1 Samuel 13

Saayuul nì Fiiliistii yab jaaku nì u-yìntitam

1Saayuul nìn cáá kii abin (mmuŋku nì saalaa) ní bi kāaǹ-u dibeel, ní u kāl̀ dibeel (abin imuŋku ili nì abin ali). 2Saayuul nìn lēē Isirayeel yab kansikin bijanjaliibi kutukub bita. Kutukub bili nìn bí u-cee Miikimaasi nì ntimu mun bí Beeteel jooŋŋi puee, ní kutuku ubɔ un kíǹee bí u-jipɔɔn Joonatan cee Giibeeya, Beenjameen tiŋkin. U nìn yāntì Isirayeel yab bin kíǹee nín kùǹ.

3Joonatan nìn kūū Fiiliistii yab kɔmandaŋwu un bí Giibeeyayee#13.3 Giibeeya : Eebru gbɔŋku poonee, bi ŋmàn̄ yii Geeba ní, ama an sá kitimbaantii yindi ní bi yíiń míǹ. ní Fiiliistii yab gbìl̄. Ní Saayuul yāntì bi búń ŋyin kitiŋ kɔkɔn. Di sá yii u nìn lī yii: «See Eebru yab kɔkɔ ń béé-tì.» 4Isirayeel yab kɔkɔ gbìl̄ yii Saayuul kūū Fiiliistii yab kɔmandaŋwu, ní Fiiliistii yab kaa ti là bi-nimbil ń ká Isirayeel yab. Niinee bijanjaliibi kɔkɔ cūtìi kpáfì Saayuul cee Giilgaal. 5Ní Fiiliistii yab mun kóoǹ ki kpáfì kí já nì Isirayeel yab. Bi nìn cáá janjatɔrɔkub kutukub mmuŋku nì saalaa, bitanjakaliibi kutukub biluu, ní bi-janjaliibi wīikí tikpil kii tiŋku gbandi bulee. Ní bi cūtìi ŋātì bi-janjanaapaal Miikimaasi, Beeti-Afeen ŋwìiń nyalaŋki pú. 6Isirayeel yab nín ká yii bi wúkutìń bi-pu an pɔ́ɔkèe ní bi sáǹ ki kɔ́ itaŋkpalɔkɔn nì ibòó ni nì ntaŋkpafaŋfakamin nì adiin ŋin bi gbìn̄ taapu ki máńee nì afaginni nì anyimbɔbilin. 7Biba nìn sáǹ ki dūtì Jɔɔdan buŋŋu ki cūtìi bál̀ Gaadi nì Galaadi timmun.

Ŋyunti gbantee, Saayuul úǹ nìn dáá bíń Giilgaal ní u-janjaliibi bin nìn bí u-ceeyee wunti gbáà kpàkpakpa. 8Saayuul kāl̀ niin iwiin iluli ki cíitì Samiyeel. Di sá yii Samiyeel nìn bí-u yii ú kíntí-u Giilgaal, ama ní kaa cūtì ŋyunti ŋun u síiǹee. Niinee bijanjaliibi sáǹ ki yàl̄ ki wāatì Saayuul. 9Ní Saayuul bí yii bí cáań-u tiwaŋkuti tin bi làá dūú ŋá saraawɔkaa nì mpèé saraauee. Ní úǹ u-ba ŋá saraawɔkaa. 10U tin pée lì yii u ŋáań saraawɔkaa ki dóotée, Samiyeel mun dūu bāań. Ní u nyáń ki túŋkì-u ki jáam̀-u. 11Ní Samiyeel bālifì-u yii: «Ba ní a ŋée?» Ní Saayuul kíí-u yii: «M ká yii bijanjaliibi bíi sáń ki yàl̀, ní ŋyunti ŋun ti yóoǹee, aa bíi bàń ní Fiiliistii yab mun kpáfì Miikimaasi ki bɔ́ntì. 12Niinee m lī m-ban yii: <Fiiliistii yab làá dāan̄ kí túuǹ-mi Giilgaal ŋyunti ŋun maa láá ŋá saraabi ki sɔ̄ŋkì ti-Dindaan pɔbilee, an pu ní m fōō ditundi gbanti ki ŋá m-ba saraawɔkaa.>» 13Ní Samiyeel bí Saayuul yii: «A ŋá kii unil un yil lábitèe! Aa ŋúb́ mara un ti-Dindaan a-Nimbɔtiu tīī-see. A yaa bàà ŋúb́ mara gbantee, ti-Dindaan bàà làá yàntī a-dicaŋkun niliu ubɔ ń nīn pée kā dibeel Isirayeel tiŋkin kí nīn cá jaanjaan. 14A nín kaa ŋúb́ mara un ti-Dindaan tīī-see puee, a-beel kaa làá ti yúntí. Ti-Dindaan lēē unil ubɔ un kā u-pɔbil puee ki dūu kāaǹ dibeel ú nīn sá u-nibul bɔtiu.»

15Samiyeel yíkì Giilgaal ki túĺ u-saŋŋu. Bijanjaliibi bin kíǹee táá Saayuul ki yíkì Giilgaal ki cūtì. Saayuul kàan̄ bijanjaliibi bin kíǹ u-ceeyee, bi nìn sá binib alaataa aluu nyɔkɔm. 16Saayuul nì u-jipɔɔn Joonatan nì bijanjaliibi bin kíǹ u-ceeyee nìn gbíntì Giibeeya, Beenjameen tiŋkin. Fiiliistii yab bíǹ nìn ŋātì bi-janjanaapaal Miikimaasi. 17Dalbee Fiiliistii yab janjaliibi bin bi bífì bí nīn ŋàfēe nyáń dijanjanaapaal pu ki cúu yākatì akiti ata. Dikitipeekaalee nìn túĺ Oofiraa, Suwaal tiŋki watil pú, 18ní dikitililiitiilee túĺ Beeti-Oorɔn pú, ní dikititataatiilee túĺ kitiŋ kpaanyɔkɔ watil pú, laakin a yaa tɔ́kɔ́ a wāĺ Isaakpan Tantakal, an bí kuteeu watilee.

19Ŋyunti gbantee baa nìn gíti kāntí ucaa báà ubɔ Isirayeel tiŋki kɔkɔn. Di sá yii Fiiliistii yab kaa nìn là Eebru yab ń mɔ́ɔ́ ntàataajimu nì ŋkpamu. 20Isirayeel yab kɔkɔ nìn cá Fiiliistii yab cee ní ki lòontí akoo ŋin inaa cáa kùee nì bi-kooŋi nì bi-cɔkɔmmu nì bi-gaamu. 21Bi yaa làá nìn lòoǹ akoo ŋin inaa cáa kùee nì akoo nì ŋgaamu, àá bi yaa làá nìn tā inyanyee, bi nìn fòol̄ bi yaa yākatì jitɔn mitee, mili pu ní. 22An puee kujaau dalee, Saayuul nì Joonatan janjaliibi kaa nìn cáá ntàataajimu nì ŋkpamu. See Saayuul nì u-jipɔɔn baba di nìn cáá.

23Fiiliistii yab janjakitil nìn cūtìi yúl̀ Miikimaasi saŋŋu pu ntaŋkpafaŋfakamin.

Currently Selected:

1 Samuel 13: BASSARDC

Highlight

Copy

Compare