Deutéronome 15

Abin aluli pɔndi pɔ̄tam bɔti

1Ubɔ yaa cáá-si dipɔndee, abin aluli boonee, á dūú pɔ̄-u. 2Ni nín máaǹ kí nīn ŋáań puee sɔ̀. Dibindi din ti-Dindaan síiǹ yii báà ŋma ń dū u-nabiki nín cáá-u dipɔndi diŋyee kí pɔ̄-uee yaa bāańee, bin kɔkɔ nìn pīnnì bi-jutiibi animbilee ń taa páb́ bidambi yii bí téeǹ-bi, bí dūú pɔ̄-bi. 3Ni ŋūǹ kí bàlifì binicambi bin kóò ni-pu ki cáá-ni dipɔndee bí téeǹ-ni. Ama an yaa sá ni-nabiyaamu pɔɔŋŋee, ní dūú pɔ̄-bi.

4Nì míǹ kɔkɔee, usoodaan kaa làá nīn bí ni-kansikin, di sá yii ti-Dindaan làá bìin̄ ni-boon tikpil kitiŋ kin ní u làá dūú tīī-ni difakal ní nīn kíǹ ki yèe poon. 5Tin bée di sá yii ní nīn tɔ́ ti-Dindaan ni-Nimbɔtiu kí nīn ŋúb́ marab bin kɔkɔ m tīī-ni díǹ nee, kí ŋá bi nín bí yii ní ŋá puee. 6Di sá ti-Dindaan ni-Nimbɔtiu làá dāá bìin̄ ni-boon kii u nín pōoǹ-ni puee. Atimbun tikpil nib làá dāá dāan̄ ní pìnnì-bi animbil, ama nimbi dāa kpá kí cù báà diba nib cee bí pìnnì-ni animbil. Atimbun tikpil làá dāá nīn bí ni-taapu, ama nimbi dāa kpá kí nīn bí diba taapu.

7Ama an yaa láa ŋá yii ni-nabiki kiba kpántì usoodaan ntimu mun ti-Dindaan làá tīī-nee kiba poonee, ní taa ŋá inimbinaakulim ni-nabiki usoodaan pu kí tīī-kì kun kì nyàab̀ee. 8Ni máaǹ kí dàkà udaan tiniti kí pìnnì-u tin kamaa u nyàab̀ee#15.8 B. 7-8: kpèè Akoo 25.35.. 9Ama ní nīn nyíǹ ni-ba kí taa yàntī kulandɔkɔkpiiu nee ń jī ni-pɔbiliŋin mpaan ní lì yii: «Dibinluluútiil din poon ti cáá apɔɔn ki pūǹee tóobiń,» ní kí dàkafì mimmee kí ŋá ni-nabiki usoodaan pu inimbinaakulim kí taa tīī-u kun ní u nyàab̀ee. Ni yaa ŋá mimmee, u làá tīminsì kí yíiń ti-Dindaan, ní kí sòoǹ kí tɔ̄ ni-pu, ní an kpántí ikpiti kí tīī-ni. 10Tīīmaan-u kun ní u nyàab̀ee nì dipɔbil diba kí taa nín̄ gbùkum̄. Ŋámaan míǹ, ní ti-Dindaan ni-Nimbɔtiu ń bìin̄ ni-boon, ní kí bìin̄ ni-tuuŋŋi kɔkɔ pu. 11Kii bisoodambi nín làá nīn pée bí ni-tiŋki pu puee#15.11 Kpèè Maat 26.11, Maar 14.7, Yoow 12.8., an pu ní m kpáafí-ni yii ní nīn cáá tiniti kí nīn tútúǹ ni-nabiyaamu bisoodambi nì bifalaadambi.

