Deutéronome 17

1Ní taa dū unaa àá upii un laaba wɔ̀b̄ee àá un pu tiba pée bí kaa ŋān̄ee kí ŋá saraa kí tīī ti-Dindaan ni-Nimbɔtiu, di sá yii an sá ntimbiil ní ti-Dindaan ni-Nimbɔtiu nimbiin.

2Ntimu mun ti-Dindaan làá dūú tīī-ni ní nīn kóò nee kansikin kiba poon, uninja àá unimpu ubɔ yaa bíi ŋáań min kaa kítì ti-Dindaan ni-Nimbɔtiu ceeyee, u kōotì mpèé koobil dee. 3Tí lì yii udaan cūtìi bíi tòotī awaa ki gbàantí ŋi-taapu àá ki gbàantí ŋwìiń àá uŋmal àá iŋmalbijaa in bí kutaa puee taapu. Man ni-Dindaan mun kpáafì-ni yii ní taa ŋá míǹ jaanjaan. 4Ni yaa gbìl̄ bi máafì-ni tiba mimmee, ní mɔ̀tīí cɔ̄ŋkì tiŋan kí kpèè yii an sá ibaamɔnaaa, an kaa sá. An yaa lafun sá ibaamɔn yii ubɔ ŋá ntimbiil tuuŋŋi gbanti Isirayeel tiŋki puee, 5ní nyāntí uninja àá unimpu un ŋá atuŋkpiti gbantee ni-tiŋki punyɔkɔki#17.5 Bi nìn nyāntí un ŋá ikpitee kitiŋ kpaanceetiŋu ní kí nín kpɔ̀-u, kpèè Akoo 24.14, Atuun 7.58, Eebru 13.12. ní kí yāŋkì-u ataŋkpee ú kpú.

6Binib bili àá bita yaa lēē ubɔ pu seera yii udaan máaǹ ŋkúmee, bí kpɔ̀ udaan. Unibambaanti seerau kaa ŋūǹ kí yàntī bí kpɔ̀ udaan#17.6 Kpèè 19.15, Dikà 35.30, Maat 18.16, 2 Kɔra 13.1, 1 Tiim 5.19, Eebru 10.28.. 7Biseeradambi di máaǹ kí péé kí yā udaan ataŋkpee kí kpɔ̀, ní samaa un kɔkɔ kíǹee ń nín páań. Ní ŋá míǹ kí nyāntí ikpiti ni-kansikin#17.7 Kpèè 1 Kɔra 5.13..

Ibɔsoon

8Bi yaa cáań nnikpaakoon bɔti àá kujaau bɔti àá ubɔ ŋá u-juti tiweendi tiba ki bíl̀ ni-nimbiin ni-bɔsoondiikun ní ni ká yii tibɔtee pɔ̄ɔ̄ ní ŋmā kí sòoǹ-tèe, ní cù mpaan ŋun ti-Dindaan ni-Nimbɔtiu làá dāá lēēyee pu. 9Ní ká Leefii yab bin sá bisaraaŋaliibee nì un sá ubɔsoonli ŋyunti gbantee, ní bíǹ ń sòoǹ tibɔtee kí tīī-ni. 10Tibɔtee nín sá pu bi dūu tùkū-ni mpaan ŋun ti-Dindaan lēēyee puee, ní ŋá míǹ deedee. Ní pɔ́ɔǹ kí ŋá kii bi nín kpáafì-ni ní ŋá puee deedee. 11Bi nín sòon̄ tibɔti gbanti ki síiǹ puee nì tin bi tùkū-ni yii ní ŋée, ŋámaan míǹ nyíki nyiki. 12Ama ubɔ yaa ŋá dilambil ki kpákáǹ usaraaŋakpil un yú ki bíi tūǹ ti-Dindaan Unimbɔti tundee àá ubɔsoonli nín lī puee, ní kpɔ̀ udaan. Ní ŋá míǹ kí nyāntí ikpiti gbanti Isirayeel yab kansikin. 13Samaa kɔkɔ làá dāá gbìl̄, ní kí fàŋkì kí taa ti ŋá dilambil míǹ dalba dalba.

Dibeel bɔti

14Ni yaa láa kɔ́ kitiŋ kin ti-Dindaan ni-Nimbɔtiu làá dūú tīī-nee poon ní ki ká ŋkakaa ki kāl̀ ní ki yaa láa lī dalba yii: «Yàntīmaan tí kàan̄ ubɔti ú nīn kpòotī-ti kii anibul ŋin māntìi tú-tee nín cáá pueeyee#17.14 Kpèè 1 Sami 8.5.», 15ní dāá dū unil un ti-Dindaan ni-Nimbɔtiu u-ba làá lēēyee kí kàan̄ dibeel. Udaan dāa máaǹ kí nīn sá ni-nabiyaamu Isirayeel nib kansikin ubɔ ní. Ní taa dū unicaan un kaa sá Isirayeel niliuee kí kàan̄ dibeel. 16Ama udaan kaa dāa máaǹ kí nīn cáá itaamu tikpil, àá kí tɔ̄ binib bí cù Eejipiti tiŋkin kí dāń-i#17.16 Dūú ŋmàntī nì 1 Bib 10.26-28, 2 Kroo 1.14-16., di sá yii ti-Dindaan nìn tùkū-ni yii: «Ní taa pée fàtīí gítí niin». 17Waa dāa máaǹ kí nīn cáá kunimpupaau, án làá dāá yàntī ú fá Unimbɔti. Waa dāa tí máaǹ kí nīn cáá animbil nì sindaariya tikpil#17.17 kunimpupaau : kpèè 1 Bib 11.1-8, animbil nì sindaariya: kpèè 1 Bib 10.14-27, 2 Kroo 1.15, 9.13-27..

18Bi yaa láa kāaǹ-u dibeelee, ú dāá ŋmà marab bin Leefii yab bin sá bisaraaŋaliibee kpáafèe kí ŋá kugbɔŋun kí tīī u-ba. 19Marab gbanti ń nīn bí ki kɔ́ĺ-u ú nīn kàaǹ-bi baabadal kí cáá sāā u-kúm dal. Mimmee u làá bīfì kí nīn fàŋkí ti-Dindaan u-Nimbɔtiu, ní kí nīn ŋúb́ abɔkpaa nì akoobil ŋin kɔkɔ kā marab gbɔŋku gbanti poonee. 20U yaa kàaǹ marab gbanti mimmee, án làá yàntī ú taa nín̄ yòontí u-ba yilpu kí dàkà yii u jítiǹ u-nabiyaamu mun kíǹee, ní kí taa kpèè marab biba fám kí taa nín̄ tɔ́-bi. U yaa ŋá míǹ, u nì u-naantiibi làá jī dibeel Isirayeel tiŋki pu kí yúntí.

Currently Selected:

Deutéronome 17: BASSARDC

Highlight

Copy

Compare