1 Timothée 5

Ditundi din bi máaǹ kí tɔ̄ kí tīī Kriisitoo yabee

1Á taa wòoǹ utikpil mpɔn. Á sòoǹ nì u soooo kii a-baayee#5.1 Dūú ŋmàntī nì Akoo 19.32., kí nīn sòoǹ nì binaacimpɔmbi kii a-naalibee. 2Á nīn sòoǹ nì binimpukpaambi kii a-nabee, nì binimpusapɔmbi kii a-niisalibee nì tibulcin poon.

3Á nīn ŋúb́ bikpiipoobi bin kaa cáá báà ubɔ nì ubɔee kí nīn tɔ́-bi. 4Ama ukpiipu ubɔ yaa cáá mbiyaamu, an yaa tí sá u-naantiibaaa, bíǹ di máaǹ kí béé nnimbɔtisan tundi bi-ba dicaŋku poon kí wàatī ní kí ŋúb́ bi-nab nì bi-naambi kí téeǹ, min fáatì Unimbɔtee dee. 5Unimpu un yaa lafun sá ukpiipu, kaa cáá ubɔ ń kpèè-uee dù u-mákal kí ŋá Unimbɔtin ní, ki mèé ki gbàam̄ Unimbɔti ŋwiimpu nì kunyeeu. 6An yaa sá ukpiipu un ŋáań min kaa kítèe, u bí dimaŋfalin ama ní ki kpíì. 7Tin tin a máaǹ kí dūú dàkà-bee dee, án nín làá ŋá pu ubɔ ń taa ká ikpiti iba bi-puee. 8Un kaa ŋúb́ u-dicaŋku tiŋanee, m lì ki bántí u-diiku poon nib kíŋŋŋ ní, mimmee udaan fá fookii, ní bin kaa fōō Yeesu ki kííyee sɔ́ǹ-u.

9Bí taa ŋmà ukpiipu ubɔ yindi kí kūtì bikpiipoobi gbɔŋku poon, asee ukpiipu un yaa cáá abin jítì abin imuŋku ita puee baba. Kí wàatēe, ú nīn sá un nìn mɔ́ǹ uninjabaantee. 10Ú nīn sá unimpu un bi pàkà yii u tūǹ atummɔnti ki ŋúń ki ŋúb́ u-biyaamu tiŋan, ki fòol̄ binicambi mmɔntiimin, ki fíntí Unimbɔti nib taaŋi#5.10 ki fíntí Unimbɔti nib taaŋi: Dooooyee, a yaa nìn fōō unicaanee, a fíntí u-taaŋi ní, míǹ di dàkà yii a fōō-u nì a-pɔbil kɔkɔ., ki tútúǹ bifalaadambi, ki pée tūǹ atummɔnti ŋmaniŋmee.

11An yaa sá bikpiipusapɔmbee, bí taa ŋmà bi-yiŋŋi kugbɔŋu poon, kun puee nninjaneel ŋūǹ kí cúú-bi bí dū Kriisitoo kí fá, kí cùú mɔ̄ǹ. 12Bi nín ŋá mimmee ní kí kɔ́ Unimbɔti bɔtin, kun puee bi nín nìn pōoǹ yii bi làá ŋá miŋyee, baa ti ŋúń ki ŋá. 13Kí kūtèe, bi nín kaa cáá tiba kí ŋée puee ní bi yìiǹ ki póotí acin. Tin gíti púntèe di sá bi kíǹ ki cáá kubɔcaau ní ki sòoǹ icoo bɔti, nì tin tin kaa bàà máaǹ bí sòoǹee. 14An pu ní m là yii bikpiipoobi bin dáá pɔ̀ɔǹee ń mɔ̄ǹ kí màal̀ mbiyaamu kí nīn kpèé bi-ciŋŋi, án nín làá ŋá pu bí taa pɔ̄ unannanli nsan bí sòoǹ kí bīil̀-tee. 15Kun puee bikpiipoobi biba pūtì kpáàa dū nsammɔnti ki fá, ki kíǹ ki nóó Sitaan. 16Unimpu un fōō ki kííyee yaa cáá bikpiipoobi u-dumpuee, u máaǹ kí tūtuǹ-bi, kí taa dū ditúndi gbanti kí túń Kriisitoo nikitil pu. Míǹ di làá yàntī Kriisitoo nikitil ń ŋmā kí nīn tútúǹ bikpiipoobi bin kaa pée cáá báà ubɔ nì ubɔee.

17Bin kpòotī Kriisitoo nikitil mmɔntiiminee máaǹ tipaal mili pu. Cilinjee bin pu m sòoǹee di sá bin pɔ̄ɔntí ki sòoǹ Unimbɔti bɔti ki dàkà muee. 18Di sá Unimbɔti gbɔŋku poon lī yii: «Á taa bóob́ unaa un tà ki gbátí adibilee nyɔkɔ», ní ki gíti lī yii: «Utɔntɔnli máaǹ u-paati#5.18 Kpèè Ditee 25.4 nì 1 Kɔra 9.9, Maat 10.10, Luuki 10.7..» 19Ubɔ yaa dɔ́miń ki tùkū-si yii bin kpòotī Kriisitoo nikitilee ubɔ ŋá tibee, á taa fōō kí kíí, see binib bili kii bita di yaa ká ní ki tùkū-si#5.19 Dūú ŋmàntī nì Ditee 19.15.. 20Á nīn wòoǹ bin ŋáań ikpitee binib kɔkɔ nimbiin, án nín làá ŋá pu bin kíǹee ń fàŋkèe.

21M kpáafí-si Unimbɔti nì Yeesu Kriisitoo nì Unimbɔti tuuŋyi in u lútèe nimbiin, yii á ŋúb́ tibɔti tin m sòoǹ nì si nee kí taa nín̄ cáá dinigàntil, kí taa lēē biba ki ŋáań bíǹ tiŋan ki yàntī bin kíǹee. 22Á taa ŋá kujinjikilaapaau kí dū a-ŋalii kí páań ubɔ pu kí mèè u-pu kí tīī-u ditundi diba Kriisitoo nikitil kansikin, kí taa kɔ́ biba kpitiin. Nín̄ nyí nì a-ba kí nīn bí circir.

23Á taa ti nín̄ nyù nnyim ŋmaniŋma. Nín̄ nyù ndamam fiii ipɔŋween nì a-wunti nín nyàŋfī múlmulee pu.

24Bi wālifí biba kpitii kí wàatī gba ní kí nín sòoǹ bidambi bɔti, ama bibee, ibɔsoon poon ní bi dāa nín bìitī bíǹ kpitii pu. 25Míǹ ní bi tí kāntí atummɔnti mun. Ŋin ní baa kāntí malaayee gba mun kpá kí gbíntí dibalin.

Currently Selected:

1 Timothée 5: BASSARDC

Highlight

Copy

Compare