1 Chroniques 21

Daafiidi yāntì bi kàan̄ Isirayeel yab

(Kpèè 2 Sami 24.1-9)

1Ŋwiin ŋubɔee, Sitaan yíkì kí já nì Isirayeel yab ní ki lūkutì Daafiidi ú kàaǹ Isirayeel yab kɔkɔ. 2Daafiidi nìn bí Joowaab nì u-janjakpilib bin kíǹee yii: «Ní cùú kàam̀maan Isirayeel yab kɔkɔ, kí yòon̄ Beerseeba tiŋki ŋgiil pú kí cáá sāā Daani tiŋki ŋgan pú. Ni yaa kàan̄ ki dóòyee, ní gítiń kí dāá tùkù-mi ḿ béé bi-wíiŋŋu nyɔkɔm.» 3Ní Joowaab kíí-u yii: «Ti-baa ubɔti, m mèé yii ti-Dindaan ń yàntī u-nibul Isirayeel yab ń bùtī ŋfunyɔm dilaataal pu. Bi-kɔkɔ bí díǹ pu nee sii ti-baa ubɔti taapu ní. Kin ba pu ní a baasii nyàab̀ kí kàaǹ Isirayeel yab kí yàntī bí yìntī míǹ?#21.3 Kpèè 2 Sami 24.3.» 4Nì míǹ kɔkɔee ubɔti marau nìn pɔ̄ɔ̄ ki jítiǹ Joowaab nín nìn dàkafī puee, ní úǹ dāa gīī ki ŋá míǹ. Joowaab nìn cúú nsan ki yìin̄ Isirayeel tiŋki kɔkɔn ní ki fātìi gítìń Jeerusaleem tiŋkin. 5Joowaab bāańee ní ki tùkū Daafiidi u nín kàan̄ binib bi-nyɔkɔm nyáń puee. U bí yii Isirayeel naakookun yab bin bàn̄ kí cù kujaauee sá binib miiliyɔn ubɔ nì binib kutukub dilaataal, ní Juuda naakookun yab bin bàn̄ kí cù kujaauee sá binib kutukub alaataa anaa nì imuŋku ita nì saalaa.

6Joowaab kaa nìn kàan̄ Leefii naakookun yab nì Beenjameen naakookun yab ki kútì bin kíǹee pu. Di sá yii ubɔti marauee kaa nìn kāliǹ-u báà fiii.

Unimbɔti dáaĺ Daafiidi tafal

(Kpèè 2 Sami 24.10-17)

7Tibɔti gbanti kaa nìn mɔ́ɔkiǹ Unimbɔti, ní u dáaĺ Isirayeel yab tafal. 8Ní Daafiidi bí Unimbɔti yii: «Ikpitikpaan ní m ŋá nee. Ama kɔŋkɔnnee m mèé-si yii á dū m-yìntitam gbanti kí pɔ̄-mi, kun puee m lafun ŋá kii m sá uwaatee ní.»

9Niinee ní ti-Dindaan sòon̄ nì ubɔnaatil Gaadi un di kpòotī Daafiidee ní ki bí-u yii: 10«Cùú tùkù Daafiidi yii man ni-Dindaan nín lī puee sèé: <Man ni-Dindaan, m dū tiwan tita ní ki bíl̀ u-nimbiin ú lēē tin u là ḿ dūú dáaĺ u-tafalee.>» 11Ní Gaadi cūtì Daafiidi cee ki bí-u yii: «Ti-Dindaan nín lī puee sèé. Ba ní a là ḿ dūú dáaĺ a-tafal ní? 12Ŋkùm ń nyā a-tiŋki pu abin ataaa, binannanliibi ń já kí pɔ̄ɔkiǹ-si iŋmal itaaa, bìlbil kúm ń jēetí kitiŋ nee pu ní ntuun ń dū ti-Dindaan tàataajiki kí pɔ̀fì binib Isirayeel tiŋki kɔkɔn iwiin ita? Kɔŋkɔnnee, dàkafì tiŋan kí tùkù-mi tin m làá tin kíí un túnní-mee.» 13Ní Daafiidi bí Gaadi yii: «M bí kunimbaakpaaŋŋu poon ní. Ama an sɔ́ ḿ kɔ́ ti-Dindaan ŋaan ki jítiǹ ḿ kɔ́ unil ŋaan, di sá yii ti-Dindaan úǹ poon mɔ̄ ní.»

14Di sá ní ti-Dindaan dū bìlbil kúm ki tɔ́ Isirayeel yab pu ní an kūū binib kutukub imuŋku ita nì saalaa. 15Unimbɔti nìn tú ntuun ŋú cùú nàan̄ Jeerusaleem tiŋki. Ama ti-Dindaan nín ká ntuunee bí ki nà binib puee, ní an gíti kɔ́-u falaa nnaabu gbanti pu. Di sá ní u bí ntuunee yii: «An ŋmāntèe, gbèen̄ee!»

