1 Rois 22

Akaab là kí fàtīí fōō Ramooti tiŋki

(Kpèè 2 Kroo 18.1-3)

1Abin ali ŋin páaǹee, ŋgbansɔŋfi nìn dōoǹ Siirii tiŋki nì Isirayeel yab kansikin. 2Ama dibintataatiil poonee ní Juuda bɔtiu Joosafaati dɔ́miń kí màntì Isirayeel bɔtiu Akaab pu. 3Akaab nìn tùkū u-kàliŋkpilib yii: «Kéè ni nyí yii timbi di yì Ramooti tiŋki kin bí Galaadi tiŋkpaaŋkinee yaa! Kin ba pu ní ti gíti gùgufī kaa làá cùú fōō-kì Siirii bɔtiu ŋaan?» 4Ní u bālifì Joosafaati yii: «A làá céeǹ-mi ḿ cùú já kí fōō Ramooti tiŋki kin bí Galaadi tiŋkpaaŋkineeee?» Ní Joosafaati kíí Isirayeel bɔtiu yii: «Man nì si sá unibaanti ní. A-nibul sá m-nibul ní a-taamui sá man taamui.»

Nnyimɔn bɔnaatiliibi sòon̄ dijajil pu

5Ama ní Joosafaati gíti kútì ki lī yii: «Tí bàlifì ti-Dindaan kí wàatī.» 6Niinee ní Isirayeel bɔtiu kóoǹ u-bɔnaatiliibi ki kpáfì. Bi nìn sá binib alaataa anaa nyɔkɔm ní ubɔti bālifì-bi yii: «Ḿ cùú já kí fōō Ramooti tiŋki kin bí Galaadi tiŋkpaaŋkineeyaaa, ḿ taa cù?» Ní bíǹ kíí-u yii: «Nín̄ cá! Ti-Dindaan dū-kì ki ŋá a-ŋaan.» 7Ama ní Joosafaati gíti bālifì yii: «Mimmee báà ti-Dindaan bɔnaatiliu ubɔ gíti kpá doo tí ŋmā kí cù u-cee kí bàlifì kí béé ti-Dindaan nín sòon̄ pueeee?» 8Ní Isirayeel bɔtiu kíí Joosafaati yii: «Ubɔ gíti bí un pu ti ŋūǹ kí bàlifì kí béé ti-Dindaan nín sòon̄ puee, ama maa là u-bɔti, di sá yii tin kaa ŋān̄ee ŋma ní u nàatī-mi, waa nàatī-mi tin ŋān̄ee dalba dalba. Úǹ di sá Yiimila jipɔɔn Miika.» Ní Joosafaati bí yii: «Taa sòoǹ míǹ!» 9Niinee ní Isirayeel bɔtiu yíiń u-kàlinjau ubɔ ní ki bí-u yii: «Cùú cáań Yiimila jipɔɔn Miika doo malaa!»

10Isirayeel bɔtiu nì Juuda bɔtiu Joosafaati nìn kā báà ŋma u-beejal pu Samaarii tiŋki punyɔkɔki caŋin ki pēē bi-beebɔkutiŋ. Bibɔnaatiliibi kɔkɔ nìn bí ki nàatī tibɔti bi-nimbiin. 11Keenaana jipɔɔn Siideekiyawuu nìn dū tikúti ki mɔ́ɔ́ ŋyin. U nìn bí yii: «Ti-Dindaan nín sòon̄ puee sèé: <Nì ŋyin nee ní a làá dūú já nì Siirii yab kí céetí-bi múb.>» 12Bibɔnaatiliibi bin kɔkɔ nìn kíǹee nìn pée sòoǹ tibɔbaantiil ní ki lì yii: «A ŋūǹ kí cùú já kí fōō Ramooti tiŋki kin bí Galaadi tiŋkpaaŋkinee. A làá já kí pɔ̄ɔkiǹ-kì, ti-Dindaan làá dū-kì kí ŋá a-ŋaan.»

