1 Samuel 12
12
Samiyeel bɔkpaafikaati tijoolkaal
1Samiyeel bí Isirayeel yab yii: «Kpèèmaan m pílifì ni-nyɔkɔ ki ŋá tin kɔkɔ ni bālifì-mee ki tīī-ni. M kāaǹ-ni ubɔti. 2Kɔŋkɔnnee úǹ di làá nīn kpòotī-ni. Man púĺ m-yikpiti píil̀. M-biyaamu cíkitì ki bí ni-kansikin. Doooo m-naacimpɔntin ní m kpōotì-ni ki dāa sāā díǹ. 3An pu ní m yú ni-nimbiin díǹ. Tin m yaa ŋée, ní lì ti-Dindaan nì ubɔti un u lēēyee nimbiin. M fōō ubɔ naau àá u-maŋkaaa? M mūul̀ ubɔ àá m sāaǹ ni-kansikin ubɔɔɔ? Ubɔ tīī-mi tiba ki ŋéeb́ m-nyɔkɔ m sòon̄ ki bīiǹ u-kpitii puɔɔɔ? M yaa ŋá-ni míǹ, m làá téeǹ-ni.» 4Ní Isirayeel yab kíí-u yii: «Aa mūul̀-ti, kaa sāaǹ ti-kansikin ubɔ, kaa fōō ubɔ mun cee tiba.» 5Ní Samiyeel fātìi bí-bi yii: «Ti-Dindaan nì un u lēē ú nīn sá ni-bɔtiuee sá m-seeradambi díǹ yii naa pée ká m-pu tikpitil tiba.» Ní bi kíí yii: «Tiŋman ní an sá.»
6Ní Samiyeel gíti kútì ki lī yii: «Ti-Dindaan un di lēē Mooyiisi nì Aarɔn ki yāntì bi nyántì ni-naanjab Eejipiti tiŋkinee sá m-seeradaaŋwu#12.6 Kpèè Disa 6.26.. 7Kɔŋkɔnnee ní dāá yūĺ ti-Dindaan nimbiin. M làá kàaǹ-ni atummɔnti ŋin kɔkɔ u ŋá ki tīī ni nì ni-naanjabee. 8Jaakɔb nì u-yab nín nìn bàn̄ ki kóò Eejipitee, bi nìn sāaǹ-bi ní bi gbáń ibiil ki yíiń ti-Dindaan ú jòoń-bi#12.8 Kpèè Disa 2.23.. Ti-Dindaan nìn tú Mooyiisi nì Aarɔn bi nyántìń-bi ki cáań ki kāaǹ kitiŋ kin poon ni bí nee. 9Ama ni-naanjab nìn súntì ti-Dindaan bi-Nimbɔtiu pu. Niinee ní u dū-bi ki líiǹ Siisira un sá Asɔɔr janjaliibi kpiliuee nì Fiiliistii yab nì Moowaab bɔtiu#12.9 Siseela : kpèè Bibɔ 4, Fiiliistii yab: kpèè Bibɔ 13.1, Moowaab : kpèè Bibɔ 3.12-14.. 10Niinee ní ni-naanjab tí kúuǹ ki yíiń ti-Dindaan ú jòoń-bi. Bi nìn lī yii: <Ti ŋá ikpiti. Di sá yii ti dū-si ki fá ki cūtìi bíi tòotī awaa ŋin bi yíì Baal nì Asitaarteeyee. Ama kɔŋkɔnnee fīī-ti ti-nannanliibi ŋaan ní tí nīn kíǹ ki jáaḿ-si#12.10 Kpèè Bibɔ 10.10-15. - Asitaartee : kpèè Bibɔ 2.13..> 11Niinee ní ti-Dindaan túnní Geedeeyɔn nì Beedan nì Jeefita nì man Samiyeel kí fīī-ni ni-nannanliibi bin māntìi tú-nee ŋaan. An yāntì ni kāl̀ kitiŋ nee poon nì ŋgbansɔŋfi#12.11 Geedeeyɔn: kpèè Bibɔ 6-8, Beedan : baa nyí úǹ pu, Jeefita : kpèè Bibɔ 11.. 