1 Samuel 14

Joonatan jáń ki pɔ́ɔkiǹ Fiiliistii yab kitil diba

1Dalbee, Saayuul jipɔɔn Joonatan bí un ŋúb̀ u-janjawantee yii: «Dāan̄ tí cù Fiiliistii yab janjakitil din bí lapu jandi púee cee.» Ama Joonatan kaa nìn tùkū u-baa báà tiba. 2Saayuul nìn kā Giibeeya kpaanyɔkɔ busubu bubɔ taapu Miigirɔn tiŋkin, bijanjaliibi kii alaataa aluu nìn bí u-cee. 3Usaraaŋal ubɔ nìn bí u-cee ki ŋúb́ eefoodi. Úǹ di sá Akituub jipɔɔn Abiiya, Ikaboodi nabiki. Ikaboodi sá Fineeyaasi jipɔɔn ní ki sá Eelii un nìn sá ti-Dindaan saraaŋakpiliu Siiloo tiŋkinee naantiiu. Samaa kansikinee báà ubɔ kaa nìn nyí yii Joonatan búntì.

4Kí wàatī Joonatan ń bà Fiiliistii yab janjakitil ceeyee, u nìn jítì ataŋkpee ali ŋin nyɔmmu cɔ́m̀ee kansikin. Bi nìn yíì diba Booseesi ní ki yíì din kíǹee Seenee. 5Ditaŋkpapeekaalee nìn bí ŋgan pú ki túĺ Miikimaasi, ní din kíǹee bí ŋgiil pú ki túĺ Giibeeya. 6Ní Joonatan bí u-tɔntɔnliu yii: «Dāan̄ tí cù Fiiliistii yab bin kaa gífì akpancanee janjakitil nee cee. An yaa yíì ti-Dindaan làá yūĺ ti-boon, di sá yii ti yaa wīikáaa, ti yaa kaa wīikáaa, tiba kaa lìkintí ti-Dindaan nsan ú tīī-ti dijajil.» 7Ní u-tɔntɔnliu kíí-u yii: «Tin yaa pée fáatiǹ-see, ŋá míǹ. Tí nīn cá, m pá a-boon.» 8Ní Joonatan bí yii: «Tí nīn cá binib gbanti cee kí cáá ti-ba kí dàkà-bi. 9Bi yaa bí-ti yii: <Yūĺmaan niin, timbi làá dāan̄ ni-ceeyee>, ti làá yūĺ dibɔɔbaantiil, taa làá jɔ̄m̀ bi-cee. 10Ama bi yaa bí-ti yii: <Jɔ̄mìḿmaan ti-ceeyee>, ti làá jɔ̄m̀, di sá yii án di làá dàkà yii ti-Dindaan dū-bi ki ŋá ti-ŋaan.»

11Bi-liitil nín cá ki dū bi-ba ki dàkā Fiiliistii yab. Ní bíǹ bí yii: «Kpèèmaan, Eebru yab bin nìn sáǹ ki bál̀ ibòónee di nyēennée.» 12Binibee bí Joonatan nì u-tɔntɔnliu yii: «Jɔ̄mìḿmaan ti-cee, ti làá dàkà-ni tiba.» Ní Joonatan bí u-tɔntɔnliu yii: «Á páanní m-boon, ti-Dindaan dū-bi ki ŋá Isirayeel yab ŋaan.» 13Ní Joonatan nín dàb̀ ki nyìitī u-ŋalii pu ki bàlim̄ ki cá u-tɔntɔnliu pá u-boon. Joonatan nìn fátí Fiiliistii yab ki bīil̀ ní u-tɔntɔnliu pá u-boon ki púntí-bi. 14Ŋwiin gbantee, Joonatan nì u-tɔntɔnliu nìn kūū binib kii mmuŋku ní. Mpaan ŋun pu bi nìn bí bi kūū-bee kaa nìn wāā. Dijajil dipeepeekaal dee. 15Niinee dinyoondi kɔ́ Fiiliistii yab janjaliibi bin nìn gbíntì dijanjanaapaal puee nì bin nìn bí tisatinee nì samaa kɔkɔ. Bijanjaliibi bin yūlifí sintilee nì bin bi bífì bí nīn ŋàfēe mun nìn kɔ́ dinyoondin. Kí kūtèe kitiŋ nìn cīŋkì. Unimbɔti u-ba di nìn kɔ́ǹ-bi dinyoondi gbantin.

16Giibeeya, Beenjameen tiŋkinee, Saayuul janjaliibi bin nìn yú sintilee nìn bí ki kpèé. Bi nìn ká Fiiliistii yab nín sáń ki pùntī an kɔkɔ puee. 17Ní Saayuul bí bin bí u-ceeyee yii: «Yíiḿmaan ayin tí kpèè ŋma di nyáń ti-kansikin ki cūtì bi-cee?» Bi yíińee ní ki ká yii Joonatan nì u-tɔntɔnliu kpá. 18Saayuul bí usaraaŋal Ayiiya yii: «Cáań Unimbɔti dakaau doo.» Di sá yaadal wiiŋŋuee, Unimbɔti dakaau nìn bí Isirayeel yab janjanaapaalin bi-cee. 19Ŋyunti ŋun Saayuul bíi sòoǹ nì usaraaŋalee ní kuwoou mɔ̀tīi bíi pɔ́ɔkí Fiiliistii yab janjanaapaal pu. Ní Saayuul bí usaraaŋal yii: «Gbèen̄ dibalifil!»

