1 Samuel 15

Unimbɔti fá Saayuul

1Dalbee ní Samiyeel bí Saayuul yii: «Man ní ti-Dindaan nìn tú ḿ kàan̄-si u-nibul Isirayeel yab pu dibeel. Kɔŋkɔnnee á pīlifì ti-Dindaan bɔti tin m làá sòoǹ nì si nee. 2Ti-Dindaan Isirayeel Nimbɔtiu Mpɔŋkɔdaan nín lī puee sèé yii: <Isirayeel yab nín nìn nyánní Eejipiti tiŋkin ki dòońee, Amaleeki yab nìn pīiǹ-bi nsan. An puee m làá dáaĺ bi-tafal#15.2 Kpèè Disa 17.8-16, Ditee 25.17-19.. 3Kɔŋkɔnnee, cù kí já nì bi kí nàan̄ tin kɔkɔ bi cááyee pílpil, á taa sɔ̄ bi-saai. Á kpɔ̀ bininjab nì binimpoobi, mbiyaamu nì nnaŋgbammamu, inaa nì ipii, igutaamu nì mmamu.>»

4Ní Saayuul kóoǹ u-janjaliibi ki kpáfì Teelayiim ki kàan̄-bi. Bijanjaliibi bin nìn còom̄ ataayee nìn nyáń kutukub alaataa ali, ní Juuda yab janjaliibi nyáń kutukub saalaa. 5Saayuul nì u-janjaliibi nìn bàn̄ Amaleeki yab tiŋki caŋin ní ki kɔ́ mbunni ki nákáǹ. 6Ní Saayuul bí Keeni yab yii: «Nyāmaan Amaleeki yab kansikin kí cù ndan. Maa là yii tin m làá ŋá-bee ń kpáaǹ-ni. Di sá yii Isirayeel yab nín nìn nyánní Eejipiti tiŋkinee, ni nìn ŋá-bi tiŋan.» Niinee ní Keeni yab nyáń Amaleeki yab kansikin. 7Saayuul kūū Amaleeki yab kí yòon̄ Awiila kí tin cáa sāā Suur, Eejipiti tiŋkin ŋwìiń nyalaŋki pú. 8U nìn kūū Amaleeki yab kɔkɔ. See bi-bɔtiu Agaagi ní waa nìn kūū. 9Saayuul nì u-janjaliibi kaa nìn kūū Agaagi nì tiwaŋkuti tin ŋān̄ee, an dàkà yii ipii nì inaa nì tiwaŋkuti tin cáá laafiyee nì apibil. U nìn dū tin ŋān̄ee ki kpáafì kaa kūū-tì. U nìn kūū tin kaa bí tiban kaa ŋūǹ kí kèetēe ní. 10Niinee ti-Dindaan sòon̄ nì Samiyeel yii: 11«An wùn̄-mi m nín lēē Saayuul ki kāaǹ dibeelee. Di sá u fātì u-boon ki tīī-mi, kaa dū m-marab bin m tīī-uee ki túń ditundi.» Samiyeel nìn gíí diŋuul ní ki dū kunyamɔŋu ki mēē ti-Dindaan.

12Kutaafaau pɔ̀lpɔlee, Samiyeel péé kí cùú ká Saayuul. U bàn̄ee ní binib tùkū-u yii: «Saayuul cūtì Kaarmeel ki máń dikumpool. Míǹ boonee ní u kíĺ nsan ki nín sìntī Giilgaal.» 13Samiyeel bàn̄ ki ká Saayuul ní úǹ bí-u yii: «Ti-Dindaan ń bìin̄ a-boon! M ŋá tin kɔkɔ ti-Dindaan tīī-mi mara yii ḿ ŋée.» 14Ní Samiyeel bí yii: «Ipii nì inaa di kaa sūǹ ki kpáà m-tafaliŋ naaa?» 15Ní Saayuul kíí-u yii: «An sá bijanjaliibi di cáań tiwaŋkuti gbanti Amaleeki yab cee. Samaa lēē ipii in ŋān̄ee nì inaa in bí màlmalee ki cáań kí dūú ŋá ti-Dindaan a-Nimbɔtiu saraa. Ama ti kūū ki céetì tin kíǹee kɔkɔ.» 16Niinee ní Samiyeel bí Saayuul yii: «An ŋmāntì. M làá tùkù-si ti-Dindaan nín sòon̄ nì mi kunyeeu nee puee.» Ní Saayuul bí-u yii: «Nín̄ sòoǹ.»

