Deutéronome 18

Leefii yab fakal

1Bi yaa láa bíi yàkatī tikpaatan ki tìì Isirayeel yabee, bí taa kpáaǹ Leefii yab bisaraaŋaliibi nì bin kɔkɔ pée sá Leefii naakookunee. Saraabi bin bi ŋáań ki tìì ti-Dindaanee di dāa sá bi-jinti nì bi-fakal. 2Leefii yab kaa cáá tikpaatan bi-nabiyaamu kansikin, di sá yii diyimɔɔl din bi cáá kí nīn bí ti-Dindaan tundin kii u nín pōoǹ-bi puee di sá bi-fakal#18.2 Kpèè Dikà 18.20..

3Samaa yaa cáań unaa àá upii ki ŋá saraayee, bisaraaŋaliibi jandi di sá kuboou nì nnyɔɔkpaween nì dipool. 4Ní dāá dū tijimpeepeekaal tin ni lēēyee, an dàkà yii ni-bileeu nì ni-damam nì ni-kpam ki kpáaǹ ni-pikuti tin ni péé ki cáńee kí tīī-bi. 5Di sá yii ni-naakɔti kɔkɔ poonee, Leefii yab ní ti-Dindaan ni-Nimbɔtiu lēē yii bí nīn bí u-tundin kí nīn cáa cá jaanjaan.

6 Leefii yab ubɔ yaa nìn kóò Isirayeel timmu kiban, ní ki yaa là kí dāan̄ mpaan ŋun ti-Dindaan lēēyee puee, 7u cáá nsan kí tɔ̄ ditundi kí tīī ti-Dindaan u-Nimbɔtiu kii u-nabiyaamu, Leefii yab bin kíǹee nín bí niin ki tūǹ ti-Dindaan tundi puee. 8Báà u yaa nyáfì u-baa fakal ki cáá animbil, bi nín tìì u-nabiyaamu mun bí niinee pu bi jīǹee, míǹ mbaantiim ní bi máaǹ kí tīī udaan mun.

Inyimɔn bɔnaatiliibi nì ibaamɔn bɔnaatiliibi

9Ni yaa láa kɔ́ kitiŋ kin ti-Dindaan ni-Nimbɔtiu làá dūú tīī-nee poonee, ní taa bīfì kí nīn ŋáań ntimbiil tuuŋŋi ŋin anibul ŋin bí niin díǹ pu nee ŋáańee. 10Bí taa ká ni-kansikin ubɔ dū u-jipɔɔn àá u-bisal kí tɔ̄ ŋŋmin kí ŋá saraa, àá ki būū tibɔɔl, àá ki màkà dimàkal, àá ki ŋáań kukpaŋkpantiiu tuuŋŋi, àá ki ŋáań kusoou tuuŋŋi, 11àá ki tòó binib inyɔkɔfi, àá ki kàal̀ abɔɔjal, àá ki sòoǹ tin dòońee, àá ki yíì bitaŋkpiibi ki sòoǹ nì bi#18.11 Kpèè Disa 22.17, Akoo 19.26,31, 1 Sami 28.7.. 12Unil un yaa ŋáań atuun gbantee sá utiŋwiil ní ti-Dindaan nimbiin. Ntimbiil tuuŋŋi gbanti pu ní ti-Dindaan ni-Nimbɔtiu làá jà anibul nee kɔkɔ kí fōō bi-tiŋki kí tīī-ni. 13Ní dū ni-ba kɔkɔ kí sú ti-Dindaan ni-Nimbɔtiu#18.13 Kpèè Maat 5.48..

14Di sá yii anibul ŋin timmu ni làá fōō nee sá binib bin cá biwaadambi nì bibɔɔbi ceeyee ní. Ama nimbee, ti-Dindaan ni-Nimbɔtiu kaa pú-ni nsan ní ŋá míǹ.

15Ti-Dindaan ni-Nimbɔtiu làá dāá lēē ni-nabiyaamu kansikin ubɔ ú nīn sá Unimbɔti bɔnaatiliu kii mamee, ní dāá pīlifiǹ-u#18.15 Kpèè Atuun 3.22, 7.37.. 16Di sá yii tin ni nìn bālifì ti-Dindaan ni-Nimbɔtiu ŋwiin ŋun ni nìn kóoǹ ki kpáfì ki sí Ooreeb jool taapuee dee. Ni nìn lī yii: «Taa ti là kí gbìl̄ ti-Dindaan ti-Nimbɔtiu neen pu, kaa ti là kí wāl̀ u-ŋmikpaaŋŋu nee mun. Di sá yii taa là kí kpú#18.16 Kpèè 5.25..» 17Ti-Dindaan nìn tùkū-mi yii: «Tiŋman bi cáá mbaamɔn kí sòoǹ míǹ. 18M làá lēē bi-nabiyaamu kansikin ubɔnaatil un bí kii siiyee kí tīī-bi. M làá dāá dū m-nyɔɔbuŋŋi kí ŋá u-nyɔkɔn ní ú dāá tùkù-bi tin kɔkɔ m kpáafì-uee. 19Un sá kamaa yaa kaa dāa pílifiǹ m-nyɔɔbuŋŋi ŋin ubɔnaatilee làá dāá sòoǹ m-yindi puee, mama m-ba di làá dāá dáaĺ u-tafal#18.19 Kpèè Atuun 3.23.. 20Ama m yaa kaa tùkū ubɔnaatil ubɔ tiba yii ú lì ní udaan yaa gāā u-bindi ki yíkìi sòon̄ tiba m-yindi pu, àá ki sòon̄ tiba awaa aba puee, an sá ní kpɔ̀-u ní.»

21An yaa yíì ni làá bàlifì ni-ba yii: «Kin mana ní ti làá ŋmā kí béé yii tin u sòon̄ee kaa nyánní ti-Dindaan cee?» 22Tiŋman, ubɔnaatilee yaa yíkìi sòon̄ tiba ti-Dindaan yindi pu ní an kaa ŋá kii u nín lī pueeyee, ní béé yii tin u sòon̄ee kaa sá ti-Dindaan nyɔɔbundi. Ubɔnaatil gbanti gāā u-bindi ní ki sòon̄. Ní taa fàŋkì-u.

Currently Selected:

Deutéronome 18: BASSARDC

Highlight

Copy

Compare