2 Samuel 8

Daafiidi nín jáń tijáti tiŋyee

(Kpèè 1 Kroo 18.1-13)

1Míǹ boonee Daafiidi jáń ki pɔ́ɔkiǹ Fiiliistii yab, ki nyīī-bi ki gùl̄ taapu, ki fōō bi-ŋaan mpɔn ŋun bi nìn cáá kitiŋ gbanti puee. 2U nìn jáń ki pɔ́ɔkiǹ Moowaab yab, ní ki yāntì bi dōoǹ kitiŋ ipɔ̀n ita pu. U nìn kūū bin nìn dɔ̄ ipɔ̀n ili ipeepeekaa puee ní ki kíǹ bin dɔ̄ mpɔ̀nluŋkikaa puee. Míǹ boonee ní Moowaab yab kpántì Daafiidi yumbui ki kíǹ ki pà lampoo ki tìì-u. 3Daafiidi nìn tí jáń ki pɔ́ɔkiǹ Reewoob jipɔɔn Adadeeseer, Sooba yab bɔtiu, ŋyunti ŋun úǹ nìn bíi bɔ́ntí kí já kí fōō Eefiraata tiŋki kí ŋá u-taapuee. 4Daafiidi nìn cúú u-tanjakaliibi kutuku ubɔ nì alaataa aluli nì u-janjaliibi bin còom̄ ataa puee kutukub mmuŋku. U nìn lēē itaamu dilaataal in làá nīn dátí u-tɔrɔkubee, ní ki gāā ki kpātì in kíǹee tabilɔnti. 5Siirii yab bin kóò Damaasee nìn dɔ́miń ki tíkiǹ Adadeeseer, Sooba yab bɔtiu, ní Daafiidi kūū bi-kansikin binib kutukub mmuŋku nì bili. 6Daafiidi nìn kāaǹ kɔmandambi Siirii yab bin kóò Damaasi tiŋkinee ní ki dū-bi ki kpántì u-yumbui, ní bi kíǹ ki pà lampoo ki tìì-u. Laakin kamaa ní Daafiidi yaa nìn pée cūtèe, ti-Dindaan nìn tìì-u dijajil ní. 7Daafiidi nìn jáń ki fōō sindaariya gbampɔɔŋi ŋin Adadeeseer janjaliibi nìn ŋúb́ee, ki cáa cūnnì Jeerusaleem. 8U nìn fōō tasa kúti tikpil ubɔti Adadeeseer timmu Beeta nì Beerootayi poon.

9Amaati yab bɔtiu Tooyi nìn gbìl̄ yii Daafiidi jáń ki pɔ́ɔkiǹ Adadeeseer janjaliibi kɔkɔ. 10Ní Tooyi dū u-jipɔɔn Yooram ki tú ú cùú jāam̀ Daafiidi kí pàkà-u u nín jáń ki pɔ́ɔkiǹ Adadeeseeree. Di sá Tooyi pulincɔnti mbaa di nìn sá Adadeeseer. Yooram nìn cáá sindaariya nì animbil kúti nì tasa kúti wanti ki tīī Daafiidi. 11Daafiidi nìn dū tiwan gbanti mun ki sú ti-Dindaan, kii u nín nìn dū sindaariya nì tikúti nimbiliŋ tin u nìn jáń ki fōoń atimbun ŋin u nìn jáń ki pɔ́ɔkiǹee ki sú puee. 12Atimbun gbanti di sá Siirii yab bin kóò Damaasee nì Amɔn yab nì Fiiliistii yab nì Amaleeki yab nì tiwan tin u nìn jáń ki fōoń Reewoob jipɔɔn Adadeeseer, Sooba yab bɔtiu ceeyee. 13Daafiidi yindi nìn mɔ̄tìi yíkì yilpu.

U nìn jáń ki pɔ́ɔkiǹ Siirii yab ki kūū binib kutukub bili kpá mmuŋku Ŋyaam tantakalin ní ki fātìi gítìń. 14Daafiidi nìn kāaǹ kɔmandambi bi-timmun, ní ki nyīī Eedoom yab ki gùl̄ taapu. Míǹ ní ti-Dindaan nìn tīī Daafiidi dijajil ajan ŋin kɔkɔ pu u nìn cūtèe.

Daafiidi kàliŋkpilib yiŋŋi

(Kpèè 1 Kroo 18.14-17)

15Daafiidi nìn kāl̀ dibeel Isirayeel tiŋki kɔkɔ pu. U nìn sòoǹ samaa bɔti nì mbaamɔn kaa pɔ̀ gandi. 16Joowaab un na bi yíì Seeruyee di nìn sá ujanjakpil ní Ayiiluudi jipɔɔn Joosafaati sá ubɔti kpambal. 17Ayiituub jipɔɔn Saadooki nì Abiyataar jipɔɔn Ayiimeeleeki di nìn sá bisaraaŋaliibi ní Seeraya sá ugbaŋŋmal. 18Yeeyooda jipɔɔn Beenaya di nìn bí ki kpèé Keereeti nì Peeleeti yab. Daafiidi jipɔmbi mun nìn sá bisaraaŋaliibi ní.

Currently Selected:

2 Samuel 8: BASSARDC

Highlight

Copy

Compare