Miika nāatì yii Akaab kaa làá já kí jī

(Kpèè 2 Kroo 18.12-27)

13Un bi tú ú cùú yíiń Miikayee bàn̄ee ní ki bí-u yii: «Kpèè, Unimbɔti bɔnaatiliibi kɔkɔ ŋá kinyɔɔbaantii ki sòoǹ ki nàatī ubɔti tiŋanee ŋma ní. Si mun yaa bàn̄ee, á sòoǹ kí nàatī ubɔti tin ŋān̄ee ŋma kii bin béeyee.» 14Ama ní Miika kíí-u yii: «Nì ti-Dindaan un bí dimaŋfalin nee puee, tin ti-Dindaan yaa tīī-mi ḿ nàatēe, tíǹ ní m làá sòoǹ.»

15U bāań ubɔti ceeyee ní ubɔti bālifì-u yii: «Miika, tí cùú já kí fōō Ramooti tiŋki kin bí Galaadi tiŋkpaaŋkineeyaaa, tí taa cù?» Ní Miika kíí-u yii: «Nín̄ cá! A làá já kí fōō-kì! Ti-Dindaan dū-kì ki ŋá a-ŋaan.» 16Ama ní ubɔti gíti bí-u yii: «Ŋfunyɔm miŋa ní m máaǹ kí yàntī á pùtī kí tùkù-mi ibaamɔn ti-Dindaan yindi pu ní a nín tùkù-mi ní?» 17Niinee ní Miika bí yii:

«M ká Isirayeel nibul

yàl̄ ki gbí ajoon pu

kii ipii in kaa cáá upikpaalee#22.17 Kpèè Dikà 27.17, Eesee 34.5, Maat 9.36, Maar 6.34..

Ní ti-Dindaan bí yii:

<Baa ti cáá ukpil.

Báà ŋma ń nīn gítí u-dumpu nì ŋgbansɔŋfi.>»

18Ní Isirayeel bɔtiu bí Joosafaati yii: «M bàà tùkū-si yii bee! Waa pée nàatī tin ŋān̄ee kí tīī-mi see tikpitil!» 19Ama ní Miika gíti bí-u yii: «Too! Pīlifì tin ti-Dindaan sòon̄ee. M ká ti-Dindaan kā u-beejal pu ní yilpu janjaliibi yú ki kɔ́ĺ-u, biba yú u-ŋaŋgiil pú ní bin kíǹee yú u-ŋaŋgan pú. 20Ní ti-Dindaan bí yii: <Ŋma ní m làá nín ká ú cùú ŋmàtiǹ Akaab kí yàntī ú cùú já nì Ramooti tiŋki kin bí Galaadi tiŋkpaaŋkinee bí kpɔ̀-u ní? Niinee ní ubɔ ń bí yii tina, ní un kíǹee ń bí yii tina. 21An ŋá mimmee ní ŋfam miba dɔ́miń ki síl̀ ti-Dindaan nimbiin ní ki bí yii: <Man di làá cù kí ŋmàtiǹ-u.> Ní ti-Dindaan bālifì-u yii: <A làá ŋá mana ní?> 22Ní u kíí yii: <M làá cù kí kɔ́ bibɔnaatiliibi kɔkɔn ní kí yàntī bí sòoǹ tinyimɔmbɔti kí tùkù ubɔti.> Ní ti-Dindaan bí-u yii: <A làá cùú ŋmàtiǹ-u ní m nyí yii a làá ŋmā. Nín̄ cá kí ŋá míǹ.> 23Ti-Dindaan yaa lafun dū nnyimɔn fam ki ŋá a-bɔnaatiliibi kɔkɔ nyɔmmunee, á béé yii u là dinimbinaamandi ń jēetí a-pu ní.»

