2 Samuel 7

Unimbɔti pōoǹ Daafiidi nì u-naantiibi dipoondi

(Kpèè 1 Kroo 17.1-15)

1Daafiidi kɔ́ u-beecindin, ní ti-Dindaan nyántì-u u-nannanliibi bin māntìi tú-uee ŋaan, ki tīī-u ŋgbansɔŋfi. 2Dalbee ní u bí Unimbɔti bɔnaatiliu Naatan yii: «Kpèè, man kóò dibeecindi din bi dū idɔmɔnti in bi yíì seediree ki kpááyee. Ama ní Unimbɔti dakaau yú tanti un poon bi dū iŋoobu kuti satab ki gāāyee.» 3Ní Naatan bí ubɔti yii: «Tin kā a-pɔbilin a là kí ŋée, cùú ŋá míǹ, di sá yii ti-Dindaan bí a-cee.»

4Ama kunyeeu gbantee ní ti-Dindaan sòon̄ nì Naatan yii: 5«Cùú tùkù m-tɔntɔnliu Daafiidi yii man ni-Dindaan nín lī puee sɔ̀. Sii di kaa làá mā-mi Kudii ní ḿ kɔ́. 6Kí yòon̄ daliŋkin m nyántì Isirayeel yab Eejipiti tiŋkin ki dāa sāā díǹ nee, ubɔ kaa máń-mi kudii m kɔ́ ki ká. M nìn sá kii usaŋkinlee ní ki nìn kàal̀ ntimu ki nìkì, ní ki nìn kóò tantin. 7Kí kūtèe, ŋyunti ŋun m dūu céeǹ Isirayeel yab bi-saŋkindi poonee, m nìn kāaǹ bikpilib tikpil. Bíǹ di nìn kpāā Isirayeel yab m-nibul. Maa láá pée bālifì-bi dalba dalba yii: <Ba pu ní naa dū seedir dɔi ki máń-mi kudii?> 8Kɔŋkɔnnee á tùkù m-tɔntɔnliu Daafiidi yii: <Man ni-Dindaan Mpɔŋkɔdaan di páatì-si ipii boon kupikpaaun ki dū-si ki kāaǹ dibeel m-nibul Isirayeel yab pu#7.8 páatì-si ipii boon kupikpaaun: kpèè 1 Sami 16.11, dibeel m-niwul Isirayeel: kpèè 5.2.. 9Laakin kamaa a cūtèe, m bí a-cee. M kúntì a-nannanliibi kɔkɔ a-nimbiin. M làá yòon̄ a-yindi yilpu kii binikpaambi bin kāl̀ kitiŋ puee. 10M làá tīī Isirayeel m-nibul mpaan ŋun pu m làá kàan̄-bee. Bi làá nīn kóò niin kaa làá fàŋkì tiba. Binikpitib biba kaa làá ti dāan̄ kí wɔ́b́-bi kii dooooyee, 11ŋyunti ŋun ní m nìn kāaǹ bibɔsoonliibi m-nibul Isirayeel puee. M làá fīī-si a-nannanliibi kɔkɔ ŋaan kí líí ní á ŋùŋfì. Di sá man ni-Dindaan bíi tùkù-si yii m làá náań-si dicindi. 12Ŋyunti ŋun ní sii yuntiŋu yaa láa sāā a cūtìi dōoǹ ki ŋàl̄ a-baabee, m làá dāá lēē a-maaliŋun ubɔ, un sá a-poon naŋuee kí kàan̄ dibeel a-yil pu. M làá dāá yàntī u-beel ń nīn bá ki pɔ̄ɔ̄#7.12 Kpèè 1 Bib 2.12,46.. 13Úǹ di làá dāá mā-mi Kudii#7.13 Kpèè 1 Bib 6. kí tīī m-yindi tinyool, ní ḿ dāá yàntī u-beel ń nīn bá ki pɔ̄ɔ̄ ki cá jaanjaan. 14Man làá nīn sá-u ubaati, ní úǹ ń nīn sá-mi ujipɔnti#7.14 Kpèè Ilan 2.7, 2 Kɔra 6.18, Eebru 1.5.. U yaa yīntèe, m làá dáaĺ u-tafal kii ubaati nín dátí u-jipɔɔn tafal puee ní. 15Ama maa làá cúú m-laŋŋaŋfitiiku kí fōō u-cee kii m nín fōō-ku Sayuul cee puee#7.15 Dū B. 14-15 kí ŋmàntī nì Ilan 89.31-35. - nín fá: kpèè 1 Sami 15.28.. M nìn dū Sayuul ki fá ní ki dū sii ki kāaǹ u-paaŋŋu pu. 16M làá yàntī a-dicaŋku nì a-beel ń nīn bá ki pɔ̄ɔ̄ kí nīn cá jaanjaan. Tiba kaa làá ŋmā kí cìŋkì a-beel pɔŋŋu ŋwindal.» 17Ní Naatan cáá tibɔti tin Unimbɔti sòon̄ nì u dileedakal poonee kɔkɔ ki tùkū Daafiidi.

