Deutéronome 16

Dilákatil jiŋaaliu

1Ní nīn nyí kí jī Abiibi ŋmaliu poon, Dilákatil jiŋaaliu kí tīī ti-Dindaan ni-Nimbɔtiu tinyool. Di sá yii uŋmal gbanti poon nyeeku kubɔ ní u nìn nyántìń-ni Eejipiti tiŋkin. 2Ní dāá lēē ni-piii àá ni-ŋoobui àá ni-naai poon tiwaŋkuti tiba kí kpɔ̀ kí ŋá Dilákatil jiŋaaliu saraau kí tīī ti-Dindaan ni-Nimbɔtiu. Ní dāá ŋá saraa gbanti mpaan ŋun pu ti-Dindaan làá dāá lēē kí nīn bí ní nīn cá ki jáaḿ-uee. 3Jiŋaal gbanti poonee, ní taa láa ŋmɔ́ kpɔnɔ un cáá ŋkpɔnɔnyɔkɔee. Ní dāá dū iwiin iluli gbanti kɔkɔ kí ŋmɔ́ kpɔnɔ un kaa cáá ŋkpɔnɔnyɔkɔee. Ni yaa láa bíi ŋmóò dinimbinaamandi kpɔnɔu gbantee, ní dāá téetí ni nín nìn jìkī kpàti kpati ki yíkì Eejipiti tiŋkin puee. Ní dāá ŋá míǹ kí nīn téetí ŋwiin ŋun ní ni nìn nyáń Eejipiti tiŋkinee, iwiin in kɔkɔ ni cáá kí kàl̄ kitiŋ pu dooyee. 4Iwiin iluli gbanti kɔkɔee, bí taa láa ká ŋkpɔnɔnyɔkɔ báà fiii pu gba ni-cee, kitiŋ kɔkɔ poon. Ŋwimpeekaa dal jooku, ni yaa láa kūū kuwaŋkuluu ki ŋá saraayee, ní taa láa yàntī kutaa ń wúntí saraa gbanti nanti pu. 5Naa dāa máaǹ kí ŋá Dilákatil jiŋaaliu saraau ntimu mun ti-Dindaan ni-Nimbɔtiu làá tīī-nee kansikin kiban kii ni nín là puee. 6Asee mpaan ŋun ti-Dindaan làá dāá lēē kí nīn bí ní nīn jáaḿ-uee baba pu ní ni dāa máaǹ kí ŋá saraa gbanti. Ní dāá ŋá saraayee kujoopɔŋ kii ŋyunti ŋun ni nìn nyáń Eejipiti tiŋkinee. 7Ní dāá tɔ́kɔń tinan gbanti kí ŋmɔ́-tì mpaan ŋun pu ti-Dindaan ni-Nimbɔtiu làá dāá lēēyee. Kutaa yaa láa wúntì kutaafaauee, ni dāa ŋūǹ kí fàtīí gítí ni-tantibin. 8Ní dāá dū iwiin iluu kí ŋmɔ́ kpɔnɔb bin kaa cáá ŋkpɔnɔnyɔkɔee, ní ŋwinluluútee ní kpāfì kí jāam̀ ti-Dindaan ni-Nimbɔtiu kí púntí jiŋaal. Ŋwiin gbantee, naa dāa máaǹ kí tɔ̄ báà diba#16.8 B. 1-8: kpèè Disa 12.1-20, Akoo 23.5-8, Dikà 28.16-25..

Pantikooti jiŋaaliu

9Ni yaa láa kíĺ ki bíi cēē ni-kpaajintee, ní dāá kàaǹ nnyɔmu mululi, 10ní kí jī Pantikooti jiŋaaliu kí jāam̀ ti-Dindaan ni-Nimbɔtiu. Ní dāá ŋá nlammɔntiim saraau kí nóó nì ti-Dindaan ni-Nimbɔtiu nín bīiǹ ni-pu puee. 11Ní dāá cù ti-Dindaan ni-Nimbɔtiu nimbiin laakin u làá dāá lēē kí nīn bí ní nīn jáaḿ-uee, nimbi nì ni-jipɔmbi nì ni-bisalib nì ni-tɔntɔnliibi nì Leefii yab bin kóò ni-timmunee nì binicambi bin kóò ni-puee nì ataŋkpiibil nì bikpiipoobi bin mun kóò ni-timmunee, ní ni-kɔkɔ ń fàal̀. 12Ní téetí yii ni nìn sá iyumbu ní Eejipiti tiŋkin. Ní ŋúb́ abɔkpaa nee tiŋan kí ŋá ŋi nín bí yii ní ŋá puee#16.12 B. 9-12: kpèè Akoo 23.15-21, Dikà 28.26-31..