Ní líí iyumbu í tɔ̄ i-ba

12Ni-nabiyaamu Eebru yab kansikin uninja àá unimpu yaa dū u-ba ki nyáfiǹ-ni ni dá-u ní u kpántì ni-yumbuuyee, u làá tɔ̄ ditundi abin aluu ní kí tīī-ni. Dibinluluútiil poonee, ní líí-u ú tɔ̄ u-ba. 13Ni yaa làá tīī-u dibatɔlee, ní taa yàntī ú búntí iŋaŋkulim. 14Ní dāá lēē ni-piii nì ni-ŋoobui nì ni-kpaajinti nì ni-daam kí pɔ̄-u nì tiniti poon. Ní dāá lēē ti-Dindaan ni-Nimbɔtiu nín bīiǹ ni-boon ni ká tiŋyee poon kí tīī-u. 15Ní téetí yii ni nìn sá iyumbu ní Eejipiti tiŋkin ní ti-Dindaan ni-Nimbɔtiu dá-ni ki líì. An pu ní m bíi tìì-ni mara nee díǹ.

16Ama ubɔ yumbuu yaa bí-u yii: «Maa là kí nyā a-cee», di sá yii u néeń u-dindaan nì u-dicaŋku ní an mɔ̄ǹ-u ú gbíntí kí nīn bí u-ceeyee, 17udaan ń yòon̄ mpiin ní kí dū uyumbuee tafal kí nákań ni-punyɔkɔki kí sāā kí cíĺ, ní ú kpántí u-yumbuu kí nīn cáa cá jaanjaan. Báà an yaa sá unimpu, ní ŋá-u míǹ mbaantiim.

18Ni yaa làá líí ni-yumbuu ú tɔ̄ u-bee, ni taa yàntī án nīn wù-ni, di sá yii u nín túń ditundi din ki tīī-ni abin aluuyee cáá ipaati ŋfunyɔm mili pu kí jítiǹ an yaa bàà sá upaadaan tundi. Míǹ puee, tīīmaan iyumbu dibatɔl ní ti-Dindaan ni-Nimbɔtiu ń bìin̄ ni-boon nì ni-tuuŋŋi kɔkɔ pu.

Tiwaŋkuti tin bi péé péé ki màl̄ee

19Ní dū ni-naai nì ni-piii nì ni-ŋoobui biseemaliŋ kí sú ti-Dindaan ni-Nimbɔtiu. Ní taa dū ni-naai in sá abiseemalee kí kpàl̄ í kpɔ̀ tikpaal, kí taa tí cā ni-piii in sá abiseemalee kuti#15.19 Bi nìn cēē ipii kuti ní ki cáa lù satab kii bi nín cáá gulfa ki lù satab puee. Kpèè Disa 13.12.. 20Dibindi sá kamaayee, nimbi nì ni-dicaŋŋi ń cù ti-Dindaan ni-Nimbɔtiu nimbiin laakin u lēē kí nīn bí ní nīn jáaḿ-uee kí kpɔ̀ tiwaŋkuti gbanti niin kí ŋmɔ́#15.20 Kpèè 14.23.. 21Ama tiwaŋkuti gbanti kansikin kubɔ yaa wɔ̀b̄, ku-taal diba wù àá ku jɔ̀b̄ àá ku pée wɔ̀b̄ mbaminee, ní taa dū-ku kí ŋá saraa kí tīī ti-Dindaan ni-Nimbɔtiu. 22Kpɔ̀maan-ku laakin ni kóòyee kí ŋmɔ́. Ni-kansikin bin bí circiree nì bin kaa bí circiree kɔkɔ ŋūǹ kí ŋmɔ́ kii bi nín pée ŋmóò upeeman àá ucaŋkpalim puee. 23Ama naa nín máaǹ kí ŋmɔ́ fatiku ní#15.23 Kpèè 12.16, Diny 9.4, Akoo 7.26-27.. Ní kpáatí-u kí fá kitiŋ kii nnyimee.

Currently Selected:

Deutéronome 15: BASSARDC

Highlight

Copy

Compare