1 Timothée 1

Ijaam

1Man Pɔɔl, un sá Yeesu Kriisitoo kpambal din Unimbɔti ti-Fiiliu nì Yeesu Kriisitoo un pu ti mákée túnnée di ŋmàn̄ kugbɔŋu nee.

2M ŋmàn̄-ku kí tīī sii Tiimootee#1.2 Kpèè Atuun 16.1. un sá m-ba bindi pu jipɔɔn a nín fōō Yeesu Kriisitoo ki kííyee puee ní. Ti-Baa Unimbɔti nì ti-Dindaan Yeesu Kriisitoo ń ŋá-si tiŋan, kí sɔ̄ a-saai, kí tīī-si ŋgbansɔŋfi.

Á nīn nyí nì a-ba nì nnyimɔn dakaŋ

3Ŋyunti ŋun m làá nìn yīkì kí nīn cá Maseeduwaanee, m nìn tùkū-si yii á nīn kā Eefeesi#1.3 Maseeduwaanee : kpèè 2 Kɔra 1.16. - Eefeesi : kpèè 2 Kɔra 1.8. kí pìin̄ bin bí niin ki dàkà tinyimɔmbɔtee nsan bí taa ti dàkà. Á nīn ŋáań míǹ, 4ki dàkà-bi bí taa nín̄ kā ki máafí mmaam ki kàaǹ atiŋkpikiyin#1.4 atiŋkpikiyin: An sá bin nìn túń atummɔnti Dipooŋkpikil gbɔŋku poonee, nì bin yaa nìn tí sá bibaatandambee, bíǹ yiŋŋi ní bi nìn yíì múlmul. ŋin kaa dóotée. An cāabìń kunikpɔŋkpɔkɔu, kaa tútúǹ unil ń béé Unimbɔti nín yóoǹ puee: an dàkà yii tí fōō-u kí kíí. 5Kun pu ní a kpáafí-bi mimmee di sá a là bí nīn cáá dineendi din nyēeń dipɔɔnyaandinee ní, bi-landɔkɔjaatiŋu ń nīn sá mmɔnti bi-fookiiu ń nīn bá ki pɔ̄ɔ̄. 6Biba dū an saŋŋuee ki fá, ní ki cūtìi kɔ́ tibɔfan tin kaa cáá taapuee ni. 7Bi bàà là kí nīn dàkà binib Unimbɔti marab, ama nì min kɔkɔ bi dàkà nì mpɔnee, bíǹ biba kaa gbìl̀aaa, kaa nyí tibɔti tin bi sòoǹee taapu.

8Ti nyí yii marab sá tiwammɔntiil ní, a yaa dū marab gbanti ki ŋá min sá á dūú ŋée. 9Ti nyí yii an kaa sá binimɔntiibi pu ní bi yóoǹ marab, an sá bin gáatèe, nì bin yiliŋ pɔ̄ɔ̄yee, nì bin kaa tɔ́ Unimbɔtee, nì bikpitiŋaliibi, nì binib bin kaa là Unimbɔtee, nì bin bíiĺ Unimbɔti wantee, nì bin kù bi-baabi nì bi-nabee, nì binikpɔliibi, 10nì bin ŋáań tilaakpaalee, nì bin dɔ̀ nì bi-ninjajutiibee, nì bin nyáfí binibee, nì binyimɔndambi, nì bin pùtī fám fámee, nì bin kɔkɔ ŋáań tin jáà nì ibaamɔn bɔti tin bi dàkà-tee pu ní bi yóoǹ marab. 11Tinyool Nimbɔtiu un bí mmɔnnee Bɔmɔntiiti tin u dūu ŋá m-ŋaanee poon ní tin m sòon̄ ki tīī-ni nee kā.

Pɔɔl jáaḿ Unimbɔti u-ŋanti pu

12M jáaḿ ti-Dindaan Yeesu Kriisitoo un di tīī-mi mpɔn ki cáá m-pu dimákal yii ḿ tɔ̄ u-tundee. 13Nì min kɔkɔ m nìn sòoǹ u-pu min kaa kítèe ki sàantí u-yab ki wɔ́b̀-bee, Unimbɔti súń m-saai, kun puee maa nìn fōō Yeesu ki kíí, kaa nìn nyí yii m bíi yìntī#1.13 Kpèè Atuun 8.3, 9.4-5.. 14Ti-Dindaan ŋá-mi tiŋan tikpil ki yāntì m fōō ki kíí, ní ki tīī-mi dineendi din nyēeń Yeesu Kriisitoo ceeyee. 15Tibɔti nee sá mbaamɔn ní ki máaǹ báà ŋma ń fōō-tì kí kíí mmɔntiimin. Di sá yii Yeesu Kriisitoo dɔ́miń duulinya nee ni kí fīī binikpitib, binikpitibee kansikinee man di sá unikpitikpaan. 16Ama ní Unimbɔti súń m-saai ki yāntì Yeesu Kriisitoo dī man unikpitikpaan pu ki dàkā u-mɔtiiki nín wīikí min bulifee, án nīn sá kudaaŋŋu kí tīī bin làá dāá fōō-u kí kíí foolboon kí ká dimaŋfal din kaa kúntée. 17An puee, bí tīī Unimbɔti un bí talku, kaa kúù, baa wālifí-uee jilma nì tinyool. Úǹ baba di sá Unimbɔti, kí nīn cá abin abin! Ameeni.

18Sii m-biki Tiimootee, m dū tibɔti nee ki ŋá a-ŋaan. Kii tibɔti tin bi nìn fōō Unimbɔti cee a-pu dooooyee ki dūu nāatèe, á tɔ́kɔń tibɔtee pu kí já kujamɔntiiu. 19Á nīn gbíntìi ŋúb́ tin a nìn fōō ki kííyee kí nīn cáá nlandɔkɔmɔnti. Biba fá nlandɔkɔmɔnti ní bi-fookiiu ŋá fám. 20Ti kāntí binib gbanti kansikinee Imeenee nì Aleekisandir, bin m dū ki líiǹ Sitaan#1.20 bin m dū ki líiǹ Sitaan: An dàkà yii u nyántì-bi Kriisitoo nikitil kansikin, dūú ŋmàntī nì 1 Kɔra 5.5. - Imeenee : kpèè 2 Tiim 2.17. - Aleekisandir : kpèè 2 Tiim 4.14., án nín làá ŋá pu án cíiǹ-bi bí béé kí taa nín̄ gíti sòoǹ ki bíiĺ Unimbɔtee.

Currently Selected:

1 Timothée 1: BASSARDC

Highlight

Copy

Compare