Tantib jiŋaaliu

13Ni yaa láa gbáń ni-kpaajinti ní ki yaa láa ŋmáaḿ ni-damam subiliŋ ki dóòyee, ní dāá jī tantib jiŋaaliu iwiin iluli. 14Ní dāá jī jiŋaal gbanti nì ifaal poon, nimbi nì ni-jipɔmbi nì ni-bisalib nì ni-tɔntɔnliibi bininjab nì binimpoobi nì Leefii yab nì binicambi bin kóò ni-puee nì ataŋkpiibil nì bikpiipoobi bin kóò ni-timmunee. 15Ní dāá dū iwiin iluli kí jī jiŋaal kí tīī ti-Dindaan ni-Nimbɔtiu tinyool laakin u làá dāá lēēyee. Di sá yii ti-Dindaan ni-Nimbɔtiu làá dāá bìin̄ ni-boon ni-kpaajinti ń lòoǹ ní kí dāá bìin̄ ni-tuuŋŋi kɔkɔ pu. An puee ní dāá nīn bí mmɔŋkpaanni#16.15 B. 13-15: kpèè Akoo 23.33-43, Dikà 29.12-38..

16Ŋfunyɔm mita dibindi kamaa poonee, ni-kansikin bin sá bininjabee kɔkɔ máaǹ kí dāá cù ti-Dindaan ni-Nimbɔtiu nimbiin laakin ní u làá dāá lēēyee kí jī jiŋaal un bi ŋmóò kpɔnɔ un kaa cáá ŋkpɔnɔnyɔkɔee nì Pantikooti jiŋaaliu nì tantib jiŋaaliu. Ní taa láa cù ti-Dindaan nimbiin iŋaŋkulim. 17Ama báà ŋma ń dāá kpèè ti-Dindaan ni-Nimbɔtiu nín bīiǹ u-boon miŋyee ní kí bɔ́ntí saraabi míǹ kí cáá cùnnì.

Bibɔsoonliibi marab

18Ní dāá kàan̄ ntimu mun ti-Dindaan ni-Nimbɔtiu làá dāá tīī-nee kɔkɔ poon bibɔsoonliibi nì bin nyí kitiŋ pu marabee. Bí dāá nīn sòoǹ binib bɔti nì ibaamɔn. 19Ní nīn kpèé nsan nín dɔ̄ puee ki sòoǹ tibɔti kí taa nín̄ cáá digàntil ni-bɔsooŋyi poon. Ní taa yàntī ubɔ ń pɔ̄-ni tiba kí ŋéeb́ ni-nyɔkɔ, di sá yii tiwampɔkaal yàntī biciŋfitiibi kpántí bijɔfub ní ki kù deedeedambi bɔti. 20Ní nīn sòoǹ tibɔti tí nīn tɔ́kɔ́ ibaamɔn pu, án nín làá ŋá pu ní nīn bí dimaŋfalin, kí ŋmā kí kɔ́ kitiŋ kin ní ti-Dindaan ni-Nimbɔtiu làá tīī-ni ní nīn kíǹ ki yèe poonee.

Ti-Dindaan ná iwaatooti

21Ní taa cóoń ŋwindɔ ŋubɔ kí kɔ́ĺ nsaraafan ŋun ní ni làá mā kí tīī ti-Dindaan ni-Nimbɔtiuee. 22Ní taa tí cóoń diwaataŋkpal niin, di sá yii ti-Dindaan ni-Nimbɔtiu ná tiwan gbanti#16.22 B. 21-22: kpèè Disa 34.13, Akoo 26.1..

Currently Selected:

Deutéronome 16: BASSARDC

Highlight

Copy

Compare