17Ní Samiyeel bí-u yii: «Ŋyunti ŋun a nìn dàkafī yii aa bí tibanee, ŋyunti gbanti ní a kpántì Isirayeel naakɔti kɔkɔ yidaaŋwu. Ti-Dindaan u-ba di nìn kāaǹ-si á nīn sá Isirayeel yab bɔtiu. 18Ti-Dindaan di tú-si ki bí-si yii: <Nín̄ cá! Á kpɔ̀ Amaleeki yab binikpitib gbanti. Á kpɔ̀ kí céetí-bi báà ubɔ ń taa kíń.> 19Ba pu ní aa pílifì ti-Dindaan nyɔkɔ? Ba pu ní a yōoǹ tin ni jáń ki fōōyee, ki ŋá tin kaa kítèe ti-Dindaan nimbiin míǹ?» 20Ní Saayuul bí-u yii: «Ti-Dindaan nín bí yii ḿ ŋá puee míǹ deedee ní m ŋá. M cūtì laakin u tú-mee. M kūū ki céetì Amaleeki yab kɔkɔ, see bi-bɔtiu Agaagi baba ní m cúú ki cáań doo. 21Ama m-janjaliibi di lēē tin ti jáń ki fōōyee poon ipimɔnti nì inamɔnti in bàà sá tí kpɔ̀ kí céetée ki yóoǹ kí dūú ŋá ti-Dindaan a-Nimbɔtiu saraa Giilgaal.» 22Ní Samiyeel kíí-u yii: «Ti-Dindaan néeń bisaraawɔkaabi nì saraabi bin kíǹee kii unil ń nīn tɔ́ u-nyɔɔbundaaa? Aayee kpataaa! Unil ń nīn tɔ́ ti-Dindaanee jítiǹ saraabi, ní kí sìntī a-ba kí tīī-uee jítiǹ upìja kpam min bi cáa wù ŋŋmi ki ŋáań saraayee. 23Di sá yii a yaa yíì kaa tɔ́ Unimbɔtee kpitii jítiǹ dibɔɔbɔl kpitii, ní a yaa jáà nì ti-Dindaanee kpitii jítiǹ iwaatooti kpitii. A nín dū ti-Dindaan bɔti ki fée, u mun dū-si ki fá, aa làá nīn gíti sá ubɔti.» 24Ní Saayuul bí Samiyeel yii: «M ŋá ikpiti, m yīntì ti-Dindaan marab nì a-bɔkpaaŋi. Di sá yii m fāŋkì bijanjaliibi ní ki ŋá bi nín là puee. 25Kɔŋkɔnnee m gbāam̀-si dū m-kpitii kí pɔ̄-mi, kí céeǹ-mi ḿ cùú jāam̀ ti-Dindaan.» 26Ama ní Samiyeel bí-u yii: «Kpataaa maa làá cù, kun puee a dū ti-Dindaan marab ki fá, ní ti-Dindaan mun dū-si ki fá, aa ti sá Isirayeel yab bɔtiu.»

27Samiyeel lī míǹ ki fātì kí nīn cée ní Saayuul cúú u-bɔkutil gbeeŋgbeeŋyi ní an cúu tīl̀ ki gbíntì u-ŋaan. 28Ní Samiyeel bí-u yii: «Míǹ ní ti-Dindaan fōō Isirayeel beel a-ŋaan díǹ. U dū-dì ki tīī un jítiǹ-see. 29Á nīn nyí yii ti-Dindaan un sá Isirayeel yab nyootee kaa mɔ́ntáaa, kaa kpántí nlandɔkɔ kii unilee.» 30Ní Saayuul tí bí yii: «M ŋá ikpiti. Ama m gbāam̀-si, tīī-mi disíndi m-nibul kpilib nì Isirayeel yab nimbiin kí céeǹ-mi tí cù ḿ jāam̀ ti-Dindaan a-Nimbɔtiu.» 31Ní Samiyeel kíí ki céeǹ-u u cūtì ki jáam̀ ti-Dindaan.

32Samiyeel bí yii: «Cáaḿmaan-mi Amaleeki yab bɔtiu Agaagi.» Agaagi bāań ki yúl̀ an mɔ́ɔkiǹ-u, ní u lī u-neen yii: «Báà an ŋá pu, baa ti làá kpɔ̀-mi.» 33Ama ní Samiyeel bí-u yii:

«A-tàataajiki yāntì bibinaatiibi lóò mbiyaamu,

an puee si mun na làá lóó u-biki binimpoobi kansikin.»

Ní Samiyeel kūū-u ti-Dindaan nimbiin Giilgaal.

34Míǹ boonee ní Samiyeel nín fàtī Raama, ní Saayuul mun nín kùǹ u-dumpu Giibeeya. 35Samiyeel kaa ti ká Saayuul ní ki dāa kpáàa kpíì. U nìn sūǹ Saayuul pu, di sá yii ti-Dindaan nìn yáliŋkì u nín lēē-u ú nīn sá Isirayeel yab bɔtiuee.

Currently Selected:

1 Samuel 15: BASSARDC

Highlight

Copy

Compare