24Niinee ní Keenaana jipɔɔn Siideekiyawuu sútì ki pìl̄ Miika ní ki fáá-u ntampa ki lī yii: «La pú ní ti-Dindaan fam nyáń m-ni ki cūtìi bíi sòoǹ nì si ní?» 25Ní Miika kíí yii: «Tiŋman, ŋwiin ŋun ní a yaa láa sáń ki póotí adiin ki bāal̀ee, a làá dāá gbìl̄ taapu.» 26Niinee ní Isirayeel bɔtiu tīī mara yii: «Ní cúúmaan Miika kí cùnnì-u kí tīī Amɔn tiŋki kɔmandaŋwu nì ubɔti jipɔɔn Yoowasi, 27ní kí tùkù-bi yii: <Man ubɔti di bí yii, ní dū kijapaai nee kí tɔ̄ sarka, kí tīī-u tijin ŋwaam pu nì nnyim kí nīn cí ŋyunti ŋun m làá fàtīí gítiń nì ŋgbansɔŋfee.>» 28Ní Miika bí-u yii: «A yaa fātìi gítìń nì laafiyee, mimmee ti-Dindaan kaa dī m-pu ki sòon̄ dee.» Ní u gíti kútì yii: «Nimbi samaa kɔkɔ, pīlifìmaan!»

Ubɔti Akaab kpíìń kujaaun

(Kpèè 2 Kroo 18.28-34)

29Isirayeel bɔtiu nì Juuda bɔtiu Joosafaati nín cá kí já nì Ramooti tiŋki kin bí Galaadi tiŋkpaaŋkinee. 30Ní Isirayeel bɔtiu bí Joosafaati yii: «M làá kpántí m-wampeeŋkaati bí taa béé-mi ní kí cùú já kujaau, ama siiyee, dū a-beebɔkutil kí pèen̄.» Ní Isirayeel bɔtiu lafun kpántì u-wampeeŋkaati bí taa béé-u ní ki cūtìi bíi jáà. 31Siirii bɔtiu mun nìn tīī u-janjaliibi mmuŋku nì saalaa nì bili bin sá bin kpèé janjatɔrɔkub kpilibee mara yii: «Ní taa já nì bijanjaliibi ŋwaamuɔɔɔ, kí taa já nì bijanjakpilib, ama ní pée já nì Isirayeel bɔtiu baba.» 32An pu ní bin kpèé janjatɔrɔkub kpilibee nín ká Joosafaatee, bi bí yii: «Báà an ŋá pu, Isirayeel bɔtiu dee», ní bi fātì bi-ba ki túĺ-u ki bíi jáà nì u, ní Joosafaati kíĺ ki bíi kūuntí. 33Niinee ní bijanjakpilibee nín béè yii an kaa sá Isirayeel bɔtiu ní bi yāntì-u kaa tí bíi jì-u.

34Ama Siirii yab janjaliu ubɔ pée tɔ́ mpiin yìkíl̄ yikil ní an cūtìi yá Isirayeel bɔtiu laakin u-gbampɔɔl janliitiliŋ tūū tɔbee. Ní ubɔti bí un ŋàal̀ u-tɔrɔkuuee yii: «Fàtīí gítí a-boon tí nyā dikɔmbool pu, di sá yii m fōō tiweendi.»

35Ama ŋwiin gbantee, kujaau nín nìn pɔ́ɔkì puee, bi nìn yāntì ubɔti yú u-tɔrɔkuu poon ubɔ ŋúb́-u ki túĺ Siirii yab, ní kujoouee, u kpíì. Fatiku un nìn nyáń-uee nìn dōoǹ tɔrɔku poon ki pùub̄. 36Ŋwìiń jéetèe ní bi téeń dijanjanaapaal pu yii: «Báà ŋma ń gítí u-dumpu u-tiŋkin, 37di sá yii ubɔti kpíì!»

Bi nìn cáań-u Samaarii ki síb́-u niin. 38Bi bíi fíntí Akaab tɔrɔkuu Samaarii nyimbɔbilinee ní iboo dɔ́miń ki líntì u-fatikuu ní nnimpulaakpaamu mun fùl̄ dinyimbɔbilee poon, kii ti-Dindaan nín nìn pée sòon̄ puee.

