Esther (grec) C
C
Maardoosee wimmeem
18 Maardoosee nìn téetì ti-Dindaan tuuŋŋi kɔkɔ pu ní ki mēē-u yii:
19 Ti-Dindaan, ti-Dindaan, ubɔti Mpɔŋkɔdaan, duulinya kɔkɔ kā a-ŋaan ní. A-lammi yaa sá yii á fīī a-nibul Isirayeelee, ubɔ kaa làá ŋmā kí já nì si. 20 Sii di náań kutagbɔŋu nì kitiŋ nì tiwammɔntiil tin kɔkɔ bí kitiŋ puee. 21 Sii di sá tiwan kɔkɔ Dindaan, ní ubɔ kaa ŋūǹ kí yūĺ sii ti-Dindaan nimbiin kí jáǹ-si. 22 Ti-Dindaan, a nyí tikɔkɔ. A nyí m nín yíì kaa gbāaǹ Amaani un gbí dilambil nee nimbiinee. Maa ŋá míǹ yii m là kí dàkà m-ba u-nimbiin, àá m là kí kpèè-u fám àá m dàkafī kí jītíǹ-u pu. 23 Ama m bɔ́ntì kí líntí u-taaŋi kí fīī Isirayeel nibul. 24 M ŋá míǹ kí taa dū jilma un bi máaǹ kí tīī unilee kí tɔ́kɔń Unimbɔti jilmau pu ní. M kpá kí gbàan̄ unil nimbiin, an yaa kaa sá sii ti-Dindaan baba nimbiin. Tin bí nee kaa sá dibayoondi bɔti.
25 «Too kɔŋkɔnnee, ti-Dindaan, sii un di sá Unimbɔti nì ubɔtee, sii Abraam Nimbɔtiuee, wúń a-nibul pu. Tiŋman, ti-nannanliibi nimbiliŋ làaǹ ti-pu ki nyàab̀ kí nàan̄-ti. Bi bíi màkafī kí kúntí bin sá a-yab doooo talkuee. 26 Taa fàtī a-boon kí tīī dinibul nee, sii di yì-dì. Di sá yii sii di dá-dì ní ki fīī-dì ki nyántì Eejipiti yab ŋaan. 27 Kpòon̄ a-tafal kí pīlifì m-wimmeem. Dàkà bin sá a-yabee kulaŋŋaŋfitiiu. Yàntī ti-nimbaaku ń kpántí mmɔn. Niinee ti làá nīn gbíntìi bí dimaŋfalin ní tí gāā ilan kí nyɔ̄ŋkì-si, ti-Dindaan. Taa yàntī bí kúntí bin gà ilan ki nyɔ́ŋkí-see.»
28 Isirayeel yab nìn gbáà ibiil nì bi-pɔŋŋu kɔkɔ ki yíì ti-Dindaan, di sá yii bi nìn wāĺ bi-kúm ní.
Eesiteer wimmeem
29 Unimpubɔti Eesiteer nìn bí ki mɔ̀ nì ŋkúm. U mun nìn nyàab̄ dijòońdi ti-Dindaan cee. 30 U nìn cúú u-bɔkutinyaaŋŋi ki pēetì, ní ki dū kpɔsatab ki pēeǹ. An nín bàà sá ú yàaǹ u-ba pu talaalumɔntiibee, ŋfantam nì ntam ní u dūu pùkū u-yil. 31 U nìn mēē ti-Dindaan Isirayeel Nimbɔtiu yii:
«M-Dindaan ti-Bɔtiu, sii baba di sá Unimbɔti. Dāá jòoń-mi! M bí m-baba ní. Ubɔ kaa ŋūǹ kí tūtuǹ-mi an yaa kaa sá sii. 32 Di sá yii m làá dū m-maŋfal kí tīī ní nee. 33 Doooo m-biyatin m-naanjab naakookunee, m gbìl̄ bi sòon̄ yii sii ti-Dindaan, a lēē Isirayeel nibul atimbun kɔkɔ kansikin, ní ki lēē ti-naanjab naanjab bin kɔkɔ kíǹee kansikin. A dū-bi ki kpántì a-nibul kí nīn cá jaanjaan. Tin kɔkɔ a nìn pōoǹ-bee, a ŋá míǹ kɔkɔ ki tīī-bi. 34 Too kɔŋkɔnnee, ti yīntiǹ-si ní a dū-ti ki líiǹ ti-nannanliibi 35 kun puee ti nyɔ́ŋkì bi-waaŋi. Ti-Dindaan, a sá deedeedaan ní! 36 Ama kɔŋkɔnnee, ti-nannanliibi nín wɔ́b́-ti puee kaa bàn̄-bi. Bi pūtì ki pōoǹ bi-waaŋi 37 kí kúntí marab bin di nyánní a-nyɔkɔnee. Bi là kí kúntí dinibul din sá a-yalee ní kí pìin̄ bin gà ilan ki nyɔ́ŋkí-see nyɔmmu. Bi là kí nàan̄ a-diiku kun cáá tinyoolee nì a-saraafaŋŋu. 38 Bi là kí ŋá míǹ kí pɔ̄ atimbun ŋin kíǹee nsan bí nīn gà bi-biŋŋi bi-waaŋi pu, ní kí nīn pée pàkà ŋyunti kamaa ubɔti un di sá nisaaleenee.
