1 Rois 7

Ubɔti naakooku mātam

1Saloomɔn nìn máń úǹ u-ba diiku. U nìn dū abin saalaa nì ata ní ki máń-ku ki dóò. 2U nìn máń kudii kun bi yíì yii <Leebanɔn Bambaŋkuee>. Kudii gbanti púuŋŋu nìn sá meetab imuŋku ili nì saalaa, ní ku-waaŋŋu sá meetab mmuŋku nì biŋmoo, ní ku-fɔkɔŋŋu sá meetab saalku. Bi nìn dū seedir dɔi ki ŋá jaantalkub ki cóoǹ ikuul inaa pu, ní ki dū seedir dɔi ki páaǹ jaantalkubee pu. 3Bi nìn látì seedir dɔi apampan ki bɔ̀b̄ idɔlalikaa in pá jaantalkub puee pu. Idɔlalikaa gbanti nìn bí imuŋku ili nì iŋmoo ní, di sá yii ikuul nìn sá ita ní ŋkuul kamaa pu cáá idɔlalikaa saalku. 4Bi nìn lēē kudiiyee pu tɔkɔlab bin cáá tifukuŋkaalee ikuul ita ní tɔkɔlabee túĺ tɔb. 5Mpunyɔmu kɔkɔ nì idɔ in pu punuubi cɔ́ee nìn cáá ajan anaa, ki túĺ tɔb ní ki bí ikuul ita pu.

6U nìn gíti máń kudii kubɔ bi yíì-ku yii <Jaantalkub Diiku>. Ku-púuŋŋu nìn sá meetab mmuŋku nì saalaa, ní ku-waaŋŋu sá meetab saalku. Ku nìn sá kii kunaakoou yamee, ní ki cáá jaantalkub nì idɔ in bi dūu kpákám̀ kipunyɔkɔpuee. Kudii gbanti nìn bí kun bi yíì <Leebanɔn Bambaŋkuee> nimbiin ní.

7U nìn máń <Dibeejal diiku>, bi gíti yíì-ku yii <Ibɔsoon Diiku>, di sá yii niin ní Saloomɔn nìn sòoǹ tibɔti. U nìn dū seedir dɔpampaŋŋi ki nákáǹ kudiiyee guŋŋi pu kí yòon̄ taapu kí cáá sāā yilpu.

8Kudii kun poon Saloomɔn nìn kóòyee nìn bí dicindi diba mun poon ní. Ku nìn bí <Kubɔsoondii> boon pú ní, ama bi nín máń-ŋi puee sá mbaantiim ní.

Saloomɔn nìn gíti máń kudii kubɔ kii úǹ u-ba yɔkɔee ki tīī u-nimpuu, Faaroo bisal.

9Bi nìn dū ataŋkpee ŋin pɔ̄ɔ̄ kudaauee ní ki máń adiin gbanti kɔkɔ. Bi nìn ŋmàntī ataŋkpee gbanti ní kí gùutī, ní kí dū kijiseekikaai kí sèekī boon pú nì poon pú. Ataŋkpee gbanti ní bi nìn dūu máń adiin ki yōoǹ ŋi-nyeel ki tin látì-ŋi, ki kpáaǹ diciŋkpaandi guŋŋi. 10Ataŋkpamɔnti ŋin sá akpaan ŋi-fɔkɔŋŋu sá meetab binaa kii biŋmooyee ní bi nìn dūu bíl̀ adiin nyeel. 11Ataŋkpakpaan gbanti pu ní bi nìn cáá ataŋkpee ŋin bi ŋmāntì ki kpítèe nì seedir dɔyee ki pāantí ki māā. 12Bi nìn máń digundi ní ki māntìi tú diciŋkpaandi. Bi nìn dū ataŋkpee ŋin bi kpítèe ní ki máń ikuul ita ní ki nìn dū seedir dɔjaliŋ ki páaǹ. Míǹ ní bi nìn tí máń kunimbɔtidii cindi nì kudii kun bi tà kí nín kɔ́ kunimbɔtidiinee.

Ditundi din bi nìn tīī Yiiramee

(Kpèè 2 Kroo 2.12-13)

13Ubɔti Saloomɔn nìn tú bi yíiń utiirja Yiiram. 14U-na nìn sá Neefitalii naakookun ní ki sá ukpiipu ní u-baa sá utiirja. U nìn tūǹ tasa tundi ní. U nìn yáb̀, ki cáá iciin, ki nyí tasa tundi tiŋan. U nìn kíí ki dɔ́miń ubɔti Saloomɔn cee ki túń u-tuuŋŋi ŋin di sá tasa kúti tuuŋŋee kɔkɔ.