Ŋyunti gbantee ti-Dindaan tuuŋŋu nìn yú ujeebusja#21.15 ujeebusja : kpèè 2 Sami 24.16. Araafina bileegbanaapaal caŋin. 16Daafiidi wáaǹ ki kpēēyee ní ki ká ntuunee yú yilpu nì taapu kansikin ki fɔ́fì kitàataajiki ki túĺ Jeerusaleem tiŋki. Niinee ní Daafiidi nì bitindaŋkpilib tātìi gbāaǹ bi-yigbeeŋi tūū kitiŋ ki pēē kutukub. 17Ní Daafiidi bí Unimbɔti yii: «Man di kaa bí yii bí kàaǹ binibaaa? Man di ŋá ikpiti, man di yīntì, m-nibul mun ŋá ba? An sá man nì m-dicaŋku tafal ní á dáaĺ? Ti-Dindaan m-Nimbɔtiu, an sá man nì m-dicaŋku yab tafal ní á dáaĺ. Taa dū iween nee kí tɔ̄ a-nibul pu.»

Daafiidi máń ti-Dindaan nsaraafan

(Kpèè 2 Sami 24.18-25)

18Ti-Dindaan tuuŋŋu bí Gaadi ń tùkù Daafiidi yii: «Jɔ̄m̀ ujeebusja Araafina bileegbanaapaal pu kí mā ti-Dindaan nsaraafan.» 19Ní Daafiidi nín jɔ́ḿ kii ti-Dindaan nín dī Gaadi pu ki tīī mara puee. 20Ŋyunti gbantee Ɔrinan nìn bí u-naapaal pu ki gbáà bilee. U fātèe ní ki ká ntuun, ní u-jipɔmbi binaa bin nìn bí u-cee niinee sáǹ ki bál̀. 21Ní Daafiidi cōom̀ ki nín cá Ɔrinan cee. Ɔrinan kpēēyee Daafiidi dee ní u nyáń ki túŋkì-u ní ki tātìi gbāaǹ u-yigbeel tūū kitiŋ ubɔti nimbiin. 22Ní Daafiidi bí Ɔrinan yii: «Dū a-naapaal nee kí tīī-mi. M là kí mā ti-Dindaan nsaraafan ŋu-pu. Mimmee nnaabu ŋun jéetì dinibul pu nee làá gbèen̄. Dū-ŋu kí tīī-mi ḿ pà-si ŋu-daaku nín sá puee.» 23Ní Ɔrinan kíí Daafiidi yii: «Ti-baa ubɔti, yòon̄ tin kɔkɔ fáatì-see kí dūú ŋá saraabi. Kpèè inaa sèé á dūú ŋá saraawɔkaa. Tɔrɔku dɔkpalkaai mun sèé á dūú kpāā ŋŋmi kí wà saraabi, bilee mun sèé á dūú ŋá tijimpin saraau. M dū kɔkɔ ki tīī-si.» 24Ama ní ubɔti Daafiidi bí Ɔrinan yii: «Aayee, m làá dā a-bileegbanaapaal ní kí pà-si kunimbiŋmiiu nín sá puee. Maa là kí dū tin sá a-wantee nì faalaa wanti kí ŋá saraawɔkaa kí tīī m-Dindaan m-Nimbɔtiu.»

25Di sá ní Daafiidi pàn̄-u animbil jitɔmbi alaataa aluu dibileegbanaapaal pu. 26Daafiidi máń ti-Dindaan nsaraafan niin ní ki ŋá bisaraawɔkaabi nì mpèé saraabi. U nìn mēē ti-Dindaan ní úǹ kíí-u ki yāntì ŋŋmi nyánní yilpu ki wùn̄ bisaraawɔkaabi bin pá ŋfan puee. 27Niinee ní ti-Dindaan tùkū ntuunee yii ŋú gíiǹ kitàataajiki kí fúuń kujitooun.

28Daafiidi nìn ká yii ti-Dindaan kíí ki fōō u-wimmeem Ɔrinan un sá Jeebusi tiŋkinee bileegbanaapaal pu. Kí yòon̄ ŋyunti gbantee ní u kíǹ ki cáà niin múlmul ki ŋáań saraabi. 29Ŋyunti gbantee, circir kɔŋkooŋŋu ŋun Mooyiisi nìn ŋá kuteeunee nì bisaraawɔkaabi faŋŋu nìn bíń nsaraaŋapaan laŋki Gabawɔn#21.29 Gabawɔn: kpèè 16.39, 1 Bib 3.4. tiŋkin ní. 30Ama Daafiidi kaa nìn gíti ŋūǹ kí cù niin kí bàlifì Unimbɔti, kun puee u nìn fāŋkì ti-Dindaan tuuŋŋu jikee tikpil.

Currently Selected:

1 Chroniques 21: BASSARDC

Highlight

Copy

Compare