20Ní Saayuul kpáfì u-janjakitil ní bi nín cá dikɔmbool pu. Bi bàn̄ee ki ká Fiiliistii yab bí ki kù tɔb. An nìn sá fìkilfikilkpaan di kɔ́-bi. 21Eebru yab bin nìn bí Fiiliistii yab cee ki tūǹ-bi atuunee nìn céeǹ-bi kujaau. Bíǹ nìn fātìi gítì Isirayeel yab nì Saayuul nì Joonatan jandi pú. 22Isirayeel yab bin nìn sáǹ ki bál̀ Eefiraayiim jooŋŋi puee gbìl̄ yii Fiiliistii yab sáǹ. Niinee ní bi mun kùl̄ ki bīiǹ bi-boon ki jáà nì bi. 23Ti-Dindaan nìn tīī Isirayeel yab dijajil ŋwiin gbanti.

Isirayeel janjaliibi fīī Joonatan

Bi nìn jáń ki tin jítì áli Beeti-Afeen tiŋki pu. 24Yaadal wiiŋŋuee, samaa nìn jíń falaa, kun puee Saayuul nìn pūtìi tɔ́ báà ŋma pu ki lī yii: «Un ní ŋwìiń yaa kaa láá jéetì man tɔ̀n̄ m-nannanliibi ipɔntoon ní udaan jíń tijinee, mbusu ń lítí udaan pu.» Samaa poonee, báà ubɔ kaa nìn jíń tijin. 25Bi-kɔkɔ nìn kɔ́ kubambaŋŋun. Tisiil nìn còol̀ kitiŋ. 26Bi nín kɔ́ kubambaŋŋunee, bi nìn ká tisiil dɔ̄ ki pùub̀ kitiŋ, ama bi-kansikin báà ubɔ kaa nìn sēē ki dáká, kun puee bi nìn fàŋkí mbusu. 27Ama Joonatan kaa nìn gbìl̄ u-baa nín yāntì samaa pūtèe. U nìn tāntì ŋkpandɔ ŋun u ŋúb́ee ki sēē tisiil ki dáká ní u-nimbiliŋ ŋāatì. 28Ní bijanjaliibi kansikin ubɔ bí-u yii: «A-baa bàà pūtì ki tɔ́ samaa pu yii: <Un yaa jíń tijin díǹee, mbusu ń lítí udaan pu.» An pu ní báà ŋma gīī. 29Joonatan bí yii: «M-baa cáań nnaabu ki tɔ́ kitiŋ pu. Kpèè m nín sēē tisiil ki ŋmɔ́ ki ká mpɔn puee! 30Samaa kɔkɔ yaa bàà lēē tin ti jáń ki fōō ti-nannanliibi ceeyee ki jíńee, ti nín bàà làá já kí pɔ̄ɔkiǹ Fiiliistii yab puee bàà làá nīn sá ŋkpaamin ní.»

31Ŋwiin gbantee, Isirayeel yab nìn kūū Fiiliistii yab kí yòon̄ Miikimaasi kí cáá sāā Ayalɔn. Bi nìn gīī púb. 32Niinee samaa páatìi jéetì tiwan tin bi jáń ki fōōyee pu. Bi nìn cúú ipii nì inaa nì anabil ki lāntì ní ki kāl̀ laakin fatiku dɔ̄ee ki ŋmɔ́. 33Ní bi tùkū Saayuul yii u-samaau yīntiǹ ti-Dindaan. Bi ŋmɔ́ tinan laakin bi lāntì tiwaŋkuti fatiku dɔ̄ee#14.33 Dūú ŋmàntī nì Akoo 19.26.. Ní Saayuul téeń yii: «Ni yīntiǹ mara! Bíntiḿmaan ditaŋkpakpaandi kí cáań doo.» 34Ní Saayuul bí yii: «Ní yìiǹ samaa kansikin kí tùkù-bi yii: <Báà ŋma ń cáań u-naau àá u-piiiu man cee. Doo ní ni làá kpɔ̀ tiwaŋkuti gbanti kí ŋmɔ́-tì. Mimmee naa làá ti ŋmɔ́-tì fatiku caŋin kí yìntīǹ ti-Dindaan.>» Kujoou gbantee, báà ŋma nìn cáań u-waŋkuluku niin ní ki kūū-kù. 35Míǹ ní Saayuul máń ti-Dindaan nsaraafan. Ŋúǹ di sá mpeekaa ŋun u máń ti-Dindaanee.