Tasa jaantalkub

(Kpèè 2 Kroo 3.15-17)

15U nìn dū tasa ki mɔ́ɔ́ jaantalkub bili. Bi-fɔkɔŋŋu nìn sá meetab biwa ní kí màntīí tūee sá meetab biluu. 16U nìn dūntì tasa ki mɔ́ɔ́ akɔl ali yam ki páaǹ jaantalkubee pu. Akɔlee fɔkɔŋŋu nìn sá meetab bili nì dijandi. 17U nìn gíti ŋá tinyɔkɔntikaal tilaandi nì ikusaka yam ki lúntì akɔl ŋin pá jaantalkubee pu. Dikɔl kamaa nìn cáá tinyɔkɔntikaal gbanti tiluli tiluli ní. 18U nìn tí lēē greenaadi subiliŋ ki nyɔ̄kɔntì. U nìn ŋá ikuul ili ní ki dūu lúntì tilaandi tin bīī akɔl puee pu. 19U nìn gíti mɔ́ɔ́ tin bí kii akɔlee tiba mun ki páaǹ jaantalkubee pu. Tì nìn bí kii nsupumpukumee ní ti-fɔkɔŋŋu sá meetab bili. 20Akɔlee yilpuee, bi nìn lēē laaba ki ŋá an gbìfì. Laakin nìn gbìfì gbantee nìn bí kilàaŋ́ŋi nì greenaadi biliŋ alaataa ali ŋin bi nìn dūu páaǹ mpɔ̀n pu ki māntìi tú dikɔl kamaa puee yilpu ní. 21Bi nìn dū jaantalkubee liitil ki cóoǹ kudii kun bi tà kí kɔ́ kunimbɔtidiinee nyɔkɔpu ní. Bi nìn yíì un bi cóoǹ ŋgan púee yii Yakiin, taapu di sá yii <Unimbɔti tìì mpɔn>, ní ki yíì un bi cóoǹ ŋgiil púee yii Boowaasi, taapu di sá yii <Unimbɔtin ní m-pɔŋŋu bí>. 22Bi nìn ŋá jaantalkubee yilpu kii nsupumpukumee ní. Míǹ ní Yiiram nìn mɔ́ɔ́ jaantalkubee ki dóò.

Bi dū tasa ki mɔ́ɔ́ kusɔŋkpaaŋŋu

(Kpèè 2 Kroo 4.2-5)

23Yiiram nìn dū tasa ki mɔ́ɔ́ kusɔŋkpaaŋŋu. Ku-waaŋŋu nìn sá meetab biŋmoo, ní ku-fɔkɔŋŋu sá meetab bili nì dijandi, ní kí màntīí tū-kùee sá meetab saalku. 24Bi nìn dū tasa kúti ki mɔ́ɔ́ koolookinti subiliŋ ki māntìi tú kusɔŋuee nyɔɔgbandi. Meeta kamaa fɔkɔŋŋuee, asubilee mmuŋku di nìn bí, ní bi ŋá ikuul ili. Ŋyunti ŋun bi dūntì tasa ki mɔ́ɔ́ kusɔŋuee ní bi dūntì ki ŋá asubil gbanti mun. 25Bi nìn dūntì tasa ní ki dūu mɔ́ɔ́ inajaa saalaa nì ili: ita nìn kpèé ŋgan pú ní ita kpèé ŋwìiń jeetilaŋki pú ní ita kpèé ŋgiil pú ní ita mun kpèé ŋwìiń nyalaŋki pú, ní bi dū kusɔŋuee ki tɔ́kɔǹ i-pu. 26Kusɔŋuee gbifiŋŋu nìn sá santimeetab binii. Bi nìn ŋáŋkì ku-nyɔɔgbandi kii kɔŋkɔnnyɔkaa nyɔɔgbaŋŋee, ní an gíti bí kii nsupumpukumee. Nnyim liitirib kutukub imuŋku inaa di nìn kàal̀ poon.

