1 Rois 6

Kunimbɔtidii mātam

(Kpèè 2 Kroo 3.1-14)

1Isirayeel yab nín nyáń Eejipiti tiŋkin kuyuŋun abin alaataa anaa nì imuŋku inaa boonee, nì Saloomɔn nín jíń Isirayeel tiŋki pu dibeel dibinnanaatiil poonee ní u kíĺ ki bíi māā kunimbɔtidii. An nìn sá Siifi ŋmaliu, an dàkà yii dibindi poon ŋmaliliitiu poon ní.

2Kudii kun ní ubɔti Saloomɔn nìn máń ki tīī ti-Dindaanee nìn fɔ̀kɔ̀ mpúun pu meetab mmuŋku nì saalaa, ní ku-waaŋŋu nìn sá meetab saalaa, ní ku-fɔkɔŋŋu sá meetab saalku. 3Kunimbɔtidii dikpaaŋku nyɔkɔpuee, kudii kubɔ nìn bí bi tà kí kɔ́, ku-waaŋŋu nìn sá meetab saalaa kii kunimbɔtidii ku-ba waaŋŋuee, ní ku-púuŋŋu sá meetab biŋmoo. 4U nìn lēē tɔkɔlab kunimbɔtidii guŋŋi pu. Tɔkɔlabee nìn cáá tifukuŋkaal nì nlaamu. 5U nìn máń adiin ata ki tɔ́kɔǹ tɔb pu ki nákáǹ kudikpaaŋŋu gundi boon yal pu nì kudii kun bí poon púee ki kútì. 6Aditɔntɔkɔ gbanti kun bí taapuee waaŋŋu nìn sá meetab bili nì dijandi, ní kun bí kansikinee waaŋŋu sá meetab bita, ní kun tɔ́kɔ́ yilpuee waaŋŋu sá meetab bita nì dijandi. Di sá yii kunimbɔtidii boon pú gundi gbifiŋŋu kaa nìn sá mbaanti ki tin kátì yilpu. An puee bi nín nìn bɔ̀b̄ aditɔntɔkɔ yilpu puee kaa nìn kɔ́ kunimbɔtidii guŋŋi poon. 7Bi nìn lēē laaba ní ki kpítíi ŋáŋkí ataŋkpee. Ataŋkpee ŋin bi nìn kpítíi ŋáŋkée ní bi nìn dūu máń kunimbɔtidii. An puee bi nín nìn bíi māāyee, baa nìn gbìl̀ aama puɔɔɔ, kicɔkɔ puɔɔɔ, tikúti tɔntɔŋwanti tiba pu. 8Adiin ŋin bi nìn máń ki tɔ́kɔǹ tɔb puee, kansikin yɔkɔee punyɔkɔki nìn bí kunimbɔtidii ŋgiil pú ní. Akɔl pu ní bi nìn dìŋfī kí kɔ́ ku-poon nì yilpu diiku poon. 9Saloomɔn nín nìn máń Unimbɔti diiku ki dóòyee, u nìn dū seedir dɔi ní ki bɔ̀b̄ yilpu. 10Aditɔntɔkɔ ŋin u nìn máń ki tú kunimbɔtidii kɔkɔee, kudii kamaa fɔkɔŋŋu nìn sá meetab bili nì dijandi, ní bi dū seedir dɔjaliŋ ki páaǹ yilpu ní an dāa tɔ́kɔǹ kunimbɔtidii gundi pu.

11Ní ti-Dindaan bí Saloomɔn yii: 12«A bíi māā kudii nee kí tīī-mi ní nee. Ama a yaa nóó m-bɔkpaaŋi, ki ŋúb́ m-koobiliŋ ŋin m tīī-see, ní ki yaa ŋáań m-marab nín bí yii á ŋá puee, m làá ŋá m nín nìn pōoǹ a-baa Daafiidi a-pu puee kí tīī-si. 13M làá dāan̄ kí nīn kóò Isirayeel yab kansikin kudii nee poon. M kpá kí dū m-nibul Isirayeel yab kí fá jaanjaan.»

