2 Thessaloniciens 3
3
Ní nīn mèé ki tútúǹ-ti
1Nnabiyaamu, m-bɔjoolkaati sèé: ní nīn mèé ti-pu, án nín làá ŋá pu Unimbɔti bɔti ń gbìtī kí bà ntimu poon malaa malaa, kí nīn cáá tinyool kii an nín ŋá ni-cee miŋyee. 2Ní mèè ti-pu, án nín làá ŋá pu Unimbɔti ń nyāntí-ti binikpitib nì bitɔŋfitiibi ŋaanee, kun puee an kaa sá binib kɔkɔ di fòol̄ Unimbɔti bɔti ki kíikí.
3Ama ti-Dindaan sá ibaamɔndaan ní. U làá yàntī ní nīn ŋúb́ an pɔ̄ɔ̄, kí mɔ̄tì ni-pu Sitaan ukpiti ń taa ŋmā-ni#3.3 Dūú ŋmàntī nì Maat 6.13, Yoow 17.15.. 4Ti-Dindaan puee, ti cáá ni-pu dimákal ki béè mbaamɔn yii tin ti dàkā-nee, ni bíi ŋáań míǹ, ki làá nīn gbíntì ki ŋáań míǹ ki cá.
5Ti-Dindaan ń yàntī ní béé ni-pɔbiliŋ poon Unimbɔti neendi nì Kriisitoo nín tìì kimɔtii kiŋyee.
An máaǹ unil ń tɔ̄ ditundi
6Nnabiyaamu, nì ti-Dindaan Yeesu Kriisitoo yindi puee, ní gàntīmaan nnabiyaamu mun di sá biwutijoodambi kaa là kí ŋá min ní ti dàkà-nee. 7Nimbi ni-ba nyí ni nín máaǹ kí fōō min timbi ŋáańee, kun puee ti nín nìn bí ni-ceeyee, taa nìn sá biwutijoodambi. 8Taa dɔ́miń ki kā ubɔ pu u kpīintí-ti fám. Ama kí taa nín̄ kā ubɔ pu udaan ń nīn kpīintí-tee puee, ti nìn tūǹ ditundi ní ŋwiimpu nì kunyeeu ki gì#3.8 Dūú ŋmàntī nì Atuun 20.34, 1 Teesa 2.9.. 9Ti nín nìn bí ki ŋáań mimmee, an kaa sá yii taa nìn cáá nsan kí fōō ni-jikaati, ama ti ŋá míǹ ki dàkā-ni ní fōō min timbi ŋáańee ní. 10Di sá ti nín nìn bí ni-ceeyee, ti nìn tùkū-ni tibɔti tiba yii: «Un kaa là kí tɔ̄ ditundee kaa máaǹ kí jī mun#3.10 Dūú ŋmàntī nì 1 Teesa 4.11..»
11Kun puee ti gbìl̄ yii ni-kansikin biba sá biwutijoodambi ki kā kaa ŋáań diba ní ki cáǹ bi-ba ki kɔ̄ntí bi-jutiibi bɔtin. 12Nì ti-Dindaan Yeesu Kriisitoo yindi puee, ti tùkù ki kpáafí an nibee yii bí tɔ̄ ditundi nì dipɔɔsɔŋkil poon kí kpíiǹ bi-ba.
13Ama nimbee, nnabiyaamu, ní taa yàntī tiŋan diŋál. 14Un di yaa kaa tɔ́ tibɔti tin ti ŋmàn̄-ni kugbɔŋu nee poonee, ní dáań-u, ni nì u ń taa ti nín̄ nōotí, icoo ń kɔ́-u. 15Ní taa nín dū-u kí kpántí ni-nannanliu ní, ama ní sāŋkì-u kii unil nín sáŋkí u-nabiki tibɔti puee.
Ijaam nì dibiindi
16Ti-Dindaan un tìì ŋgbansɔŋfee u-ba ń tīī-ni ŋgbansɔŋfi ŋyunti kamaa nì tikɔkɔ poon. Ti-Dindaan ń nīn bí ni-kɔkɔ cee.
17Ijaam nee, man Pɔɔl m-ba ŋal di ŋmàn̄. M-gbɔnti kɔkɔ poonee, m nín nyìitī m-ŋal puee dee. Kpèèmaan m-ŋmaŋmabiti dee.
18Ti-Dindaan Yeesu Kriisitoo ŋanti ń nīn bí ni-kɔkɔ pu.
Currently Selected:
2 Thessaloniciens 3: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
