1 Chroniques 22

1An di yì-tì ní Daafiidi nìn lī yii: «Doo di sá ti-Dindaan Unimbɔti diiku, ní doo di làá nīn kíǹ ki sá Isirayeel yab saraawɔkaabi faŋŋu.»

Daafiidi bɔ́ntì kunimbɔtidii mātam

2Daafiidi nìn yāntì bi kóoǹ binicambi bin kóò Isirayeel tiŋkinee ki kpáfì ní u lēē bi-kansikin bin làá kpítí ataŋkpee bí dūú mā Unimbɔti diikuee. 3U nìn bɔ́ntì tikúti tikpil ki yóoǹ bí dūú mɔ́ɔ́ ipiŋkpaakaa kí kpáá punuubi, nì ipiin in pu punuubi làá nīn sàkēe. U nìn bɔ́ntì tasa kúti tin wīikí unil kaa ŋūǹ kí ŋmàntēe ki síiǹ. 4U nìn bɔ́ntì seedir dɔi an kaa cáá ŋkaan ki kpúkuǹ, di sá yii Tiir nì Siidɔn yab nìn cáań-u seedir dɔi tikpil tikpil. 5Daafiidi nìn lī u-ban yii: «M-jipɔɔn Saloomɔn dáá pɔ̀ɔǹ, kaa láá nyí tiba. Ama kudii kun u làá mā ti-Dindaanee máaǹ kí nīn sá kukpaaŋŋu kí nīn cáá kunyaaŋŋu binib ń gbìl̄ ku-pu ntimu kɔkɔ poon. An puee m làá bɔ́ntí ku-mātam kí yóoń-u.» Di sá ní Daafiidi lafun bɔ́ntì tiwan tikpil ki síiǹ ki wāatì ní ki nín kpíì.

Daafiidi tīī Saloomɔn mara yii ú mā kunimbɔtidii

6Daafiidi yíiń u-jipɔɔn Saloomɔn ní ki tīī-u mara yii ú mā ti-Dindaan Isirayeel Nimbɔtiu kudii. 7Daafiidi tùkū Saloomɔn yii: «M-jipɔɔn, mama m-ba nìn lēē m-pɔbilin yii m làá mā ti-Dindaan m-Nimbɔtiu kudii. 8Ama ní ti-Dindaan tùkū-mi yii: <A jáń tijakpaandi tikpil ki kūū binib tikpil. Fatiku un kɔkɔ nyáń ki fá kitiŋ man nimbiinee puee, an kaa sá sii di làá mā kudii kun poon binib làá nīn dòoń ki jáaḿ-mee. 9Kpèè, a làá màal̀ kibininjabiki kiba, kì làá nīn sá ŋgbansɔŋfi niliu ní. M làá yàntī ŋgbansɔŋfi ń nīn bí u nì binannanliibi bin māntìi tú-uee kansikin. U-yindi di làá nīn sá Saloomɔn, taapu di sá yii <Ŋgbansɔŋfi daan>. U-beel yuntiŋuee, m làá dāá yàntī ŋgbansɔŋfi nì dibatɔl ń nīn bí Isirayeel tiŋki pu. 10Úǹ di làá dāá mā-mi kunimbɔtidii. U làá dāá nīn sá-mi ujipɔnti ní ḿ dāá nīn sá-u ubaati. M làá yàntī u-beel ń báań inyaan Isirayeel tiŋki pu kí nīn cá jaanjaan.>#22.10 B. 7-10: kpèè 17.1-14, 2 Sami 7.1-16.» 11«Míǹ puee kɔŋkɔnnee, m-jipɔɔn, ti-Dindaan a-Nimbɔtiu ń nīn bí a-cee á ŋmā kí mā-u kudii, kii u nín nìn pōoǹ a-pu puee. 12U yaa láa dū Isirayeel tiŋki pɔŋŋu ki ŋúbiǹ-see, ú dāá tīī-si iciin nì dinyil á ŋmā kí nīn tɔ́ úǹ ti-Dindaan a-Nimbɔtiu marau. 13A yaa tɔ́ abɔkpaa nì marab bin u dī Mooyiisi pu ki tīī Isirayeel yabee, ki cáá-bi ki tūǹ ditundee, án làá bútí-si tikɔkɔ poon. Pɔ́ɔǹ a-ba, kí ká dipɔbil, a-wunti ń taa yɔ̀tī, ní kí taa fàŋkì báà tiba#22.13 Dūú ŋmàntī nì Joos 1.6-9.. 14Kpèè, báà nì m-sool poonee, m pɔ́ɔǹ m-ba ki bɔ́ntì sindaariya un nyiŋfiŋu jítì tɔɔnib kutukub bita puee, nì animbil kúti tin nyiŋfiŋu jítì tɔɔnib kutukub mmuŋku nì saalaa puee. M bɔ́ntì tasa kúti nì tikúmɔntiil tin baa ŋūǹ kí ŋmàntēe mun ki yóoǹ, ki bɔ́ntì idɔ nì ataŋkpee mun. A dāa ŋūǹ kí nyàab̀ kí kūtì. 15Bitɔntɔnliibi tikpil bí ki làá tɔ̄-si atuun. Bitaŋkpakpitiliibi bí, bidɔkpitiliibi bí, kapintab bí, ní atuun ŋin kíǹee kɔkɔ tɔntɔnliibi bí ki nyí bi-tuuŋŋi tiŋan pu. 16Sindaariya nì animbil kúti nì tasa kúti nì tikúmɔntiil bí tikpil tikpil, baa ŋūǹ kí ŋmàntī kí béé ti-nyɔkɔm gba. An puee yīkì kí kíĺ ditundi ní ti-Dindaan ń nīn bí a-cee!»

17Míǹ boonee ní Daafiidi tīī Isirayeel bɔtibiliŋ kɔkɔ mara yii bí tūtuǹ u-jipɔɔn Saloomɔn. 18U bí-bi yii: «Kéè ti-Dindaan ni-Nimbɔtiu bí ni-ceeyaa! U tīī-ni diŋuŋfil ajan kɔkɔ pu. U dū binib bin nìn kóò kitiŋ nee puee ki ŋá m-ŋaan. Díǹ pu nee bi kíǹ ki bí ti-Dindaan nì u-nibul taapu ní. 19An puee ní nyàab̀maan ti-Dindaan ni-Nimbɔtiu nì ni-pɔbil kɔkɔ nì ni-naŋki kɔkɔ. Ní yīkì kí kíĺ ti-Dindaan Unimbɔti circir kɔŋkooŋŋu mātam. Niinee, ni dāa ŋūǹ kí yòon̄ ti-Dindaan Poondi dakaau nì tiwan tin bi dūu sú Unimbɔtee kí yóoń kudii kun ni làá mā ti-Dindaan yindi puee poon.»

Currently Selected:

1 Chroniques 22: BASSARDC

Highlight

Copy

Compare