2 Samuel 6

Daafiidi lēē kí cùnnì mpèé dakaau Jeerusaleem

(Kpèè 1 Kroo 13.4-14, 15.25–16.3)

1Daafiidi fātìi kpáfì Isirayeel yab janjamɔntiibi. Bi nìn nyáń binib kutukub mmuŋku nì saalaa ní. 2Daafiidi nì binibee nìn nín cá Baala tiŋki kin bí Juuda tiŋkinee kí gíiǹní mpèé Dakaau. Ti-Dindaan Mpɔŋkɔdaan un kā keerubimbi puee yindi ní bi nìn dūu pú Dakaa gbanti#6.2 Baala ní bi gíti yíì yii Kiiriyati-Yeeyariim (kpèè 1 Sami 6.21, 7.1). - un kā keerubimbi: kpèè Disa 25.22.. 3Bi nìn dū Unimbɔti dakaau ki tākaǹ tɔrɔkupɔɔn poon. Bi nìn yōoǹní-u Abinadaab dumpu kigbantaŋ pu. Abinadaab jipɔɔn Usa nì Ayiiyoo di nìn kpòotī inaa in dàtī tɔrɔkupɔɔn gbantee#6.3 Kpèè 1 Sami 7.1-2.. 4Bi nín yōoǹ Unimbɔti dakaau Abinadaab dumpu kigbantaŋ pu mimmee, ní Ayiiyoo līī u-nyɔkɔpu. 5Daafiidi nì Isirayeel yab kɔkɔ nìn bí ki fàal̀ nì dipɔɔpindi ti-Dindaan nimbiin ki bɔ̀ɔ́ tiwambɔɔkaal tin bi dū siipreesi dɔi ki kpítèe kɔkɔ nì ti-bulifi, nì kubeeu nì saŋgu nì ŋgaŋgamu nì icaal nì cancakantib. 6Bi bàn̄ Naakɔn tuulool caŋinee ní inaa gbéetì ní Usa tāntì u-ŋal ki cúú Unimbɔti dakaau. 7Ti-Dindaan nìn fōō Usa pu diŋuul, ní ki fáá-u niin u nín yīntèe pu. Usa nìn kpíì Unimbɔti dakaau caŋin niin.

8Niinee Daafiidi fōō diŋuul, kun puee ti-Dindaan nìn dáaĺ Usa tafal. Ní bi pú mpaan gbanti diyindi yii Peereesi-Usa. Bi dáá gbítìi yíì mpaan gbanti míǹ ki dāa sāā díǹ. 9Daafiidi nìn fāŋkì ti-Dindaan yaadal wiiŋŋu, ní ki bí yii: «Maa làá ŋmā kí cùnnì ti-Dindaan dakaau m-dumpu!» 10Daafiidi kaa nìn gíti là kí yòon̄ ti-Dindaan dakaau kí cùnnì Daafiidi Tiŋkin. U nìn yāntì bi cáa yóoǹ Oobeedi-Eedoom dumpu. Kijapaai gbanti nìn sá Gaati tiŋkin ní. 11Dakaayee nìn yúl̀ Oobeedi-Eedoom dumpu iŋmal ita, ní ti-Dindaan bīiǹ u nì u-dicaŋku kɔkɔ pu#6.11 Kpèè 1 Kroo 26.4-5..

Bi cáá ti-Dindaan dakaau ki kɔ́ǹ Jeerusaleem

12Bi nìn dɔ́miń ki tùkū Daafiidi yii: «Unimbɔti dakaau puee, ti-Dindaan bīiǹ Oobeedi-Eedoom pu ki yāntì u-tuuŋŋi kɔkɔ bíi còom̄-u tiŋan.» Niinee Daafiidi cūtì Oobeedi-Eedoom dumpu ki yōoǹ Unimbɔti dakaau ki cáa cūnnì Daafiidi Tiŋkin ifaal poon. 13Ŋyunti ŋun ní bin tú ti-Dindaan dakaauee yaa dāatì ataa aluuyee ní bí yūĺ kí dū unaja nì dinabil din bí màlmalee kí ŋá saraa. 14Daafiidi nìn baasii bíi ŋōō nì u-pɔŋŋu kɔkɔ ní ti-Dindaan nimbiin. U nìn pée pēē bisaraaŋaliibi bɔkutil din bí fálfalee ní. 15Daafiidi nì Isirayeel yab kɔkɔ nìn yōoǹ ti-Dindaan dakaau ki cáa cūnnì Jeerusaleem nì dipɔɔpindi kuŋkuuntii ki búǹ ŋyin.

16Ŋyunti ŋun bi cáá ti-Dindaan dakaau ki kɔ́ǹ Daafiidi Tiŋkinee, Saayuul bisal Miikaal gbóoń tɔkɔlee ki ká ubɔti Daafiidi nín pée yùkufī ki tìintí pu ki ŋōō ti-Dindaan nimbiinee. U-ŋool gbanti puee, u nìn kpēē ki sīŋkiǹ-u u-pɔbilin. 17Daafiidi nìn gāā tanti dakaa gbanti pu. Bi nìn yōoǹní dakaayee ki kɔ́ǹ tantee poon ki yóoǹ mpaan ŋun Daafiidi nìn lēē kí síiń-uee. Míǹ boonee ní Daafiidi ŋá bisaraawɔkaabi nì mpèé saraabi ki tīī ti-Dindaan. 18U ŋá saraabi míǹ ki dóòyee ní ki mēē ti-Dindaan Mpɔŋkɔdaan ki bīiǹ samaa pu. 19Míǹ boonee ní u yākatì Isirayeel samaau kɔkɔ tijin. Uninja kamaa nì unimpu kamaa nìn fōō kpɔnɔ nì dinaŋkúndi nì fiinyi subiliŋ akulim kalaau. Míǹ boonee ní báà ŋma fātìi nín kùǹ#6.19 fātìi nín kùǹ: kpèè 1 Kroo 16.43..

20Daafiidi fātì u-dumpu kí cùú mèè kí bìin̄ u-dicaŋku yab pu, ní Miikaal nyáń ki túŋkì-u ki bí-u yii: «Bi baasii tīī sii Isirayeel bɔtiu díǹ tinyool ní. A lēē a-cancaŋgbeel ki dàkā a-kàliŋkpilib tɔntɔnliibi binimpoobi kii unil un kaa bí tibanee nín ŋáań puee!»

21Ní Daafiidi kíí-u yii: «An sá kí tīī m-Dindaan tinyool pu ní m ŋɔ́ń míǹ. Úǹ di lēē-mi, kun puee m-bɔti fáatiǹ-u ki jítiǹ a-baa nì a-dicaŋkun yab kɔkɔ, ní ki kāaǹ-mi dibeel Isirayeel u-nibul pu. U-nimbiin ní m làá nīn fàal̀. 22M làá gíti sìntī m-ba taapu kpataaa kí taa nín̄ sá tiba kí jītíǹ min bí nee. Míǹ gba di làá yàntī bitɔntɔnliibi bin bɔti a sòoǹ nee ń tīī-mi tinyool.» 23Saayuul bisal Miikaal kaa ká mmaal ní ki dāa kpáàa kpíì.

Currently Selected:

2 Samuel 6: BASSARDC

Highlight

Copy

Compare