Esther (grec) 5
5
3Niinee ní ubɔti bālifì-u yii: «Ba ní a là ní, Eesiteer? Ba ní a dɔ́miń kí bàlifì-mi ní? M kíí kí tīī-si m-beel dijandi gba.» 4Ní Eesiteer kíí-u yii: «Díǹ wiiŋŋu sá ŋwiŋkpaan ní ki tīī-mi. An yaa bàà fáatì ti-baa ubɔtee, u nì Amaani ń bàà dāan̄ m-cee díǹ kí jī tijin tin m bɔ́ntèe.» 5Ní ubɔti tú unil dicilpu niin ú tùkù Amaani yii ú bɔ́ntí malaa malaa kí dāan̄ bí cùú jī tin Eesiteer bɔ́ntì ki yíiń-bee. Ní Amaani nì ubɔti liitil nín cá kí jī tin Eesiteer bɔ́ntì ki yíiń-bee. 6Bi jíń tijin ki dóòyee ní ubɔti bālifì Eesiteer yii: «Ba ní a là ní, unimpubɔti Eesiteer? Tin a yaa pée bālifèe, m làá ŋá kí tīī-si.» 7Ní Eesiteer kíí-u yii: «A bí yii tin m yaa bālifì-see yaa! 8Ti-baa ubɔti, m yaa ká diyimɔɔl a-cee, m gbàam̄-si yii sii nì Amaani ń fu gítiń fool kí dāá jī tijin tin m làá fu tí bɔ́ntí kí tīī-nee. M làá fu tí bɔ́ntí kii m nín bɔ́ntì pu díǹ nee ní.»
Amaani bɔ́ntì ndɔ kí lúntí Maardoosee
9Yaadalee Amaani nìn nyáń ubɔti dumpu an mɔ́ɔkiǹ-u u-pɔbil píil̀. Ama dibeecindinee, u ká Maardoosee ujuudaja, ní u fōō u-pu diŋuul ŋkpitim pu. 10U nín kùǹ ki bàn̄ u-dumpuee ní ki yíiń u-bɔɔbi nì u-nimpuu Soosara. 11Amaani nìn bíi sòoǹ nì bi u-gaajati nì ubɔti nín ŋá tin kɔkɔ ki tīī-u tinyool puee. Di sá yii ubɔti dū-u ki kāaǹ mpaan ŋun jítiǹ u-kàliŋkpilib kɔkɔ puee ní ki dū dibeel ki ŋá u-ŋaan ú nīn kpòotī. 12Amaani nìn kútì ki lī yii: «Unimpubɔti Eesiteer nín ŋá tican ki yíiń ubɔtee, man baba ní u yíiń ḿ céeǹ ubɔti, ní ti cūtì díǹ ki jíń. U gíti tí yíiń-ti fool man nì ubɔti tí fu tí cù u-cee kí jī. 13Ama tin bí nee kaa pée tìì-mi mmɔn ŋubɔ, ŋyunti ŋun ní Maardoosee ujuudaja gbíntìi kā u-paaŋŋu dibeecindi nyɔkɔpu m wāĺ-uee.» 14Niinee ní u-nimpuu Soosara nì u-bɔɔbi kɔkɔ bí-u yii: «Nyàab̀ ndɔ ŋun fɔ̀kɔ̀ kii meetab mmuŋku nì biŋmooyee. Fool kutaafaauee, á fu gbàam̀ ubɔti yii bí dū ŋŋmii kí kúĺ Maardoosee neen kí cáá-u kí lúntí ndɔ pu ní sii nì ubɔti ń nīn cá jiŋaal nì dipɔɔsɔŋkil.» An nyɔɔbundee mɔ́ɔkiǹ Amaani, ní u yāntì bi bɔ́ntì ndɔ ki yóoǹ.
Currently Selected:
Esther (grec) 5: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.