1 Rois 5

1Saloomɔn di nìn kpòotī abee ŋin kɔkɔ nìn bí kí yòon̄ Eefiraati mɔɔl nì Fiiliistii yab tiŋki kí cáá sāā Eejipiti tiŋki kpaanyɔkɔee. Bíǹ gbanti kɔkɔ nìn bí Saloomɔn taapu ní ki pà lampoo ki tìì-u u-maŋfal wiiŋyi kɔkɔ poon#5.1 Dūú ŋmàntī nì Diny 15.18, 2 Kroo 9.26..

2Saloomɔn nì u-naacimbi jinti ŋwiin nìn nyáń ŋyim min bi yīlifèe tɔɔnib biwa nì ŋyim min bi nàn̄ an gíìyee tɔɔnib saalku nì bita, 3nì inaa in bi tìì tijin i bí màlmal ki cáá ŋkpamee saalaa, nì inaa in bi kpàá kunaakpaapɔɔunee mmuŋku, nì ipii dilaataal, ní kí nín kūtì ikpiil in yiŋyi cáá apantampalee nì ipeeman in yiŋyi cáá mpamuee nì icaŋkpalim nì inoon.

4Saloomɔn di nìn kpòotī ntimu mun nìn bí Eefiraati mɔɔl ŋwìiń nyalaŋki púee kɔkɔ, kí yòon̄ Tiifisaa kí cáá sāā Gaasaa tiŋki. An di nìn yāntì Eefiraati mɔɔl ŋwìiń nyalaŋki pú bɔtiibi kɔkɔ nìn bí u-taapu. Ŋgbansɔŋfi nìn bí u nì ntimu mun kɔkɔ māntìi tú-uee yab kansikin. 5Saloomɔn maŋfal wiiŋyi kɔkɔ poonee, Juuda yab nì Isirayeel yab nìn kā ŋgbansɔŋfin ní, kí yòon̄ Daani ŋgan pú kí cáá sāā Beerseeba ŋgiil pú. Báà ŋma nìn cáá u-fiinyi sufii nì u-fiigi sufii ní ki nìn bí ŋgbansɔŋfin#5.5 Kpèè 2 Sami 3.10..

6Saloomɔn nìn gíti cáá itaamu kutukub saalaa nì bili nì tinaabakal tin poon itaamu in dátí tɔrɔkubee bée. Tinaabakal gbanti poonee, inaa kutukub imuŋku ili nìn ŋūǹ kí kɔ́#5.6 Kpèè 10.26, 2 Kroo 1.14, 9.25, dūú ŋmàntī nì Ditee 17.16..

7Kɔmandambi saalaa nì bili bin ubɔti nìn lēēyee nìn cāabìń tijin ki tìì ubɔti Saloomɔn nì bin kɔkɔ jīǹ u-dumpuee. Kɔmandan kamaa nìn cáá dibindi poonee uŋmal un ní u cāabìń tijinee ní. Baa nìn yàntī tiba nì tiba ń lóó-u. 8Bi nìn gíti cāabìń ɔɔji nì timool ki tìì itaamu in dátí tɔrɔkubee nì itaamu in kíǹee laakin ubɔti kóòyee, ki nóó nì báà ŋma nín fōō mara kí ŋá puee.

Saloomɔn cáá iciin ki jítiǹ binib kɔkɔ

9Unimbɔti nìn tīī Saloomɔn iciin nì dinyil tikpil tikpil, ní tibɔti tin taapu u nìn gbìl̀ee nìn wīikí kii tiŋku gbandi bulee. 10Saloomɔn nìn cáá iciin ki jítiǹ ŋwìiń nyalaŋki pú nì Eejipiti ciŋfitiibi kɔkɔ. 11U nìn cáá iciin ki jítiǹ báà ŋma. U nìn cáá iciin ki jítiǹ ueesirayiitija Eetan, ki nìn jítiǹ Eeman nì Mawool jipɔmbi Kaalkool nì Daarda. An puee u nìn nyáń diyindi atimbun ŋin kɔkɔ māntìi túee nib cee. 12U nìn náań alaŋkpan kutukub bita nì ilan kutuku ubɔ nì ilan iŋmoo#5.12 alaŋkpan: kpèè Alaŋ 1.1, 10.1, 25.1, Ilan : kpèè Slaŋ kɔkɔ laŋŋu 1.1.. 13U nìn sòon̄ isufi pu. U sòon̄ Leebanɔn subu bun bi yíì seediree pu, ki sòon̄ kifaapibiki kin bi yíì isɔpi kì nyēē digundi puee pu. U nìn tí sòon̄ ipeel nì tiwaŋkuti nì inoon nì tiwaŋkuti tin fù ti-pool puee nì ijɔm pu. 14Binib nìn nyēeń atimbun kɔkɔn ki dòoń ki pílifí Saloomɔn nín sòoǹ tibɔti nì iciin puee. Kitiŋ pu bɔtiibi kɔkɔ di nìn tūnní-bi bi dòoń ki pílifí u nín sòoǹ tibɔti nì iciin puee.

