1 Rois 21

Ubɔti Akaab yāntì bi kūū Nabooti

1Tibɔti nee boonee tin jítèe sɔ̀. Ujiseeraayeelja Nabooti nìn cáá bufiinyikpaa bubɔ, bu nìn dɔ̄ ki pìlīǹ Samaarii bɔtiu Akaab dumpu. 2Dalbee ní Akaab cūtìi ká Nabooti ní ki bí-u yii: «Dū a-fiinyikpaabu kí tīī-mi ḿ dūú ŋá tikuŋfaal kpaabu, di sá yii bu dɔ̄ ki pìlīǹ m-dumpu, ní ḿ tīī-si bufiinyikpaa bun ŋān̄ ki jítiǹ bu neeyee. A yaa tí là ḿ pà-si bu-daaku nimbiliŋ nín sá pueeyaaa, m làá pà.» 3Ama ní Nabooti kíí-u yii: «Maa cáá nsan ti-Dindaan nimbiin kí dū bufiinyikpaa bun m fōō difakal m-naanjab ceeyee kí tīī-si.»

4Ní Akaab nín kùǹ nì kunimbaau nì diŋuul, kun puee ujiseeraayeelja Nabooti bí-u yii: «Maa làá dū m-naanjab fakal kí tīī-si.» U dōoǹ u-lambaŋki pu, ní ki fātì u-nimbiin ki túĺ digundi kaa là tijin kí jī. 5U-nimpuu Jeesabeel dɔ́miń ki ká-uee ní ki bālifì-u yii: «Ba pu ní a-nimbiin wíiḿ míǹ aa là tijin kí jī na?» 6Ní ubɔti kíí-u yii: «Kun bée di sá yii m cūtìi ká ujiseeraayeelja Nabooti ki bí-u yii: <Dū a-fiinyikpaabu kí nyāfiǹ-mi, a yaa tí làa, ḿ dū m-fiinyi kpaabu bubɔ kí kpántí-si.> Ní u kíí-mi yii: <Maa làá tīī-si m-fiinyikpaabu.>» 7Niinee ní Jeesabeel bí-u yii: «Sii di kaa sá Isirayeel bɔtiuaa? Yīkìm̄! Jī tijin kí nīn fàal̀. Man di làá dū ujiseeraayeelja Nabooti kpaabu kí tīī-si.»

8Niinee ní u ŋmàn̄ kugbɔŋu ubɔti Akaab yindi pu, ní ki dū ubɔti jaliiki ki nyīī, ní ki tú bí cùnnì tigbɔn gbanti kí tīī kitiŋ kin poon Nabooti kóòyee tindaŋkpilib nì ki-kpambaliŋ. 9Tigbɔn gbanti poonee, tin u ŋmàn̄ee sɔ̀: «Ní bóob́ kinyɔkɔ kí kóoǹ samaa kɔkɔ kí kpāfì kí yàntī Nabooti ń kpòotī dinyɔɔboobil gbanti. 10Ní nyàab̀maan bininjab bili bin kaa bí tibanee kí kàan̄ u-nimbiin, ní bíǹ ń lēē nnyimɔn seerau kí túń u-pu. Bí lì yii: <A sòon̄ ki bíil̀ Unimbɔti nì ubɔti.> Míǹ boonee, ní nyāntí-u kitiŋ kpaanceetiŋu, kí yāŋkì-u ataŋkpee ú kpú#21.10 Un yaa sòon̄ ki bíil̀ Unimbɔti (Akoo 24.10-16) àá ubɔtee (2 Sami 19.22) máaǹ bí kpɔ̀-u ní..»

11Nabooti nín kóò kitiŋ kin poonee kpilib nì ki-kpambaliŋ ŋá kii Jeesabeel nín ŋmàn̄ kugbɔŋu poon ki bí yii bí ŋá puee. 12Bi bóob́ kinyɔkɔ ní ki kóoǹ samaa kɔkɔ ki kpáfì ní ki yāntì Nabooti kpōotì. 13Bininjab bili bin kaa bí tibanee dɔ́miń ki kāl̀ Nabooti nimbiin ní ki kíĺ ki bíi sòoǹ nnyimɔn seerau ki tūntí Nabooti pu, samaa kɔkɔ nimbiin ki lì yii: «Nabooti sòon̄ ki bíil̀ Unimbɔti nì ubɔti.»