Daafiidi wimmeem

(Kpèè 1 Kroo 17.16-27)

18Niinee ní ubɔti Daafiidi cūtì ti-Dindaan nimbiin ki mēē-u yii: «M-Dindaan Unimbɔti, ba ní m sá, ní m-dicaŋku bí tilatin ní a cáá-mi ki bàn̄ laakin m bí nee ní? 19Nì míǹ kɔkɔee, a wāĺ yii tin a ŋá nee pátì a-cee. Di sá a gíti pōoǹ man a-tɔntɔnliu dicaŋku ipoon iba in bɔti dáá dátìńee. M-Dindaan Unimbɔti, tin a ŋá nee máaǹ unilaaa? 20M-Dindaan Unimbɔti, a nyí man a-tɔntɔnliu tiŋan. Too tilati ní m làá gíti lì kí kūtì. 21Kii a nín pōoǹ ki lī yii a làá ŋá pu a-pɔbilinee ní a túń atuŋkpaan nee ki nyántì-ŋi ki dàkā man a-tɔntɔnliu. 22Ti-Dindaan Unimbɔti, a lafun baasii sá ukpaan ní! Aa cáá juti! Sii boonee, Unimbɔti ubɔ gíti kpá, kii ti nín gbìl̀ bi sòoǹ puee. 23Dinibul diba gíti bí kitiŋ pu doo ki bí kii Isirayeel nibuleeee? A cūtìi dá-dì ki nyántì Eejipiti yab nì bi-waaŋi ŋaan ki dū-dì ki kpántì a-nibul. A yōoǹ di-yindi yilpu, ki túń atuŋkpaan nì maamaaci tuuŋŋi ki tīī-dì a-tiŋkin. Ditimbundi diba gíti bí ki náań nì a-timbundi din a dá ki nyántì Eejipiti yab timbundi nì bi-waaŋi ŋaaneeee? 24Ti-Dindaan, a dū Isirayeel yab ki kpántì a-nibul kí nīn cá jaanjaan, ní a kpántì bi-Nimbɔtiu. 25Kɔŋkɔnnee m-Dindaan Unimbɔti, a nín sòon̄ yii a làá ŋá pu kí tīī man a-tɔntɔnliu nì m-dicaŋkuee, ŋá míǹ án nīn bí ki cá jaanjaan, kii a nín pōoǹ puee. 26Bí yòon̄ a-yindi yilpu kí nīn pée cá jaanjaan, binib ń lì yii: <Ti-Dindaan Unimbɔti Mpɔŋkɔdaan di sá Isirayeel yab Nimbɔtiu!> Ní man a-tɔntɔnliu Daafiidi dicaŋku ń nīn bá ki pɔ̄ɔ̄ a-nimbiin. 27An puee ti-Dindaan Unimbɔti Mpɔŋkɔdaan, Isirayeel yab Nimbɔtiu, sii a-ba di tùkū man a-tɔntɔnliu yii: <M làá náań-si dicindi>. An pu ní man a-tɔntɔnliu ká kunyannyaau kí mèè-si ŋwimmeem nee. 28Ti-Dindaan Unimbɔti, sii di sá Unimbɔti. A yaa lī puee, míǹ ní a ŋáań, ní a pōoǹ man a-tɔntɔnliu nnaam! 29Kɔŋkɔnnee, bìin̄ man a-tɔntɔnliu naantiibi pu bí nīn pée bí a-nimbiin ki cá jaanjaan. Di sá yii sii ti-Dindaan Unimbɔti di pōoǹ míǹ. A-biindi puee, man a-tɔntɔnliu dicaŋku làá fōō dibiindi kí nīn cá jaanjaan!»

Currently Selected:

2 Samuel 7: BASSARDC

Highlight

Copy

Compare