36Ní Saayuul bí yii: «Tí sìntī kunyeeu nee kí jà Fiiliistii yab boon kí fūkul̀-bi kí kpɔ̀ bi-kɔkɔ áli kutaa nì ku-wuntil.» Ní u-yab kíí-u yii: «A yaa pée ká min ŋān̄ee, ŋá míǹ.» Ní usaraaŋal bí yii: «Tí bàlifì ti-Dindaan kí wàatī.» 37Ní Saayuul bālifì ti-Dindaan yii: «Ḿ sìntī kí jà Fiiliistii yab boonaaa? A làá dū-bi kí ŋá Isirayeel yab ŋaanaaa?» Ama ŋwiin gbantee Unimbɔti kaa pée kíí tiba.

38Niinee ní Saayuul yíiń samaa kpilib kɔkɔ u-cee ki bí-bi yii: «Ní nyàab̀maan kí kpèè ikpiti in ní ti ŋá díǹee! 39M pūtì ti-Dindaan un sá Isirayeel yab fiiliu ki bí dimaŋfalinee yii báà an yaa sá gba m-jipɔɔn Joonatan di ŋá ikpiti gbanti, see bí kpɔ̀-u.» Samaa kɔkɔ poon báà ubɔ kaa gātì-u. 40Saayuul bí samaa yii: «Nimbi Isirayeel yab kɔkɔ, ní gítímaan dijandi diba, ma mun nì m-jipɔɔn ń yūĺ dijandi diba.» Ní samaa kíí-u yii: «A yaa pée ká min ŋān̄ee, ŋá míǹ.» 41Saayuul mēē ti-Dindaan yii: «Isirayeel Nimbɔtiu, ba pu ní aa kíí-mi díǹ ní? Ti-Dindaan Isirayeel Nimbɔtiu, an yaa sá man àá m-jipɔɔn Joonatan di yīntèe, án tāā Uriim, an yaa tí sá Isirayeel nibul di yīntèe, án tāā Tumiim#14.41 Uriim nì Tumiim bɔtee, kpèè Disa 28.30..» Ní an tāā Joonatan nì Saayuul, ní samaa nyáń tibɔtin.

42Ní Saayuul bí yii: «Tɔ̄maan kasi kí kpèè man nì m-jipɔɔn Joonatan un ní an sée, ní an tāā Joonatan.» 43Niinee ní Saayuul bí-u yii: «Tùkù-mi tin a ŋée.» Ní Joonatan bí-u yii: «M ká tisiil ní ki dū m-kpandɔŋu ki sēē ki dáká. M bɔ́ntì kí kpú.» 44Ní Saayuul téeń yii: «Joonatan, a yaa kaa kpíì díǹ, Unimbɔti ń dáaĺ m-tafal ŋkpitim pu!» 45Ama ní samaa bí Saayuul yii: «Joonatan yāntì Isirayeel yab ká dijajikpaandi. Waa máaǹ kí kpú. Án làá nīn sá ntimbiil bɔti ní. Ti pūtì ti-Dindaan yii u-yikpilku báà kubɔ kaa làá lítí kitiŋ. Di sá yii Unimbɔti di tútúǹ-u ní u ŋúń ki ŋá míǹ díǹ.» Samaa nín ŋá pu ki fīī Joonatan baa kūū-uee dee. 46Niin ní Saayuul gbēeǹ kaa ti jìn̄ Fiiliistii yab boon, ní Fiiliistii yab nín kùǹ bi-tiŋkin.

Saayuul beel bɔti

47Saayuul nín kāl̀ dibeel Isirayeel tiŋki puee, u nìn jáń nì u-nannanliibi bin kóò ki māntìi tú-uee. Bíǹ di sá Moowaab yab nì Amɔn yab nì Eedoom yab nì Sooba bɔtiibi nì Fiiliistii yab. Laakin pú ní u yaa nìn pée fātèe, u nìn jáà ki jīǹ ní. 48Ŋwiin ŋubɔee, u dàkā tininjati ki jáń ki pɔ́ɔkiǹ Amaleeki yab#14.48 Amaleeki yab: kpèè Disa 17.8.. U nìn jáń ki fōō Isirayeel yab ki nyántì bin nìn dòoń ki fúkuĺ bi-tiŋkee ŋaan.

49Saayuul jipɔmbi di nìn sá Joonatan nì Yisfii nì Malkisuwa. U nìn cáá bisalib mun bili. Meerab di sá ukpil ní Miikaal sá uwaal. 50Bi nìn yíì u-nimpuu Akiinoowam, Ayiimaasi bisal. U-janjakpiliu di nìn sá Abineer, Saayuul baawaai Neer jipɔɔn. 51Di sá yii Saayuul baa Kiisi, nì Abineer baa Neer sá Abiyeel jipɔmbi ní.

52Saayuul maŋfal wiiŋyi kɔkɔ poonee, u nìn jáń nì Fiiliistii yab nì dinimbinaamandi. An puee u yaa nìn ká ubɔ cáá dikpabil nì dibaatandee, u nìn cútí-u ú kpántí ujanjal ní.

Currently Selected:

1 Samuel 14: BASSARDC

Highlight

Copy

Compare