2 Rois 2

Unimbɔti yōoǹ Eelii. Eeliisee fōō u-yil

1Ti-Dindaan nín nìn làá yòon̄ Eelii ki cáá jɔ̄m̀ yilpu kunaakpaabuŋŋunee, tin nìn jítèe sɔ̀. Eelii nì Eeliisee nìn yíkì Giilgaal ki còom̄ dicilpu ki cá. 2Bi còom̄ ki cée ní Eelii bí Eeliisee yii: «M gbàam̄-si, gbíntí doo, di sá yii ti-Dindaan tú-mi Beeteel.» Ama ní Eeliisee kíí-u yii: «Nì ti-Dindaan un bí dimaŋfalin nee nì sii a-ba maŋfal puee, m pūtì yii m kpá kí yàntī-si!» Ní bi táá dicilpu ki nín cá Beeteel.

3Unimbɔti bɔnaatiliibi kitil din bí Beeteelee nyánní ki bālifì Eeliisee yii: «A nyí yii ti-Dindaan làá yòon̄ a-kpiliu díǹ kí cáá jɔ̄m̀ yilpuɔɔɔ?» Ní u kíí-bi yii: «Ma mun nyí, ama ní taa ti sòoǹ nì man an bɔti!»

4Ní Eelii fātìi bí Eeliisee yii: «Eeliisee, m gbàam̄-si, gbíntí doo, di sá yii ti-Dindaan tú-mi Jeeriikoo.» Ama ní Eeliisee kíí-u yii: «Nì ti-Dindaan un bí dimaŋfalin nee nì sii a-ba maŋfal puee, m pūtì yii m kpá kí yàntī-si!» Ní bi táá dicilpu ki nín cá Jeeriikoo.

5Unimbɔti bɔnaatiliibi kitil din bí Jeeriikooyee sútì ki pìl̄ Eeliisee ní ki bālifì-u yii: «A nyí yii ti-Dindaan làá yòon̄ a-kpiliu díǹ kí cáá jɔ̄m̀ yilpuɔɔɔ?» Ní u kíí-bi yii: «Ma mun nyí, ama ní taa ti sòoǹ nì man an bɔti!»

6Eelii tí bí Eeliisee yii: «Eeliisee, m gbàam̄-si, gbíntí doo, di sá yii ti-Dindaan tú-mi Jɔɔdan.» Ama ní Eeliisee kíí-u yii: «Nì ti-Dindaan un bí dimaŋfalin nee nì sii a-ba maŋfal puee, m pūtì yii m kpá kí yàntī-si!» Ní bi-liitil táá dicilpu ki nín cá Jɔɔdan. 7Eelii nì Eeliisee nìn bàn̄ ki sí Jɔɔdan buŋgbandi. Unimbɔti bɔnaatiliibi imuŋku ili nì saalaa nìn táá-bi kudandaŋu. 8Niinee Eelii cúú u-bɔkutikpaandi ki pēetì, ní ki kúntì ki dūu fáá mbunee nyim, ní nnyim cúu yākatì mili ní nsan dōoǹ ní bi-liitil cōom̀ ki dūtì.

9Bi dūtì ki dóòyee ní Eelii bí Eeliisee yii: «Bàlifì-mi kun a là ḿ ŋá kí tīī-see kí wàatī ḿ yīkì a-cee kí nīn jɔ́ḿ!» Ní Eeliisee kíí yii: «M là kí fōō ŋfam min a cááyee mili pu ní!» 10Ní Eelii bí yii: «Tin a bālifèe pɔ̄ɔ̄ á ká. Ama a yaa bí ki ká-mi ŋyunti ŋun ní ti-Dindaan làá yòon̄-mi a-cee kí cáá jɔ̄m̀ee, a làá ká kun a bālifèe. Ama a yaa kaa ká-mi, mimmee aa làá ká dee.»

