1 Timothée 2

Ŋwimmeem bɔti

1Tibɔpeepeekaal tin m kpáafí bí ŋée di sá bí nīn mèé ki gbàam̄ ki jáaḿ Unimbɔti binib kɔkɔ pu. 2Bí nīn mèé bibɔtiibi nì biyidambi kɔkɔ pu, án nín làá ŋá pu tiba ń taa páb́-ti, tí nīn bí nsɔŋfin kí nīn nóó Unimbɔti mmɔntiimin kí lafun nín̄ sá binimɔntiibee. 3Á mèè kí tīī binibee ŋān̄ Unimbɔti ti-Fiiliu cee, 4kun puee u là yii binib kɔkɔ ń ká difiil#2.4 Dūú ŋmàntī nì Eesee 18.23. kí béé ibaamɔn. 5Di sá yii Unimbɔti sá ubaanti, ní ugbaamil un yú timbi binib nì Unimbɔti kansikinee mun sá ubaanti, úǹ di sá Yeesu Kriisitoo un kpántì unilee. 6U dū u-ba ki tīī ki pàn̄ ti-kɔkɔ pu ki fōō-ti ki líì#2.6 Dūú ŋmàntī nì Maat 20.28.. U ŋá míǹ ki dàkā yii Unimbɔti là binib kɔkɔ ń ká difiil ŋyunti ŋun u síiǹee ní. 7Ní Unimbɔti dū-mi ki ŋá un sòoǹ u-bɔtee nì u-kpambal#2.7 Dūú ŋmàntī nì 2 Tiim 1.11., ḿ nīn dàkà bin kaa sá Juuda yabee u-bɔti tin sá ibaamɔnee bí fōō kí kíí. Tin m lì nee sá ibaamɔn ní, maa mɔ́ntí.

8An puee, m là yii, báà laakiŋyee, bininjab ń yòon̄ bi-ŋalii yilpu#2.8 Yòon̄ bi-ŋalii yilpu nìn sá min ní bi mèé dooooyee Isirayeel tiŋkinee ní. Kpèè Disa 9.29, 1 Bib 8.22. kí nīn mèé, bi-pɔbiliŋ poon ń nīn bí circir, bí taa nín̄ cáá diŋuul nì kunikpɔŋkpɔkɔu.

9M là yii binimpoobi mun ń nīn pèentí tiwan min kítèe, kí taa nín̄ nyāantí bi-ba ki gíti lákatí, kí taa nín̄ dàkà bi-ba, bi-yikpibóobitam ń taa nín̄ nyēē mbamin. Bí taa nín̄ cáá sindaariya nì abeedimbil wanti ki nyāantí bi-ba, kí taa nín̄ pèentí tiwan tin pɔ̄ɔ̄ kudaauee#2.9 Dūú ŋmàntī nì 1 Peet 3.3.. 10Ama bí nīn tūǹ atummɔnti ŋin máaǹ binimpoobi bin bí yii bi nóó Unimbɔtee tuuŋŋee. 11Bi yaa bíi dàkà Unimbɔti bɔtee, binimpoobi ń sìntī bi-ba taapu kí nīn ŋmí. 12Maa pūǹ nsan yii binimpoobi ń nīn dàkà bininjab, kí taa nín̄ wɔ́b̀ bininjab, bi máaǹ kí nīn kā soooo ní. 13Di sá yii Adam ní Unimbɔti péé péé ki náań, boonee ní ki nín náań Awa mun. 14An kaa tí sá Adam ní Sitaan ŋmātiǹ, u-nimpuu ní Sitaan ŋmātiǹ, ní u yīntì Unimbɔti marau#2.14 B. 13-14: kpèè Diny 2.7,21-22, 3.1-6.. 15Ama ní u-maaliŋu puee, u yaa gbíntì ki pɔ̄ɔntí u-fookiiu poon nì dineendi kí nīn bí circir kí taa nín̄ dàkà u-bee, u làá dāá ká difiil.

Currently Selected:

1 Timothée 2: BASSARDC

Highlight

Copy

Compare