítì kubɔtinaakoou punyɔmmu kɔkɔ ní ki cūtìi yúl̀ ubɔti nimbiin. Úǹ nìn kā u-beejal pu u-wannyɔkɔntikaati kɔkɔ píń u-pu kii u yaa làá nyā binib kansikinee. Sindaariya nì ataŋkpamɔnti wanti nìn píń u-pu, ní u nìn cáá tifaandi an kaa cáá bí lì. 54 U nìn yáatì u-yil u-nimbiin jìl̀ pàlpal kii ŋŋmee. U-ŋuul poonee, u nìn fātìi kpēē an kɔkɔ pu. Unimpubɔti nìn pɔ̄fiǹ ní u-nimbiin cúu kpántì. U nìn fìkī ní ki cūtìi páaǹ u-tɔntɔnliu un còom̄ ki līī u-nyɔkɔpuee pu. 55 Niinee Unimbɔti cúú ubɔti pɔbil ki kpántì ní ki dū mmɔn ki gbéeǹ-dì. An nìn páb́ ubɔti ní u yíkì u-beejal pu malaa ní ki yōoǹ Eesiteer u-ŋalii poon ki tin sāā ŋyunti ŋun u jɔ́mìńee. U nìn sòon̄ nì u anyɔɔbummɔɔn ki sɔ̄ŋkì u-pɔbil. 56 U nìn bālifì-u yii: «Ba kpá-si ní, Eesiteer? M sá a-niija ní, ká dipɔbil! Taa fàŋkì. 57 Aa làá kpú. Di sá yii ti-marau sá ki tīī binifantantiibi ní. 58 Sútiń!» 59 Niinee ní u dúkutì u-kpandɔŋu ŋun sá sindaariyee, ki dūu páaǹ Eesiteer sil pu. Míǹ boonee ní u kpàl̄-u ní ki bí-u yii: «Sòoǹ nì mi.» 60 Eesiteer nìn kíí-u yii: «M-bɔtiu, m nín ká-see, a lì kii m ká Unimbɔti tuuŋŋuee ní. M-pɔbil bíil̀ ní m fāŋkì ní ki fāŋkì a-nyooti. 61 Di sá yii a mɔ̄ nnimbikpee ní a-nimbiin mun ŋān̄.» 62 Ŋyunti ŋun unimpubɔti bíi sòoǹee ní u fātìi tí fìkī. 63 Ubɔti kaa nìn gíti nyí tin poon u bée, ní u-tɔntɔnliibi kɔkɔ nyàab̄ kí fàtīí yàntī ú jɔ̄mìń.
Currently Selected:
Esther (grec) D: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.