39Akaab tuuŋŋi ŋin kíǹee, tin kɔkɔ u ŋée nì u nín dū kunti nyiŋŋi ki máń kudii puee nì ntimu mun u máńee kɔkɔ ŋmàn̄ ki kā Isirayeel bɔtiibi tuuŋŋi gbɔŋkun. 40Akaab kpíì ki cūtìi ŋàl̄ u-baabi. U-jipɔɔn Akasiyasi di fōō u-yil ki kpántì ubɔti.

Juuda bɔtiu Joosafaati bɔti

(Kpèè 2 Kroo 20.31–21.1)

41Akaab nín jíń dibeel Isirayeel tiŋki pu abin anaa poonee ní Asaa jipɔɔn Joosafaati kpántì Juuda tiŋki bɔtiu. 42U nìn cáá abin aŋmoo kpá imuŋku ili ní ki kpántì ubɔti, ní ki kāl̀ Jeerusaleem abin mmuŋku nì aŋmoo ki jíń dibeel. Bi nìn yíì u-na Asuuba, Siilii bisal. 43U nìn nóó u-baa Asaa tabɔbiliŋ ní deedee, ní ki nìn ŋá tin fáatiǹ ti-Dindaanee. 44Ama waa nìn gbáń ki kpītì isaraafan in nìn bí ŋgbantamu puee. Binib nìn gbíntìi cáà niin ki ŋáań saraabi ki tùutī talaalub. 45Joosafaati nì Isirayeel bɔtiu nìn ŋá mpèé ní ŋgbansɔŋfi nìn bí bi-kansikin. 46Joosafaati tuuŋŋi nì u-pɔ́ɔǹtam nì u nín jáń tijáti puee kɔkɔ ŋmàn̄ ki kā Juuda yab bɔtiibi tuuŋŋi gbɔŋkun.

47U nìn kúntì bininjab bin nìn ŋáań tilaakpaal tuuŋŋi kunimbɔtidiin ki nìn kíǹ ki bí u-baa Asaa yuntiŋuee kɔkɔ. 48Ŋyunti gbantee, ubɔti kaa nìn dáá bí Eedoom tiŋkin, ama kɔmandan ní ubɔti nìn lēē u kpèé kitiŋ. 49Joosafaati nìn yāntì bi kpáá meelakpaambi Eesiiyɔn-Geebeer tiŋkin bí bàà nín̄ cáà Oofiiri tiŋkin#22.49 Dūú ŋmàntī nì 2 Bib 8.20. ki nyàabìń sindaariya. Ama meelabee kaa cūtì ndan, di sá yii bi nìn bíil̀ Eesiiyɔn-Geebeer tiŋkin. 50Niinee ní Akaab jipɔɔn Akasiyasi bí Joosafaati yii: «Yàntī m-tɔntɔnliibi ń nīn bí a-yab cee meelanaa!» Ama Joosafaati kaa nìn kíí míǹ. 51Joosafaati kpíì ki cūtìi ŋàl̄ u-baabi ní bi síb́-u Daafiidi Tiŋkin, ní u-jipɔɔn Jooram fōō u-yil ki kpántì ubɔti.

Akasiyasi, Isirayeel bɔtiu

52Juuda bɔtiu Joosafaati nín kāl̀ dibeel abin saalku nì ali poonee, ní Akaab jipɔɔn Akasiyasi kāl̀ Samaarii tiŋkin ki jíń Isirayeel tiŋki pu dibeel. 53U nìn ŋá tin kaa fáatiǹ ti-Dindaanee. U nìn nóó u-baa nì u-na nì Neebaati jipɔɔn Jeerooboowaam bin nìn yāntì Isirayeel yab kɔ́ ikpitinee tabɔbiliŋ ní. 54U nìn gbāaǹ diwaal Baal nimbiin ki jáam̀-dì. U nìn gbítì ti-Dindaan Isirayeel Nimbɔtiu ŋuul, kii u-baa nín nìn pée ŋá puee ní deedee.

Currently Selected:

1 Rois 22: BASSARDC

Highlight

Copy

Compare