1 Chroniques 5

Rubeen naantiibi

1Jaakɔb biseebiki Rubeen jipɔmbi sèé. Rubeen di sá Jaakɔb jipɔŋkpiliu. Ama u nìn dōoǹ nì u-baa nimpoobi kansikin ubɔ. Míǹ boonee ní bi cúú tijipɔŋkpiti ki fōō u-cee ki dūu tīī Jooseefi jipɔmbi. Jooseefi mun nìn sá Isirayeel jipɔmbi kansikin ubɔ ní. Kí yòon̄ ŋyunti gbantee, baa nìn gíti dū Rubeen ki yíiń ujipɔŋkpil. 2Juuda di nìn sá u-mambi nì u-naalib kansikin un pɔ̄ɔ̄, ní u-dicaŋkun yab ubɔ dāa kpántì Isirayeel bɔtiuee#5.2 Rubeen : kpèè Diny 35.22, Juuda : kpèè Diny 49.8-10.. Ama Jooseefi ní bi dū tikpiti ki tīī. 3Jaakɔb jipɔŋkpiliu Rubeen jipɔmbi di sá Anɔki nì Palu nì Eesirɔn nì Kaarmii. 4Jooweel naantiibi di sá Seemaya nì Jooweel nì Gɔɔgi nì Simeeyii, 5nì Miika nì Raaya nì Baal, 6nì Baal jipɔɔn Beera. Beera nìn sá Rubeen naakookun yab kpiliu ubɔ ní Asuur bɔtiu Tiigilaati-Piilneeseer nìn cúú ki cūnnì kuyuŋu#5.6 Kpèè 2 Bib 15.6.. 7Beera nabiyaamu ki nóó nì bi nín pēē pēē mmaal pu nì adican pu bi ŋmàn̄ bi-yiŋŋi ki bíl̀ee, upeekaa di sá Jeeyeel, ní ki páaǹ Seekariyawuu, 8ní ki páaǹ Asaasi jipɔɔn Beela. Beela sá Seema naantiiu nì Jooweel naantitɔntɔkɔl ní.

Rubeen yab nìn kóò kitiŋ kin dɔ̄ kí yòon̄ Arooweer tiŋki ŋgiil pú kí cáá sāā Neeboo jool nì Baal-Meeyɔn tiŋki ŋgan púee ní. 9Ŋwìiń nyalaŋki púee, bi nìn kóò kitiŋ kin dɔ̄ ki tin cáa sāā kuteeu kun yākatì bi nì Eefiraati mɔɔlee nín kífí púee ní, kun puee bi-waŋkuti nìn būtì Galaadi tiŋki pu tikpilku. 10Ubɔti Saayuul yuntiŋuee, bi nìn jáń ki pɔ́ɔkiǹ Agaar maaliŋun yab ní ki fōō mpaan ki kāl̀ Galaadi tiŋki kin dɔ̄ ŋgan púee kɔkɔ.

Gaadi naantiibi

11Gaadi naakookun yab nìn kóò Rubeen yab tiŋki ŋgan pú ní, Baasan tiŋki kí tin cáá sāā Salka tiŋki. 12Baasan tiŋkin niinee, bi-kpiliu upeepeekaa di nìn sá Jooweel, uliliiti di sá Safan, ní ki páaǹ Jaanayi nì Safaati. 13Ki nóó nì bi nín pēē pēē mmaal puee, bi-nabiyaamu mun kíǹee kpilib di sá Miikayeel nì Meesulam nì Seeba nì Jooraayi nì Jakan nì Siiya nì Eebeer. Bi nìn nyáń binib biluli ní. 14Urii jipɔɔn Abiikayiil niboolii di sá bikpilib gbanti. Abiikayiil naanjab di sá Jaroowa nì Galaadi nì Miikayeel nì Jeesisaayi nì Jaadoo nì Buusi. 15Abidiyeel jipɔɔn nì Guuni naantiiu Akii di nìn sá Gaadi naakookun yab gbanti kɔkɔ kpiliu. 16Gaadi dicaŋkun yab nìn kóò Galaadi nì Baasan tiŋkpaammun ní. Bi nìn gíti kóò ntimu mun bí mu-taapuee nì Saarɔn naakpaapɔɔkun kí tin cáá sāā mu-kpaanyɔmmu.

17Bi nìn kàan̄ binib gbanti kɔkɔ ki ŋmàn̄ bi-yiŋŋi ki ŋá dikàandi gbɔŋkun ŋyunti ŋun Jootam nìn sá Juuda bɔtiu ní Jeerooboowaam sá Isirayeel bɔtiuee ní.

