1 Timothée 6

1Iyumbu máaǹ kí nīn tɔ́ i-dindambi nì i-pɔbiliŋ kɔkɔ. Mimmee binib kaa sòoǹ kí bīil̀ Unimbɔti yindi nì tibɔti tin ti dàkèe. 2Iyumbu in dindambi nóó Kriisitooyee, í taa kpèè-bi fám, yii bi nín sá i-nabiyaamuee pu. Míǹ gba ní i nín máaǹ kí nīn tūǹ ditundi mmɔntiimin, kun puee bin i tūǹ ditundi ki tììyee sá i-nabineeŋkaamu mun nóó Kriisitooyee ní.

Ibaamɔn gaajati nì tinyimɔmbɔti dàkatam

Min a máaǹ kí nīn dàkà binib ki kpáafí-bee sèé. 3Ubɔ yaa bíi dàkà tinyimɔmbɔti tiba, ki yíì, kaa nóó ti-Dindaan Yeesu Kriisitoo baamɔmbɔti nì bi nín dàkā-ti unil nín máaǹ kí nīn bí min Unimbɔti nimbiinee, 4udaan lámintí, kaa nyí tiba. Udaan būǹ tibɔti weeŋyi ní ki kpákà anyɔɔbun pu. An di cāabìń nnimbidiki, kujaau, asiibil, nì ilandɔkɔkpiti bi-jutiibi pu. 5Baa ti dàkafī nnimɔntiyaamin, baa ti nyí ibaamɔn, ki kpākantí tɔb an kaa kúntí. Bi nyí kii nnimbɔtisan sá laakin bi làá dī kí ká tigaajatee ní.

6Tiŋman, nnimbɔtisan lafun sá tigaajakpaandi ní, ŋyunti ŋun ní an mɔ̄ǹ-si tin a cááyee puee. 7Ti dɔ́miń duulinya nee ni nì iŋaŋkulim ní, míǹ ní ti làá dāá fàtīí tí gítí nì iŋaŋkulim. 8Míǹ puee, ti yaa cáá kun ti làá jēe nì kun ti làá pèen̄ee, án ŋmàntīǹ-tee. 9Ama bin nimbiliŋ máǹ tigaajati puee làá kɔ́ icɔŋkin kí lítí, ní nnimbitaataam tiwan tikpil pu min kaa cáá taapu ki cāabìń diwaŋkilee sàtī-bi kii kutaliŋŋuee. An di téekí binib ki cáǹ asaluun ki nàantí-bi. 10Di sá yii nnimbineel di cāabìń mbusub kɔkɔ. Biba nín néeń animbil puee, bi dū nnimbɔtisan ki fá ki dū bi-ba ki kɔ́ǹ dinimbinaamandin tikpil.

Isaŋkiluŋkikaa

11Ama sii Unimbɔti niliu, nyā tíǹ kɔkɔn, kí nyàab̀ kí nīn bí deedee, kí ŋúb́ dinimbɔtinool, kí nīn cáá fookii, kí nīn cáá dineendi nì kimɔtii, kí nīn mɔ̄. 12Á já kujamɔntiiu kun sá fookii jaakuee, kí cúú dimaŋfal din kaa kúntée. Di sá yii tíǹ pu ní Unimbɔti yíiń-si á béé-ŋu ŋyunti ŋun a nìn sòon̄ a nín fōō ki kíí kunipaau nimbiin miŋyee. 13Unimbɔti un tìì tiwan kɔkɔ dimaŋfalee nimbiin, nì Yeesu Kriisitoo un nìn sòon̄ ibaamɔn Pɔnsi Piilati#6.13 Kpèè Yoow 18.36-37, 19.11. cee mmɔntiimee mun nimbiin ní m kpáafí-si. 14Á kpèè tibɔti tin m ŋúbiǹ-si nee tiŋan kí taa yìntī. Bí taa ká a-pu tikpitil tiba kí nīn cí ŋyunti ŋun ti-Dindaan Yeesu Kriisitoo làá dāá páannée. 15Ŋyunti ŋun Unimbɔti yóoǹee yaa láa bāańee, ní ú yàntī Yeesu ń páanní. Úǹ di sá nnaam nyeel ní ki sá tikɔkɔ Dindaan, bibɔtiibi kɔkɔ Bɔtiu nì bidindambi kɔkɔ Dindaan#6.15 Dūú ŋmàntī nì Ditee 10.17, Ilan 136.3.. 16Úǹ baba di kaa kúù, ki kóò ŋwalifi ŋun ubɔ kaa ŋūǹ kí sútí kí pìl̄ee ni. Báà unil kaa láá ká-u, ní kaa tí ŋūǹ kí ká-u#6.16 Dūú ŋmàntī nì Ilan 104.2, Disa 33.20, Yoow 1.18.. Úǹ di máaǹ tinyool nì mpɔn kí nīn cá jaanjaan! Ameeni.

17Á kpāafì bin cáá tigaajati duulinya nee nee yii bí taa nín̄ cáá dilambil, kí taa nín̄ máká bi-gaajati tin kaa làá nīn bí ki cá jaanjaanee pu#6.17 Dūú ŋmàntī nì Luuki 12.20.. Ama bí dū bi-mákal kí ŋá Unimbɔti un di pūǹ-ti tikɔkɔ nì tikɔkɔ tikpil tikpil tí nīn bí mmɔnnee ni. 18Bí nīn ŋáań tiŋan. Bi-gaajawanti nín wīikí puee, bi-tummɔntiiŋi mun ń nīn wīikí míǹ, bí nīn cáá tiniti ki yàkatī tin bi cááyee nì bin kíǹee. 19Bi yaa ŋá mimmee, bi kōontí tigaajamɔntiil tin kaa bíiĺee ki sīintí án nīn dɔ̄ ki cí-bi foolboon dee#6.19 Dūú ŋmàntī nì Maat 6.20., ní bí ŋmā kí ká ibaamɔn maŋfal.

20Sii Tiimootee, kpāafì tin Unimbɔti tīī-see tiŋan, kí gɔ́ntí tibɔfan tin kaa nàaǹ nì nnimbɔtisanee, kí taa cèeǹ a-nyɔkɔ bin bí yii bi cáá iciin kin kaa cááyee nikpɔŋkpɔkɔku poon. 21Di sá biba nìn bí yii bíǹ di nyí dinyil gbanti ní ki dāa dū nnimbɔtisan ki fá.

Kriisitoo ŋanti ń nīn bí ni-pu.

Currently Selected:

1 Timothée 6: BASSARDC

Highlight

Copy

Compare