Saloomɔn bíi bɔ́ntí kí mā kunimbɔtidii

(Kpèè 2 Kroo 2.2-15)

15Tiir tiŋki bɔtiu Yiiram nín gbìl̄ yii Saloomɔn fōō u-baa yil ki kpántì ubɔtee ní u lēē binib ki tú Saloomɔn cee, di sá yii Yiiram nìn pée sá Daafiidi bɔɔ ní. 16Saloomɔn mun nìn tú bí tùkù Yiiram yii: 17«Kéè a nyí yii m-baa Daafiidi kaa nìn ŋúń ki máń kudii ki tīī ti-Dindaan u-Nimbɔtiu, kun puee u-nannanliibi bin nìn māntìi túee nìn dòoń an kɔkɔ pu ki jáà nì u. Ama ti-Dindaan nìn jáń ki pɔ́ɔkiǹ u-nannanliibi kɔkɔ ki tīī-u. 18Kɔŋkɔnnee ti-Dindaan m-Nimbɔtiu tīī-mi diŋuŋfil ijaan kɔkɔ pu. Maa ti cáá unannanlaaa, kaa tí fàŋkí mun yii nnaabu ŋubɔ bí ki dòoń. 19Míǹ puee m cáá nlandɔkɔ kí mā kudii kí tīī ti-Dindaan m-Nimbɔtiu. Di sá yii ti-Dindaan nìn tùkū m-baa Daafiidi yii: <A-jipɔɔn un m làá dāá lēē ú fōō a-yil kí kpántí ubɔtee di làá dāá mā-mi kudii kun poon binib làá dāá nīn dòoń ki jáaḿ-mee#5.19 Kpèè 2 Sami 7.12-13, 1 Kroo 17.11-12..> 20An puee á tɔ̄ binib bí cù Leebanɔn kí gāań-mi seedir dɔi. M-tɔntɔnliibi làá kūtì a-yab pu. A yaa gíí-mi kunimbiŋmiiu kun ḿ pà a-tɔntɔnliibi puee, m làá pà. Di sá yii sii a-ba nyí yii ubɔ kaa bí ti-kansikin ki nyí didɔgaal kii Siidɔn yabee.»

21Yiiram nín gbìl̄ tin Saloomɔn sòon̄ee ní an mɔ́ɔkiǹ-u tikpil ní u lī yii: «Tí nyɔ̄ŋkì díǹ ti-Dindaan, di sá yii u tīī Daafiidi jipɔɔn un cáá iciinee ú jī Isirayeel nibul dikpaandi nee pu dibeel!» 22Míǹ boonee ní Yiiram tú bí tùkù Saloomɔn yii: «M fōō dinyɔɔbundi din a túnní bí tùkù-mee. M làá tīī-si seedir nì siipreesi dɔi kii a nín là puee. 23M-tɔntɔnliibi làá yòon̄-i doooo Leebanɔn jool pu kí cáań ditiŋkugbandi, ní ḿ yàntī bí bóob́-i kí dūú tɔ̄ tiŋkun kí cùnnì laakin a lèe. I yaa bāań niinee ní bí bútí ní a-tɔntɔnliibi ń dāá yòon̄. Kun m là á ŋá kí tīī-mee di sá á tīī-mi tijin ḿ dūú kpíiǹ m-dicaŋku yab.»

24Míǹ ní Yiiram tīī Saloomɔn seedir nì siipreesi dɔi kii u nín là puee. 25Saloomɔn úǹ nìn tīī Yiiram bilee tɔɔnib kutukub biluu nì ɔliifi kpamɔntiim liitirib kutukub binii ú dūú kpíiǹ u-dicaŋku yab. Dibindi kamaayee, kun ní Saloomɔn nìn tìì Yiiramee dee.

26Ti-Dindaan nìn tīī Saloomɔn iciin kii u nín nìn pōoǹ-u puee. Ŋgbansɔŋfi nìn bí Saloomɔn nì Yiiram kansikin. Bi-liitil nìn pōoǹ tɔb ipoon ki ŋá mpèé.

Saloomɔn bɔ́ntì atuun

(Kpèè 2 Kroo 1.18, 2.1,16-17)

27Saloomɔn nìn lēē Isirayeel yab kansikin binib kutukub mmuŋku nì saalaa bí nīn tūǹ diwɔ́bil tundi. 28U nìn cúú-bi ki yākatì akiti ata ní dikitil kamaa cáá binib kutukub saalaa. Dikitil kamaa nìn tūǹ ditundi uŋmamɔn ní Leebanɔn jooŋŋi pu, ní kí gítiń mmɔŋki kí ŋá iŋmal ili. Adooniiram di nìn sá diwɔ́bil tundi kpiliu. 29Saloomɔn nìn gíti cáá binib kutukub imuŋku ita nì saalaa bi tūntí ataŋkpee nì binib imuŋku inaa bi bí dijool pu ki kpítí ataŋkpee, 30kí kūtì bikpilib kutukub bita nì alaataa ata bin kɔmandambi nìn lēē bí nīn kpèé bitɔntɔnliibi gbanti tuuŋŋee. 31Ubɔti nìn tīī mara bí yìkitī ataŋkpakpaan kí kpítí-ŋi bí dūú bíĺ kunimbɔtidii nyeel. 32Niinee ní Saloomɔn tɔntɔnliibi nì Yiiram tɔntɔnliibi nì Geebaal yab kpítì ataŋkpee ki bɔ́ntì idɔ bí dūú mā kunimbɔtidii.

Currently Selected:

1 Rois 5: BASSARDC

Highlight

Copy

Compare