Esther (grec) 4
4
Eesiteer nì u-nibul
1Maardoosee nín gbìl̄ tin kɔkɔ jítèe, ní u dáaĺ ki cátì tiwan tin u pēēyee. U nìn dū kutukub ki pēeǹ, ki dū ŋfantam ki pùkū u-ba, ní ki nyáń kitiŋin ki gbáà ibiil mpɔn ki yáliŋkí. 2U bàn̄ ubɔti mɔŋkiŋu punyɔkɔki nyɔkɔpuee ní ki yúl̀, kun puee ubɔ kaa nìn cáá nsan kí nīn pēē kutuku ki pùkū ŋfantam kí kɔ́ ubɔti cindi. 3Míǹ ní kitiŋ jaaŋŋi laakin kamaa ní mara un ubɔti yóoǹee yaa bàn̄ee, an nìn sá dikpool ní Juuda yab cee. Bi nìn yáliŋkí ki fátí bi-biŋŋi, ní ki pēē kutukub ki dɔ̄ ŋfantamin ki bíntí.
4Eesiteer tɔntɔnliibi bisapɔmbi nì u-faabi cūtìi tùkū-u tin bi kée, ní u-pɔbil bíil̀ tikpil. U nìn nyàab̄ abɔkuti ki tīī-bi bí cáá tīī-u, ú pèetī kutukub bin u pēēyee kí dū abɔkuti ŋin u tīī-uee kí pèen̄, ama ní Maardoosee yíì. 5Niinee ní Eesiteer yíiń Akiratayii, ufaal un nìn bí u-tundinee ki tú ú cùú bàlifì Maardoosee kí béé kun di yì-tì ní u bíi ŋáań mimmee. 7Maardoosee nìn máafì-u tin kɔkɔ jítèe, nì animbil tɔɔnib alaataa ata ŋin Amaani pōoǹ kí ŋá kitiŋ nimbiliŋ dakaaun kí ŋmā kí kpɔ̀ Juuda yabee. 8U nìn dū kugbɔŋu kun bi ŋmàn̄ Suusi an gbītì an kɔkɔ yii bí kpɔ̀ kí céetí Juuda yabee ki tīī-u ú dūú dàkà Eesiteer. Maardoosee nìn gíti kútì ki tùkū-u yii: «Á tīī Eesiteer mara ú cù ubɔti cee kí gbàam̀-u. Ú gbàam̀ ubɔti ú sɔ̄ u-nibul Juuda yab saai.» U nìn gíti tùkū-u yii: «Á téetí ŋyunti ŋun ní a nìn bí ki sá sɔkɔmii niliu m nìn kpīintí-see pu. Di sá yii Amaani un pá ubɔti puee sòon̄ nì u ti-pu kí kpɔ̀-ti. Mèè ti-Dindaan! Sòoǹ nì ubɔti ti-pu! Fīī-ti kí nyāntí ŋkúm ŋaan.» 9Ní Akiratayii cáá tibɔti gbanti kɔkɔ ki tùkū Eesiteer. 10Niinee ní Eesiteer bí Akiratayii yii: «Cùú tùkù Maardoosee yii: 11<Bin kɔkɔ kóò dibeel nee poonee nyí tiŋan pu yii unimpueeee, uninjeeee, un kamaa ní ubɔti yaa kaa yíiń ní udaan jítìi kɔ́ dibeecindinee, see bí kpɔ̀-u. Asee ubɔti yaa tāntì u-bɔtikpandɔŋu ŋun sá sindaariyee ki tīī-u baba ní udaan ŋmátí. Ama man ŋá iwiin mmuŋku nì saalaa dee ubɔti kaa yíiń-mi ḿ cù u-cee.» 12Ní Akiratayii cáá Eesiteer nín lī puee ki tùkū Maardoosee. 13Niinee ní Maardoosee kíí Akiratayii yii: «Cùú tùkù Eesiteer yii: <Á taa dàkafì yii sii baba di làá ŋmátí Juuda yab kɔkɔ kansikin kitiŋ nee poon. 14Di sá yii a yaa yíì kaa ŋá tiba agìń yuntii nee poonee, dijòońdi nì diwundi làá nyānní laaba kí tīī Juuda yab. Ama sii nì a-baa dicaŋkun yab kɔkɔ làá kpú. Ŋma tin nyí an yaa kaa sá tin bí nee pu ní a kpántì unimpubɔti?>» 15Niinee ní Eesiteer fātìi gíiǹ ntuunee ki tú ŋú cùú tùkù Maardoosee yii: 16«Á cù kí kpāfì Juuda yab bin kɔkɔ bí Suusi tiŋkinee, ní bóob́ kinyɔkɔ kí mèè kí tīī-mi. Ní taa jī kí taa nyɔ̀ iwiin ita ŋwiimpu nì kunyeeu. Ma mun nì m-tɔntɔnliibi binimpoobi làá ŋá míǹ mbaantiim. Míǹ boonee, nì min kɔkɔ mara kaa pú nsanee, m làá cùú ká ubɔti, ní an yaa sá ŋkúmaaa ḿ kpú.» 17Niinee ní Maardoosee nín cá ki cūtìi ŋá kii Eesiteer nín tīī-u mara ú ŋá puee.
Currently Selected:
Esther (grec) 4: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.