18Rubeen nì Gaadi naakɔtin yab nì Manasee naakooku dijandi diba yab sá bibaatandambi kutukub imuŋku ili nì binaa nì binib alaataa aluli nì imuŋku ita. Bi nìn cíkitì ki ŋūǹ kí já kujaau, kí ŋúb́ digbampɔɔl nì kitàataajiki kí tɔ̄ butɔbu. 19Bi nìn jáń nì Agrii yab nì Jeetuur nì Nafiisi#5.19 Kpèè Diny 25.15. nì Noodaab dicaŋŋi yab. 20Kujaau gbanti poonee, bi nìn dū bi-mákal ki páaǹ Unimbɔti pu ní ki mēē-u yii ú tūtuǹ-bi. Unimbɔti nìn fōō bi-wimmeem ní ki tútuǹ-bi. Míǹ ní bi nìn jáń ki pɔ́ɔkiǹ Agrii yab nì bin nìn pá bi-boonee. 21Bi nìn cúú Agrii yab cee igutaamu kutukub imuŋku ili nì saalaa nì ipii nì iŋoobu kutukub alaataa ali nì imuŋku ili nì saalaa nì mmamu kutukub bili. Bi nìn cúú binib kutukub dilaataal mun kuyuŋu 22ní ki kūū binannanliibi tikpil. Di sá yii Unimbɔti di nìn līī bi-nyɔkɔpu ní bi jáń kujaau gbanti. Niinee ní bi gbíntì Agrii yab tiŋki gbantin ki kāl̀ ki dāa sāā ŋyunti ŋun bi dāa cúú Isirayeel yab ki cūnnì kuyuŋuee.

Manasee naantiibi bin kóòń Jɔɔdan buŋŋu ŋwìiń nyalaŋki púee

23Manasee naakooku dijandi diba yab nìn dɔ́miń ki kāl̀ kitiŋ kin dɔ̄ kí yòon̄ Baasan tiŋki ŋgiil pú kí cáá sāā Baal-Eermɔn tiŋki nì Seeniir nì Eermɔn jool ŋgan púee ní. 24Bi nín pēē pēē mmaal puee, bi-kpilib yiŋŋi di sá Eefeer nì Iseeyii nì Eeliyeel nì Asiriyeel nì Irimeeya nì Oodafiya nì Yaadiyeel. Bíǹ gbanti kɔkɔ nìn sá bibaatandambi nì bin nyáń diyindee ní.

25Ama Rubeen nì Gaadi naakɔtin yab nì Manasee naakooku dijandi din bí Jɔɔdan buŋŋu ŋwìiń nyalaŋki púee yab nìn fātì bi-boon ki tīī bi-naanjab Nimbɔtiu ní ki nìn bí ki tòotī atimbun ŋin nib Unimbɔti nìn jìn̄ ki nyántì ki wāatì-bi kitiŋee waaŋi. 26Niinee ní Isirayeel Nimbɔtiu sāal̀ Asuur bɔtiibi Puul nì Tiigilaati-Piilneeseer ní bíǹ dɔ́miń ki cúú-bi ki cūnnì Alaa nì Abɔɔr nì Ara timmun nì Goosan mɔɔl caŋin timmun kuyuŋu. Bi dáá gbíntìi bí niin ki dāa sāā díǹ#5.26 Puul nì Tiigilaati-Piilneeseer: kpèè 2 Bib 15.19. - Alaa... Goosan: kpèè 2 Bib 17.6..

Leefii naantiibi

27Leefii jipɔmbi#5.27 Tigbɔn tiba poonee, 5.27-41 sá 6.1-15 ní. di sá Geersɔn nì Keeyaati nì Meerarii. 28Keeyaati jipɔmbi di sá Amiiraam nì Isaar nì Eebrɔn nì Usiyeel. 29Amiiraam jipɔmbi di sá Aarɔn nì Mooyiisi ní u-bisal sá Miiriyam. Aarɔn jipɔmbi di sá Nadaab nì Abiyuu nì Eeleeyasaar nì Itamaar. 30Eeleeyasaar di màl̄ Piinaasi, ní Piinaasi màl̄ Abiisuwa, 31ní Abiisuwa màl̄ Bukii, ní Bukii màl̄ Usi, 32ní Usi màl̄ Seeraya, ní Seeraya màl̄ Meerayooti, 33ní Meerayooti màl̄ Amariya, ní Amariya màl̄ Ayiituub, 34ní Ayiituub màl̄ Saadooki, ní Sadooki màl̄ Ayiimaasi, 35ní Ayiimaasi màl̄ Asariya, ní Asariya màl̄ Yoowanan, 36ní Yoowanan màl̄ Asariya. Asariya gbanti di dāa kpántì usaraaŋakpil kunimbɔtidii kun Saloomɔn nìn máń Jeerusaleem tiŋkinee poon. 37Asariya di màl̄ Amariya, ní Amariya màl̄ Ayiituub, 38ní Ayiituub màl̄ Saadooki, ní Saadooki màl̄ Saluum, 39ní Saluum màl̄ Ilikiya, ní Ilikiya màl̄ Asariya, 40ní Asariya màl̄ Seeraya, ní Seeraya màl̄ Joosadaaki. 41Neebukadineesaar nìn cúú Joosadaaki ki cūnnì kuyuŋu ŋyunti ŋun ní ti-Dindaan nìn yāntì bi cúú Juuda yab nì Jeerusaleem yab ki cūnnì kuyuŋuee.

Currently Selected:

1 Chroniques 5: BASSARDC

Highlight

Copy

Compare