12Ama ni nín ká yii Amɔn yab bɔtiu Naasi dòoń kí já nì nee, nì min kamaa ti-Dindaan ni-Nimbɔtiu sá ni-bɔtiuee, ní ni bí-mi yii: <Ti là á kàan̄-ti ubɔti#12.12 Naasi : kpèè ayil 11. - Ti là á kàan̄-ti ubɔti!: kpèè 8.19.!> 13Kɔŋkɔnnee kpèèmaan ni-bɔtiu un ni lēēyee sèé. Ni bālifì yii ni là ubɔti ní ti-Dindaan tīī-ni ubɔti. 14Ni yaa fàŋkí ti-Dindaan, ki nóó-u, ki tɔ́-u, ki yaa kaa yíkìi jáń nì u-marab, ní ni nì ni-bɔtiu yaa nóó-uee, tikɔkɔ làá còom̀-ni tiŋan. 15Ama ni yaa kaa tɔ́ ti-Dindaan, ki yaa yíkìi bíi jáà nì u-marabee, u làá dáaĺ ni-tafal ŋkpitim pu, kii u nín nìn dáaĺ ni-naanjab tafal puee. 16Kɔŋkɔnnee, ní bɔ́ntí ni-ba. Ni làá ká nì ni-nimbiliŋ maamaacikpaan un ti-Dindaan làá ŋée. 17Kudiceeu yuntiŋu poon ní taa bí naaa? M làá mèè ti-Dindaan ú yàntī utaa ń fáá didundi kí nì. Niinee ni làá béé yii ni nín bālifì yii ni là ubɔtee, an sá ikpitikpaan ní ni ŋá ti-Dindaan nimbiin.»
18Ní Samiyeel mēē ti-Dindaan ní ti-Dindaan yāntì utaa fáá didundi ki nìn̄. Yaadal wiiŋŋu gbantee, samaa kɔkɔ nìn fāŋkì ti-Dindaan nì Samiyeel tikpil. 19Ní Isirayeel yab kɔkɔ bí Samiyeel yii: «Gbàam̀ ti-Dindaan a-Nimbɔtiu ti-pu tí taa kpú. Di sá yii ti pée ŋá-u ikpiti, ní ti nín gíti bālifì yii ti là ubɔtee mun kpitii dɔ́miń ki kútì.» 20Ní Samiyeel bí-bi yii: «Taa fàŋkìmaan. Tiŋman ni lafun ŋá ikpitikpaan. Ama min bí nee, ní taa ti fàtī ni-boon kí tīī ti-Dindaan, ní nóó-u nì ni-pɔbil kɔkɔ. 21Ni yaa fātì ni-boon ki tīī-uee, ni làá cù kí nīn tòotī awaa dee. Too, awaa gbanti mun di kaa bí tiban, kaa tí ŋūǹ kí fīī unilee, kun puee ŋaa bí tiban. 22Tiŋman ti-Dindaan di là ní ki dū-ni ki ŋá u-nibul. An puee waa làá fá-ni, di sá yii u là kí dàkà u nín sá ukpaan puee ní. 23An yaa kíǹ man jandee, maa làá yìntīǹ ti-Dindaan kí gbèen̄ kí taa ti nín mèé ni-pu. M làá nīn gbíntìi dàkà-ni nsammɔnti, nsan ŋun tèen̄ee. 24Tin bée di sá ní fàŋkì ti-Dindaan, kí nīn nóó-u ibaamɔn poon nì ni-pɔbil kɔkɔ. Di sá yii ní kpèè maamaacikpaambi bin u ŋá ki tīī-nee. 25Ama ni yaa ŋáań tin kaa ŋān̄ee, u làá kúntí ni nì ni-bɔtiu.»
Currently Selected:
1 Samuel 12: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
