Deutéronome 14

Unil yaa kpíì tin baa máaǹ kí ŋée

1Ni sá ti-Dindaan ni-Nimbɔtiu biyaamu ní. Ni-niliu yaa kpíìyee, ní taa cāfì ni-wunti, kí taa kòol̀ tiyikpiti ni-yigbeeŋi pu#14.1 Kpèè Akoo 19.28, 21.5, Yeer 41.5.. 2Di sá yii ni sá circir nibul ní ki tīī ti-Dindaan ni-Nimbɔtiu. Ti-Dindaan ni-Nimbɔtiu lēē-ni ki nyántì anibul ŋin kɔkɔ bí kitiŋ puee kansikin ní nīn sá u-gaajawammɔntiiti ní#14.2 Kpèè Disa 19.5, Tiiti 2.14, 1 Peet 2.9..

Tijin tin bi kòóyee nì tin baa kòóyee

3Ní taa jī tin kaa bí circiree. 4Tiwaŋkuti tin naa kòóyee sɔ̀. Unaa nì upii nì uŋoobu 5nì ukpiil nì ucaŋkpalim nì ubulum nì kijooŋɔjakai nì upeeman nì kipeewuŋ nì ukɔnii. 6Naa kòó tiwaŋkuti tin tafuŋfukuti látì ní ti yaa ŋmɔ́ timool tì kpìkitī ki fàtīi ŋmóòyee. 7Ama ni kòó tiwaŋkuti tin tafuŋfukuti látì ama ní kaa kpìkitī ki fàtīi ŋmóòyee, àá tin kpìkitī ki fàtīi ŋmóò ama ní ti-tafuŋfukuti kaa látèe. An puee ni kòó ugutaamu nì kiwuŋ nì ujaŋgbeenapul. Di sá yii tiwaŋkuti gbanti kpìkitī tin tì ŋmɔ́ ki náĺee ki fàtīi ŋmóò-tì, ama ti-tafuŋfukuti kaa látì. 8Naa jīǹ ugbeeti mun, di sá yii u-tafuŋfukuti látì ama waa kpìkitī ki fàtīi ŋmóò. Ní taa ŋmɔ́ tiwaŋkuti gbanti nanti. Tì yaa kpíì, ní taa gbēē-tì.

9Tiwaŋkuti tin kɔkɔ bí nnyiminee kansikinee, naa kòó tin cáá ijɔŋfeen nì ipɔkɔee. 10Ama ni kòó tin kɔkɔ kaa pée cáá ijɔŋfeen nì ipɔkɔee. Tíǹ kaa ŋān̄ ní jī.

11Naa kòó inoon in bí circiree. 12Ama in ni kòóyee sɔ̀. Ukaabu nì ukaalun nì nnyimin kaaluŋwu 13nì dikaaliŋgbindi nì kaajiiku nì kikaaliŋkpaŋ nì ki-buluku, 14agaliŋgaa nì ŋi-buluku, 15taataa nì ditulinjool nì ŋkpinni kpɔkpɔfiiu nì kaasaabi nì bi-buluku, 16unanjikaabu nì kitulinjakpatibooi nì kpɔkpɔfii un sil fɔ̀kɔ̀ee, 17nì kpɔkpɔfii un cáá nnyɔlee nì ukpiŋkaabu nì jɔmbaaŋki, 18nì naakpaapiin nì ŋkpinni kaabiyaamu nì mu-buluku nì yikpitikooja nì kunanjiŋu.

19Ni kòó inaaki in cáá ifeenee, iaa bí circir. 20Ama naa kòó in bí circiree#14.20 Kpèè Akoo 11.21-22..

21Ni kòó diwaŋkpil. Ni ŋūǹ kí dūú tīī binicambi bin kóò ni-puee bí ŋmɔ́. Ni tí ŋūǹ kí dūú nyāfiǹ-bi. Di sá yii nimbee, ni sá circir nibul ní ki tīī ti-Dindaan ni-Nimbɔtiu. Ní taa dū uŋoobu biim kí ŋàan̄ u-biki nanti#14.21 Kpèè Disa 23.19..

Dibintil kamaa saalaatiiti marab

22Ní nīn lèekī ni-kpaajinti pu tisaalaatiil dibindi kamaa. 23Ti-Dindaan ni-Nimbɔtiu nimbiin, laakin u làá dāá lēē ní nīn jáaḿ-uee ní ni làá nīn jīǹ ni-kpaajinti nì ni-dapɔm nì ni-kpam saalaatiiti. Ki kpáaǹ ni-naai nì ni-piii nì ni-ŋoobui biseemaliŋ#14.23 B. 22-23. kpèè Akoo 27.30-33., án nín làá ŋá pu ní bīfì kí nīn fàŋkí ti-Dindaan ni-Nimbɔtiu kí nīn cáa cá jaanjaanee. 24Ama, ti-Dindaan ni-Nimbɔtiu yaa láa bīiǹ ni-boon ni-kpaajinti lòon̄ tikpil ní ni yaa láa dáań ki ká yii ti-Dindaan nín lēē mpaan ŋun pu ní nīn jáaḿ-uee dátì, naa làá ŋmā kí túń ni-saalaatiiti kí cùnnì niinee, 25ní dāá dū ni-saalaatiitee kí nyāfì ní kí dū animbil ŋin ni kée kí cùnnì laakin ti-Dindaan ni-Nimbɔtiu lēē kí nīn bí ní nīn jáaḿ-uee. 26Niinee ní ní dāá dū animbilee kí dā kun ní ni yaa pée lèe. Ni dāa ŋūǹ kí dūú dā unaa àá upii àá uŋoobu àá ndamam àá ndaam min pɔ̄ɔ̄yee àá tin ní ni yaa láa pée lèe. Ní ni nì ni-dicaŋŋi kɔkɔ ń jī bɔ̀b ti-Dindaan ni-Nimbɔtiu nimbiin kí fàal̀. 27Ama ní nīn nyí kí taa súntí Leefii yab bin kóò ni-timmunee pu, di sá yii bíǹ kaa fōō difakal kii nimbi nín fōō tikpaatan puee.

28Abin ata kamaayee ní kóoǹ dibintataatiil kpaajinti saalaatiiti kí bíĺ ni-timmu poon. 29Niinee Leefii yab bin kaa cáá tikpaatan bi-ba puee nì binicambi bin kóò ni-puee nì ataŋkpiibil nì bi-kpiipoobi bin kóò ni-timmu poonee ń dāan̄ kí yòon̄ ní kí ká kí jī kí díkí. Ni yaa ŋá mimmee, ti-Dindaan ni-Nimbɔtiu làá bìin̄ ni-tuuŋŋi kɔkɔ pu.

Currently Selected:

Deutéronome 14: BASSARDC

Highlight

Copy

Compare