11Ŋyunti ŋun bi pée bíi còom̄ ki cá ki gbáà faawiiyee, ní tɔrɔkub bin sá ŋŋmee nì itaamu in sá ŋŋmee dɔ́miń ki cúú-bi ki yākatì. Dicilpu niinee ní an yōoǹ Eelii ki dūu dī kunaakpaabuŋŋun ki cáa jɔ́m̀ yilpu. 12Eeliisee nín ká mimmee ní u kíĺ ki bíi kūuntí yii: «M-baa! M-baa! A nìn jítiǹ Isirayeel janjatɔrɔkub nì u-tanjakaliibi kɔkɔ!» Ŋyunti ŋun waa ti wāĺ Eeliiyee ní u cúú u-wampeeŋkaati ki dáaĺ ki cátì mili pu. 13Míǹ boonee ní u yōoǹ dibɔkutikpaandi din Eelii nìn cúu páatì u-gbigbipati pu ki lúkúee#2.13 An sá dibɔkutikpaandidin Eelii nìn tɔ́ ki páaǹ Eeliisee pu (kpèè 1 Bib 19.19) ki yíiń-u u páaǹ u-boonee ní. Eeliisee yaa kpántì kɔŋkɔnnee un kíǹ ki yì dibɔkutil gbantee, an dàkà yii úǹ di fōō u-yil ní ki lafun máaǹ míǹ. ki nín gítiń Jɔɔdan buŋgbandi ki sí. 14U yōoǹ dibɔkutikpaandee ní ki dūu fáá mbunee nyim ki lī yii: «Ti-Dindaan Eelii Nimbɔtiuee bí la ní?» U fáá nnyim mimmee ní mi cúu yākatì mili ní nsan dōoǹ ní u jítì.

15Unimbɔti bɔnaatiliibi kitil din bí Jeeriikoo ki nìn yúní kudandaŋu ki túĺ-bee nín ká Eeliisee ŋá kuŋyee, ní bi bí yii: «Ŋfam min nìn bí Eelii puee kíǹ ki bí Eeliisee mun pu.» Bi lī mimmee ní ki dɔ́miń ki túŋkì-u ní ki tātìi gbāaǹ u-nimbiin bi-yigbeeŋi tūū kitiŋ 16ní ki bí-u yii: «Ti cáá doo binib imuŋku ili nì saalaa bi sá bibaatandambi. Yàntī bí cùú nyàab̀ a-kpiliu. An yaa yíì ti-Dindaan Fam nín yōoǹ-uee, mi cáá-u ki tɔ́ ki fá dijool diba pu àá ditantakal diban.» Ama ní Eeliisee bí-bi yii: «Taa tɔ̄maan báà ubɔ.» 17Ama bi nìn pée gbíntìi cɔ́ ki páb́ Eeliisee ní úǹ dāa gīī kí bí-bi yii: «An yaa sée, tɔ̄maan-bi!» Bi nìn dū binib imuŋku ili nì saalaayee ki tú ní bíǹ dū iwimmɔn ita ki nyàab̄ Eelii kaa ká-u. 18Ŋyunti ŋun bi gítìńee, Eeliisee nìn dáá bí Jeeriikoo ní úǹ bí-bi yii: «Kéè m nìn pée tùkū-ni yii ní taa cùeeee!»

Eeliisee ŋáŋkì Jeeriikoo nyimbuliŋu nyim

19Ní Jeeriikoo yab bí Eeliisee yii: «Ti-dindaan, kii sii a-ba nín wāĺ puee, ti-tiŋki bàà mɔ̄ ŋkaa, ama nnyim kaa ŋān̄ ní kitiŋ mun kaa lòoǹ tikpaajin.» 20Ní Eeliisee bí yii: «Dūmaan ŋyaam kí ŋá disambipɔndin kí cáań-mi!» Ní bi cáań-u. 21Ní Eeliisee nín cá dinyimbunimbilin ní ki dū ŋyaamee ki ŋá nnyimin ki lī yii: «Ti-Dindaan nín sòon̄ puee sèé: <M yāntì nnyim nee ŋáŋkì, màa ti làá yàntī binib ń kpúɔɔɔ, kaa ti làá bīil̀ ntiŋkpam mun.>» 22Tiŋman nnyimee nìn ŋáŋkì, ní ki gbíntìi ŋān̄ ki dāa sāā díǹ kii Eeliisee nín nìn sòon̄ puee.

Eeliisee dáaĺ mbiyaamu mun bēel̀-uee tafal

23Eeliisee nyáń Jeeriikooyee ní ki nín cá Beeteel. Nsannee ní mbiyaamu nyánní kitiŋin ki bíi bèel̄-u ki lì yii: «Nín̄ cá-mi, uyiŋatifu! Nín̄ cá-mi, uyiŋatifu!» 24Ní u fātì ki kpēē-mu ní ki tɔ́-mu mbusu nì ti-Dindaan yindi pu. Niinee agbiŋgbil ali nyánní kupɔɔun ní ki cúú mbiyaamuee kansikin imuŋku ili nì muli ki tɔ̄ntì. 25Míǹ boonee ní Eeliisee nín cá Kaarmeel jool pu. U nyánní niinee ní ki nín gítiń Samaarii tiŋkin.

Currently Selected:

2 Rois 2: BASSARDC

Highlight

Copy

Compare