39 Ti-Dindaan, taa dū a-bɔtikpandɔŋu kí líiǹ awaa ŋin kaa bí tiban nee. Taa yàntī bí nàan̄-ti kí nīn bèel̄-ti. Ama á yàntī bi nín bɔ́ntì kí ŋá-ti puee ń gítí bi-pu. Dáaĺ un di ká nlandɔkɔ gbantee tafal ŋkpitim pu ú kpántí ŋabika.
40 «Ti-Dindaan, taa súntí ti-pu! Ti-nimbinaamandi yuntiŋu nee poonee, á lēē a-ba kí dàkà-ti. Tīī-mi dipɔbil, sii un di sá inimbɔti Bɔtiu nì ipɔn kɔkɔ Dindaanee. 41 Dū anyɔɔbummɔɔn kí ŋá m-nyɔkɔn ŋyunti ŋun ní m làá cùú yūĺ ubɔti un sá kii gbikinti nee nimbiinee. Kpántí u-pɔbil ú nīn kíǹ ki ná un bíi jáà nì ti nee. Ú kpɔ̀ u nì u-naacimbi. 42 Dū a-pɔŋŋu kí fīī-ti kí nyāntí u-ŋaan. Ti-Dindaan, dāá jòoń-mi, kun puee m bí m-baba ní kaa cáá ubɔ ń tūtuǹ-mi. A nyí tikɔkɔ, 43 a nyí m-nimbil nín kaa là kí wāl̀ bin kaa tɔ́ a-marauee nyootee. An cáá-mi titantan man nì un kaa nyí-see nì un kaa sá a-nibul yɔuee ubɔ ń kpāfì kí dòon̄ ndoobaanti pu. 44 Ama sii a-ba nyí yii maa là ní ki ŋá míǹ. M ná unimpubɔti beefuuliiki kin m cīkintí kí nyā binib kansikin nee. Kì cáá-mi titantan kii kucaliŋkpuŋu kun táká fatikuee ní. An puee maa cīkintí-kì iyunti in kíǹee. 45 Mama a-tɔntɔnliu, man nì Aaman kaa kpáfì ki jíń tijin, ní ubɔti nín ŋá tican ki yíiń binib bí dāan̄ kí jēe, maa tí cūtì. Maa tí nyùn̄ ndaam min u féeń u-waaŋee#4.28c Kpèè Dani 1.8, Judii 9.10-13.. 46 Kí yòon̄ ŋwiin ŋun m kpántì unimpubɔti ki dāa sāā díǹ nee, maa pée ká nnaam ki ká, asee sii ti-Dindaan, Abraam Nimbɔtiu cee ní m ká. 47 Unimbɔti, sii un di cáá mpɔn ki jítiǹ báà ŋmee, pīlifì bin kaa ti cáá dimákal nee biilii. Fīī-ti kí nyāntí binikpitib ŋaan, ní kí fīī-mi tifaandi ŋaan.»
Currently Selected:
Esther (grec) C: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.