Tasa tɔrɔkub

27Yiiram nìn gíti dū tasa ki mɔ́ɔ́ tɔrɔkub saalaa. Tɔrɔku kamaa waaŋŋu nìn sá meetab bili ní ku-púuŋŋu sá meetab bili, ní ku-fɔkɔŋŋu sá meeta ubɔ nì dijandi. 28Bi nín nìn mɔ́ɔ̀-bi puee sèé: bi nìn gbáń tasa kúti an ŋá apampan ki dūu fúuń tifuuŋkaal poon. 29Bi nìn lēē tasa kúti apampanee pu gbikintib nì inajaa nì keerubimbi. Bi nìn dū tasa kútee ki mɔ́ɔ́ tinyɔkɔntikaal tin bí kii ikusaka yamee ki lúntì gbikintib nì inajaayee taapu. 30Bi nìn dū tasa ki mɔ́ɔ́ tɔrɔkubee taaŋi anaa ní ki mɔ́ɔ́ tasa kujaliŋ ki dū ataayee ki báaǹ. Akpinnaatilee puee, bi nìn dū akújalee ki báaǹ tiba pu tì náań nì ataa. Tin náań nì ataa gbantee, bi nìn dūntì tasa kúti ní ki mɔ́ɔ́-tì ŋyunti ŋun bi nìn dūntì ki mɔ́ɔ́ tifuuŋkaalee. Ama an kaa nìn jítiǹ tinyɔkɔntikaal tin bí kii ikusaka yamee pu. 31Bi nìn lēē kipunyɔkɔ dikuŋkundi tɔrɔku kamaa yilpu, kii santimeetab imuŋku ili nì saalaa. Kipunyɔkɔ gbanti di nìn tíkí kusɔŋuee. Ki-waaŋŋu nìn sá santimeetab biŋmoo kpá imuŋku inaa ní. Ki-jandi din nìn lībitì tifuuŋkaal puee jannaatiliŋ nìn ŋmà ní, dàa nìn bí dikuŋkundi. Bi nìn kpítì tiwan ki nyɔ̄kɔntì tasa kúti tin bi gbáń an ŋá apampanee. 32Tifuuŋkaalee nyɔɔgbandi pu ní ataa anaayee nìn bá ní akújal ŋin pu ataayee bée pūntì tɔrɔku taapu. Kí màntīí tū ditaalee nìn sá santimeetab biŋmoo kpá imuŋku inaa ní. 33Bi nìn mɔ́ɔ́ ataa gbanti kii janjatɔrɔkub taaŋee ní. Bi nìn dūntì tasa kúti ní ki dūu mɔ́ɔ́ ataa gbanti nì di-wanti kɔkɔ. 34Tiwan tinaa tin náań nì ataa ki bí tɔrɔkub kpiŋŋee nì tifuuŋkaalee nìn dūu ŋá tiwambaantiil ní. 35Tɔrɔku kamaa yilpuee, bi nìn lēē kipunyɔkɔ dikuŋkundi ŋwaan sá santimeetab mmuŋku nì biŋmoo. Bi nìn lēē aŋaŋkul an pu nì tasa kúti tin bi gbáń apampanee ní an ŋá ubaanti nì tɔrɔku jaŋŋi ŋin kɔkɔ kíǹee. 36Yiiram nìn gíti mɔ́ɔ́ ajan ŋin kaa nìn cáá aŋaŋkulee nì tasa kúti apampanee pu keerubimbi nì gbikintib nì tikpakpati. U nìn gíti mɔ́ɔ́ ikusaka iba mun ki nyɔ̄kɔntì. 37Míǹ ní bi nìn mɔ́ɔ́ tɔrɔkub saalaayee kɔkɔ: tiwambaantiil ní bi nìn dūu mɔ́ɔ́ bi-kɔkɔ, ní bi-fɔkɔŋŋu ŋmà ki náań.

38Yiiram nìn gíti dū tasa kúti ki mɔ́ɔ́ tisɔn saalaa ki tɔ́kɔǹ tɔrɔkub saalaayee pu. Kusɔŋu kamaa fɔkɔŋŋu nìn sá meetab bili ní. Nnyim liitirib kutuku ubɔ nì alaataa aluu di nìn kàal̀ kusɔŋu kamaa poon#7.38 Dūú ŋmàntī nì Disa 30.17-21.. 39U nìn dū tɔrɔkubee biŋmoo nì bi-sɔnti ki síiǹ kunimbɔtidii ŋgiil pú ní ki dū biŋmoo bin kíǹee nì bi-sɔnti ki síiǹ ŋgan pú. U nìn dū kusɔŋkpaaŋŋu dikuŋkundee ki síiǹ kunimbɔtidii ŋgiil pú, ŋfaŋfakam min bí ŋgiil pú nì ŋwìiń nyalaŋki púee.