Niinee ní bi nyántì-u kitiŋ kpaanceetiŋu ki yáŋkì-u ataŋkpee ki kūū. 14Ní bi tú bí cùú tùkù Jeesabeel yii: «Bi yáŋkì Nabooti ataŋkpee ki kūū-u.» 15Jeesabeel nín gbìl̄ yii bi yáŋkì Nabooti ataŋkpee ki kūū-uee ní u bí Akaab yii: «Cùú fōō ujiseeraayeelja Nabooti fiinyikpaabu bun u nìn yíì yii waa làá dūú nyāfiǹ-see kí nīn kíǹ ki yì, di sá yii Nabooti kaa ti bí, u kpíì.» 16Akaab nín gbìl̄ yii Nabooti kpíìyee, ní u nín sìntī u-kpaabun, kí fōō-bu kí nīn kíǹ ki yì.

Unimbɔti sòon̄ ki kūū Akaab nì Jeesabeel bɔti

17Niinee ní ti-Dindaan bí ubɔnaatil Eelii utiiseebeeja yii: 18«Yīkì kí cù Isirayeel bɔtiu Akaab un kóò Samaarii tiŋkinee cee. U bí Nabooti fiinyi kpaabun. U cūtì kí fōō bukpaayee kí nīn kíǹ ki yì. 19Á tùkù-u yii: <Ti-Dindaan nín sòon̄ puee sɔ̀. A kūū unil ki dóòyee ki dɔ́miń kí fōō u-wantaa!> Á gíti kūtì-u yii: <Ti-Dindaan nín gíti sòon̄ puee sɔ̀. Laakin ní iboo líntì Nabooti fatikuee, niin ní i làá líntí si mun yɔu.>»

20Ní Eelii dū tibɔtee ki tùkū Akaab ní Akaab bí-u yii: «M-nannanliu, a tí nyàab̄-mi ki ká-maa!» Ní Eelii kíí-u yii: «M tí nyàab̄ ki ká-si, kun puee an pée mɔ̄ǹ-si á nīn ŋáań tin kaa fáatiǹ ti-Dindaanee dee. 21Kpèè ti-Dindaan nín lī puee sèé: <M làá yàntī dinimbinaamandi ń kɔ́-si. M làá kúntí a-dicaŋkun yab. M làá kpɔ̀ kí céetí a-dicaŋkun bininjab kɔkɔ, uyumbuee, un tɔ́ u-beeee, báà ubɔ kaa làá kíń. 22M làá ŋá a-dicaŋku kii m nín nìn ŋá Neebaati jipɔɔn Jeerooboowaam nì Ayiiya jipɔɔn Bayeesa dicaŋŋi puee ní. Di sá yii a gbítì m-ŋuul ki yāntì Isirayeel yab kɔ́ ikpitin.> 23Ti-Dindaan nìn sòon̄ Jeesabeel bɔti ki lī yii: <Iboo di làá ŋmɔ́ Jeesabeel nanti Jisirayeel gundi taapu#21.23 Kpèè 2 Bib 9.36.. 24A-dicaŋkun un yaa kpíì kitiŋinee, iboo di làá ŋmɔ́ udaan nanti. Un di yaa kpíì tisatinee, inoon di làá jī u-nanti.>»

25Ubɔ kaa ti pée bí ki dū u-ba ki líiǹ atuun ŋin kaa fáatiǹ ti-Dindaanee diŋál kii Akaabee. U-nimpuu Jeesabeel di nìn téekí-u ní u ŋáań míǹ. 26U nìn túń ntimbiil tuuŋŋi ki jáam̀ awaa kii Amɔɔr yab bin ti-Dindaan nìn jìn̄ ki fōō bi-tiŋki ki tīī Isirayeel yabee nín nìn ŋá puee.

Akaab sīntì u-ba taapu

27Akaab nín gbìl̄ tibɔti gbantee ní u cúú tiwan tin u pēēyee ki cátì, ní ki dū kutuku ki pēeǹ ní ki bóob́ kinyɔkɔ. U nìn pèentí kutuku míǹ ní ki dɔ̀, ní ki còom̄ soooo soooo. 28Niinee ní ti-Dindaan bí Eelii utiiseebeeja yii: 29«Kéè a ká Akaab nín sīntì u-ba m-nimbiin pueeyaa! U nín sīntì u-ba m-nimbiin puee, maa làá ti cáań dinimbinaamandi kí tɔ̄ u-dicaŋku pu u-maŋfal wiiŋyi poon, asee u-jipɔɔn yaa láa kāl̀ dibeelee ní m làá cáań.»

Currently Selected:

1 Rois 21: BASSARDC

Highlight

Copy

Compare