2 Corinthiens 3

Dipoompɔndi tɔntɔnliibi

1Mimmee ti fātìi tí bíi dàkà ti-ba yii ti ŋá tiba deeyaaa? Àá an bàlifī yii tí cáań tigbɔn tin bi ŋmàn̄ ki pàkā-tee kí dàkà-ni naaa? Àá an sá yii tí bàlifì-ni ní ŋmà kugbɔŋu kí pàkà-ti ní, a lì kii biba nín ŋáań puee? 2Nimbi Kɔranti yab di sá kugbɔŋu kun báà ŋma wāĺ ki kàaǹee, ní kugbɔŋuee ŋmàn̄ ti-pɔbiliŋin. 3Báà ŋma wāĺ yii ni sá kugbɔŋu kun Kriisitoo dī ti-pu ki ŋmàn̄ee ní. Waa ŋmàn̄ nì ŋgbaŋŋmamɔɔn. Ama Unimbɔti un bí dimaŋfalinee Fam di ŋmàn̄. Waa ŋmàn̄ ataŋkpee pu, u ŋmàn̄ binib pɔbiliŋin ní#3.3 Kpèè Disa 24.12, Yeer 31.33, Eesee 11.19, 36.26..

4Kriisitoo puee dimákal din ti cáá Unimbɔti puee dee. 5Di sá taa bí yii ti ŋūǹ kí ŋá tiba ti-ba pɔŋŋu pu. Tin ti yaa ŋúń ki ŋée, an sá Unimbɔti pɔŋŋu di cāntì ti ŋúń ki ŋá. 6Kun puee úǹ di tìì-ti ŋŋmam ní ti sòoǹ dipoompɔndi din u ŋée Bɔmɔntiiti. Dipoondi gbanti kaa sá mara un nìn sá nì tiŋmaŋmabitee, ama dì sá nì Unimbɔti Fam tundi ní. Di sá mara kù ní, ama Unimbɔti Fam míǹ tìì binib dimaŋfal ní#3.6 Dūú ŋmàntī nì Yeer 31.31..

7Unimbɔti nín nìn ŋmàn̄ u-marab ataŋkpee puee, bi nìn ká u-nyooti. Ní Mooyiisi mun nimbiin nìn kíǹ ki jìl̀, ní Isirayeel yab kaa nìn gíti ŋūǹ kí kpèè-u#3.7 Kpèè Disa 34.29.. An nyootee sá tin jītée ní. Marab bin bi yaa yīntì an cāabìń ŋkúmee yaa nìn dɔ́miń nì kunyaaŋŋu míǹ, 8kin ataa aŋa pu ní Unimbɔti Fam min tìì dimaŋfalee nyooti kaa máaǹ ki jítiǹ míǹ. 9An yaa sá yii marab bin làá cáań ŋkúmee pu ní Unimbɔti nyooti dɔ́miń ki jìl̀ mimmee, mana ní Unimbɔti Fam tundi din làá yàntī binib ń kpántí deedeedambi Unimbɔti nimbiinee nyooti làá nīn jìl̀ dee? 10Taa ŋūǹ kí dū tinyool tin nìn jítèe kí ŋmàntīǹ tin bí nee báà fiii. Kun puee, tíǹee sá tikpaandi ní. 11Tin bí ki làá jītée di yaa cáá tinyool mimmee, kin tin làá nīn pée bí kí nīn cée fáà!

12Ti nín cɔ́tí tin pu tikpilee dee. An pu ní ti cáá dipɔbil ki sòoǹ ki cántí tikɔkɔ. 13Timbi kaa làá ŋá kii Mooyiisi nín nìn dū ŋŋaabu ki bīiǹ u-nimbiin Isirayeel yab ń taa kpèè-u kí nīn cí ŋyunti ŋun ní ŋwalifee làá dāá lēēyee#3.13 Kpèè Disa 34.33.. 14Ama bi-landɔkɔi kaa cútí tibɔti malaa, a lì kii ŋŋaabuee dáá gbíntì ki lìkī bi-nimbiinee. Di sá yii bi yaa kàaǹ Dipooŋkpikil gbɔŋku poonee, baa gbìl̀ taapu, áli ki dāa sāā díǹee, bi-landɔkɔi kaa cútí tibɔti. See unil un fōō Kriisitoo ki kííyee baba nimbiin ní ŋŋaabu bìitī. 15Áli ki dāa sāā díǹ, bi yaa bíi kàaǹ Mooyiisi gbɔntee, an bí kii ŋŋaabuee lìkī bi-landɔkɔi ní baa gbìl̀ taapuee. 16Unil un yaa fōō ti-Dindaan ki kííyee nimbiin ní ŋŋaabuee lèekī#3.16 Disa 34.34.. 17Di sá yii ti-Dindaanee, Ŋfam dee. Laakin ti-Dindaan Fam yaa bée, niin ní dibatɔl bí. 18Timbi bin kɔkɔ nimbiin ŋŋaabuee lēēyee di sá bin pu ní bi wāĺ ti-Dindaan nyootee. Ti-Dindaan un di sá Ŋfamee di kpántí-ti míǹ, ní ti náań nì u, ní ki cáá tinyool tin wīintí ki cée.

Currently Selected:

2 Corinthiens 3: BASSARDC

Highlight

Copy

Compare