Tiwan tin kɔkɔ bi nìn mɔ́ɔ́yee nyɔkɔm

(Kpèè 2 Kroo 4.7–5.1)

40Yiiram nìn gíti mɔ́ɔ́ nsampeemu nì peelab nì asambil ŋin poon bi ŋáań fatiku ki cáa yàantée.

U nìn túń ti-Dindaan Diiku tuuŋŋi ŋin ubɔti Saloomɔn nìn tīī-u ú tɔ̄ee ki dóò#7.40 Dūú ŋmàntī nì Disa 27.3.:

41Jaantalkub bili,

akɔl akuŋkun ŋin bi làá dūú páań jaantalkubee yilpuee,

tilaandi tili tin bi làá dūú bìin̄ akɔl ŋin pá jaantalkubee puee,

42nì greenaadi subiliŋ alaataa anaa ŋin bi làá dūú lúntí tilaandee puee, an dàkà yii kulaaŋŋu kamaa puee bi nìn lúntì greenaadi subiliŋ gbanti ikuul ili pu ní ki bīiǹ jaantalkub kɔliŋee pu,

43nì tɔrɔkub saalaa,

nì tisɔn saalaa tin tɔ́kɔ́ tɔrɔkub gbanti puee,

44nì kusɔŋkpaaŋŋu dikuŋkundee,

nì inajaa saalaa nì ili in tú kusɔŋu gbantee,

45nì asambil nì peelab nì asambil ŋin poon bi ŋáań fatiku ki cáa yàantée.

Tasa kúmɔntiiti ní Yiiram nìn dūu mɔ́ɔ́ tiwan gbanti kɔkɔ ki tīī ubɔti Saloomɔn ú dūú síiń ti-Dindaan Diikun. 46Jɔɔdan tantakalin, Sukooti nì Saartan kansikin ní ubɔti yāntì bi dūntì tasa kúti kuyɔkɔu paamun ki mɔ́ɔ́ tiwan gbanti kɔkɔ. 47Míǹ boonee ní Saloomɔn yāntì bi dū tiwan gbanti kɔkɔ ki síiǹ ti-Dindaan Diikun. Ama tiwanee nín nìn wīikí puee, baa nìn gíti ŋūǹ gba kí ŋmàntī kí béé tasa kúti tin bi nìn dūu ŋá an wantee nyiŋfiŋu.

48Saloomɔn nìn gíti yāntì bi dū sindaariya ki ŋá ti-Dindaan Diiku wanti tin an bàlifēe:

bi nìn dū sindaariya ki mɔ́ɔ́ nsaraafan ŋun pu bi tùutī talaalubee,

ki dū sindaariya ki mɔ́ɔ́ teebil un pu bi pāantí kpɔnɔb kí dūú sú ti-Dindaanee,

49ní ki dū sindaariya ki mɔ́ɔ́ fitilab tɔ́kɔŋkaati saalaa ki síiǹ circir páaa laŋki nyɔkɔpu, tiŋmoo nìn bí ŋgiil pú ní tiŋmoo mun bí ŋgan pú#7.49 Dūú ŋmàntī nì Disa 25.31-40.,

ní ki dū sindaariya ki mɔ́ɔ́ nsupumpukum nì fitilab nì tibabiti,

50ní ki dū sindaariya ki mɔ́ɔ́ nsampeemu nì bɔlfitantab nì asambil ŋin poon bi ŋáań fatiku ki cáa yàantée nì asambil nì nfantansamu,

ní ki dū sindaariya ki mɔ́ɔ́ circir páaa laŋki nì kudikpaaŋŋu punuubi nín sàkā tin puee.

51Míǹ ní ubɔti Saloomɔn nìn túń kunimbɔtidii tuuŋŋi kɔkɔ ki dóò. Míǹ boonee ní u yāntì bi cáań tiwan tin kɔkɔ u-baa Daafiidi nìn dūu sú ti-Dindaanee, an dàkà yii animbil nì sindaariya nì tiwan tikpil. Bi nìn dūu síiǹ ti-Dindaan Diiku nimbikpaafidiikun#7.51 Kpèè 2 Sami 8.11, 1 Kroo 18.11..

Currently Selected:

1 Rois 7: BASSARDC

Highlight

Copy

Compare