Bi nín nyɔ̄kɔntì kunimbɔtidii poon puee

14Saloomɔn nín nìn máń kunimbɔtidii ki dóòyee, 15u nìn látì seedir dɔpampaŋŋi ki nákáǹ ku-poon ki yōoǹ ku-taapu ki cáa sāā yilpu, ní ki dū siipreesi dɔi in bi látèe ki bíl̀ ku-taapu. 16Bi nìn tí dū seedir dɔi in bi látì apampanee ki nákáǹ poon diiku guŋŋi ki yōoǹ taapu ki cáá sāā yilpu. Kudii gbanti fɔkɔŋŋu nìn sá meetab saalaa ní. Bi nìn bɔ́ntì-ku ki dū-ku ki ŋá kunimbɔtidii pɔ̀ti pu, circir páaa laŋki#6.16 circir páaa laŋki: dūú ŋmàntī nì Disa 26.33-34.. 17Kudikpaaŋŋu kun nìn bí Circir páaa laŋki nyɔkɔpuee púuŋŋu nìn sá meetab mmuŋku ní. 18Bi nìn lēē koolookinti subiliŋ nì nsupumpukum min mātèe ki nákáǹ seedir dɔpampaŋŋi ŋin bi nìn dūu nákáǹ kunimbɔtidii guŋŋi puee. Seedir dɔi ní bi nìn dūu bīiǹ tikɔkɔ pu, an puee baa nìn wāĺ báà ditaŋkpal. 19Bi nìn bɔ́ntì kudikpaaŋŋu poon circir diiku kubɔ ní ki dū ti-Dindaan poondi dakaau ki síiǹ. 20Kudii gbanti púuŋŋu nìn sá meetab saalaa, ní ku-waaŋŋu sá meetab saalaa, ní ku-fɔkɔŋŋu sá meetab saalaa. Sindaariyamɔnti ní bi nìn dūu nyūntì-kù. Kudiiyee poonee, nsaraafan nìn bí ní bi dū seedir dɔi ki nákáǹ-ŋu ki māntìi tú. 21Bi nìn dū sindaariyamɔnti ki nyūntì kunimbɔtidii poon kɔkɔ. Bi nìn dū sindaariya ki mɔ́ɔ́ ikusaka yam ki dūu sākaǹ circir diiku gbanti punyɔkɔki nyɔkɔpu, ní ki fātìi dū sindaariya ki nyūntì. 22Bi nìn dū sindaariyamɔnti ní ki nyūntì kunimbɔtidii kɔkɔ, ki kpáaǹ nsaraafan ŋun nìn yú circir páaa laŋki punyɔkɔki caŋinee#6.22 Dūú ŋmàntī nì Disa 30.1-3..

23Bi nìn dū ɔliifi dɔŋu ki kpítì keerubimbi#6.23 keerubimbi , kpèè Diny 3.24 nì tin bi ŋmàn̄ kugbɔŋu faaku taapuee. bili ki síiǹ Circir páaa laŋki diikun, keerubim kamaa fɔkɔŋŋu nìn sá meetab biŋmoo ní. 24Keerubimpeekaa feeŋŋu ŋubɔ nìn sá meetab bili nì dijandi ní ŋun kíǹee mun meetab bili nì dijandi. Mimmee ifeen liitil waaŋŋu nìn sá meetab biŋmoo ní. 25Keerubim liliitee mun waaŋŋu nìn sá meetab biŋmoo kii upeekaayee, bi nìn ŋmà ní. 26Keerubimpeekaayee fɔkɔŋŋu nìn sá meetab biŋmoo, míǹ mbaantiim ní uliliitee mun fɔkɔŋŋu nìn sá. 27Bi nìn dū keerubimbi gbanti ki síiǹ Circir páaa laŋki poon ní. Bi nìn kpátì bi-feeŋyi, upeekaayee feeŋŋu ŋubɔ nìn tùutī digundi ní uliliitee feeŋŋu ŋubɔ tùutī digundi din kíǹee, ní bi-feeŋyi in kíǹee tùutī tɔb. 28Bi nìn dū sindaariya ní ki nyūntì keerubimbi liitil#6.28 B. 23-28: dūú ŋmàntī nì Disa 25.18-20..

29Bi nìn kpítì keerubimbi nì ibafi nì nsupumpukum min mātèe ki nákáǹ kunimbɔtidii guŋŋi poon nì boon ki māntìi tú. 30Bi nìn dū sindaariya ní ki ŋàl̄ adiin liitil poon.

31Bi nìn dū ɔliifi dɔŋu ki kpáá kipunyɔkɔ kin cáá punuubi bilee ki pīiǹ Circir páaa laŋki diiku. Bi yaa nìn yākatì punuu waaŋŋu miŋmoo puee, punuu yilpu dɔŋu nì idɔ ili in pu punuu cɔ́ee nìn fòol̄ diba pu ní. 32Bi nìn kpítì punuubi bilee pu keerubimbi nì ibafi nì nsupumpukum min mātèe, ní ki dū sindaariya ki nyūntì. Bi nìn dū sindaariya ki nyūntì keerubimbi nì ibafee mun. 33Bi nìn kpáá punuu ubɔ mun ki pīiǹ kunimbɔtidii dikpaaŋku. Ama niinee, bi yaa nìn yākatì punuu gbanti waaŋŋu minaa puee, diba pu sá punuu yilpu dɔŋu nì idɔ ili in pu punuu cɔ́ee ní. 34U nìn gíti dū siipreesi dɔŋu ki kpáá punuubi bili, ní ki kpítì abɔmbil ali ki nyɔ̄kɔntì punuubi liitilee. 35Bi nìn gíti kpítì punuubee pu keerubimbi nì ibafi nì nsupumpukum min mātèe ki nyɔ̄kɔntì, ní ki dū sindaariya ki nyūntì laakin bi kpítèe.

36Míǹ boonee ní u máń poon cindi. Bi nín nìn máń dicindi gundi puee sɔ̀. Bi nìn máń ataŋkpee ikuul ita nì seedir dɔi ŋkuul ŋubɔ.

37Saloomɔn nín kāl̀ dibeelee, dibinnanaatiil ŋmaliliitiu poon, an dàkà yii uŋmal un bi yíì Siifee poon ní bi bíl̀ ti-Dindaan diiku nyeel. 38Saloomɔn nín kāl̀ dibeelee abin saalaa nì diba ŋmaniniitiu poon, an dàkà yii uŋmal un bi yíì yii Buulee poon ní bi dóò kunimbɔtidii tuuŋŋi kɔkɔ pái. Saloomɔn nìn dū abin aluli ní ki máń-ku.

Currently Selected:

1 Rois 6: BASSARDC

Highlight

Copy

Compare